ލިޒްބަން، ޕޯޗުގަލް (ޖޫން 13) - ޕޯޗުގަލްގައި މިހާރު އޮތީ ބައިނަލްއަގުވާމީ ފުޓްބޯޅައިގައި ކާމިޔާބު ހޯދޭނެ ވަރުގެ ހުނަރުވެރި ޖީލެއް ކަމަށް އެ ޓީމުގެ ކެޕްޓަން، ކްރިސްޓިއާނޯ ރޮނާލްޑޯ ބުނެފި އެވެ.
އުމުރުން 41 އަހަރުގެ ރޮނާލްޑޯ އަކީ ތަފާތު ހަ ވޯލްޑް ކަޕެއްގައި ކުޅޭނެ ހަތަރު ކުޅުންތެރިންގެ ތެރެއިން އެކަކެވެ. ރޮނާލްޑޯގެ ކާމިޔާބު ފުޓްބޯޅަ ކެރިއަރަށް މަދުވާ ބޮޑު މުބާރާތްތަކުގެ ތެރެއިން ހަމައެކަނި ތަށްޓަކީ ފީފާ ވޯލްޑް ކަޕް އެވެ. މި ފަަހަރުގެ ވޯލްޑް ކަަޕަކީ ރޮނާލްޑޯ އަށް މި މުބާރާތް ކާމިޔާބުކުރަން ލިބޭނެ ފަހު ފުރުސަތެވެ.
ޕޯޗުގަލްއާ އެކު ޔޫރޯ ފުޓްބޯޅަ މުބާރާތާއި ޔުއެފާ ނޭޝަންސް ލީގު ކާމިޔާބުކުރި ރޮނާލްޑޯ ބުނީ، މި ފަހަރުގެ ވޯލްޑް ކަޕަށް ޕޯޗުގަލް އިން ކުރިމަތިލަނީ ވަރަށް ބޮޑެތި އުންމީދުތަކަކާ އެކު ކަމަށާއި ތައްޔާރީތައް ދިޔައީ ބޭނުންވި ގޮތަށް ވަރަށް ރަނގަޅަށް ކަމަށެވެ.
"ވަރަށް ރަނގަޅު ޖީލެއް މި އޮތީ މިހާރު ޕޯޗުގަލް އަށް ވަރަށް ބައިވަރު ކަންތައްތައް ހާސިލްކޮށްދެވޭނެ ފެންވަރު އެބަހުރި މި ކުޅުންތެރިންގެ،" ފަސް ފަަހަރު ބެލޮންޑިއޯ އެވޯޑް ހޯދާފައިވާ ރޮނާލްޑޯ ބުންޏެވެ.
ޕޯޗުގަލް އިން ވޯލްޑް ކަޕަށް ތައްޔާރުވުމަށްޓަކައި ކުޅުނު ދެ މެޗުން ވެސް ވަނީ ނައިޖީިރިއާ އާއި ޗިލީ އަތުން 2-1 އިން މޮޅުވެފަ އެވެ. ރޮނާލްޑޯ ބުނީ، ތައްޔާރީތައް ދިޔަ ގޮތާ މެދު ވަރަށް ހިތްހަމަޖެހޭ ކަމަށާއި ހުރިހާ އަމާޒެއް ހުރީ ފުރަތަމަ މެޗަށް ކަމަށެވެ.
"އެންމެ މުހިންމު ކަމަކީ ވެވުނު ރަނގަޅު ތައްޔާރީތަކުގެ ނަތީޖާ ފުރަތަމަ މެޗުގައި ދެއްކުން. އެކަން ކޮށްގެން އަހަރެމެންނަށް ފުރަތަަމަ މެޗުން މޮޅުވެވިއްޖިއްޔާ މިއީ ވަރަށް ރަނގަޅަށް ކުރިއަށްދާން އެޅޭ ފިޔަވަޅެއް،" ރޮނާލްޑޯ ބުންޏެވެ.
އެންމެ މުހިންމު ކަމަކީ، ގްރޫޕްގެ އެއް ވަނަ ޓީމުގެ ގޮތުގައި ނޮކައުޓް ބުރަށް ދަތުރުކުރުން ކަމަށް ރޮނާލްޑޯ ވަނީ ބުނެފަ އެވެ.
ޕޯޗުގަލް އިން ވޯލްޑް ކަޕެއްގައި އެންމެ ރަނގަޅު ނަތީޖާއެއް ނެރެފައިވަނީ، 1966 ވަނަ އަހަރު އެވެ. އެ ފަހަރު، އެ ޓީމުން ތިން ވަނަ ހޯދި އެވެ. އެންމެ ފަހުން، 2022 ވަނަ އަހަރުގެ ވޯލްޑް ކަޕްގައި ޕޯޗުގަލް ނިންމާލީ ކުއާޓާ ފައިނަލާ ހަމައިންނެވެ.
