ތ. ކިނބިދޫ ކައުންސިލްގެ ރައީސްގެ މަގާމާ މި ފެށުނު ދައުރު ހަވާލުވި މުހައްމަދު ޝާފިއުގެ އެއްބަނޑު އެއްބަފާ ދައްތަ އައިމިނަތު ސަހިއްޔާ އެ ކައުންސިލްގެ ސެކްރެޓަރީ ޖެނެރަލްގެ މަގާމުގައި ހުރުމުގެ ފުރުސަތު ސިވިލް ސާވިސް ކޮމިޝަން (ސީއެސްސީ) އިން ނިންމީ ދިވެހި ސިވިލް ސާވިސް ގާނޫނާއި ގަވާއިދުގައި ބުނެފައިވާ ގޮތާ ހިލާފަށްކަން ހާމަވެއްޖެ އެވެ.
ޝާފިއު އެ މަގާމަށް އިންތިހާބުވީ ވެރިކަން ހިންގާ ޕީޕަލްސް ނެޝަނަލް ކޮންގްރެސްގެ ފަރާތުންނެވެ.
ސިވިލް ސާވިސް ގާނޫނުގައި ބުނާ ގޮތުން އެފަދަ ވަޒީފާއެއް އަދާކުރާ އޮފީހެއްގެ އެންމެ އިސްވެރިޔަކީ މަންމަ، ބައްޕަ، ދަރިއެއް، އަނބި، ފިރި، އެއްބަނޑު އެއްބަފާ މީހެއް، އެއްބަނޑު މީހެއް ނުވަތަ އެއްބަފާ މީހަކަށް ވެގެން ނުވާނެ އެވެ. އެފަދަ މީހަކީ ސީދާ ގޮތުން ސުޕަވައިޒްކުރަންޖެހޭ ނުވަތަ ރިޕޯޓުކުރަންޖެހޭ މީހެއްކަމުގައި ވާނަމަ ސިވިލް ސާވިސްގެ ގާނޫނުގައި 41 ވަނަ މާއްދާގައި ބުނާ ޝަރުތު ފުރިހަމައެއްނުވާނެ އެވެ.
ކައުންސިލްތަކަށް ސެކްރެޓަރީ ޖެނެރަލުން އައްޔަނުކުރަނީ ކައުންސިލްތަކުގެ ލަފަޔާއެކު ސީއެސްސީ އިންނެވެ. އެއީ ކައުންސިލްގެ އިދާރީ އެންމެ އިސް މަގާމެވެ. ލާމަރުކަޒީ ގާނޫނުގެ 126 ވަނަ މާއްދާގެ ށ. ގައި އެސްޖީގެ މަސްއޫލިއްޔަތުތައް ބަޔާންކޮށްފައިވާއިރު ކައުންސިލް އިދާރާގެ މަސައްކަތްތައް ރިޕޯޓުކުރަން ޖެހެނީ ކައުންސިލް ރައީސަށެވެ.
އެހެން ނަމަވެސް، ސީއެސްސީއިން ނިންމީ ކިނބިދޫ ކައުންސިލްގެ އެސްޖީގެ ހައިސިއްޔަތުން އުފުލަން ޖެހޭ އެންމެ ބޮޑު ޒިންމާ ކަމަށްވާ މާލީ ޒިންމާދާރުވެރިޔާގެ މަސްއޫލިއްޔަތުތައް އެ ކައުންސިލުގެ އެހެން މުވައްޒަފަކާ ހަވާލު ކުރުމަށެވެ. އަދި އިދާރީ އެހެނިހެން ކަންކަން ކުރުމުގެ މަސްއޫލިއްޔަތު އެ ކައުންސިލުގެ ނައިބު ރައީސްއާ ހަވާލުކުރުމަށެވެ.
މައުލޫމާތު ލިބިފައިވާ ގޮތުގައި ގާނޫނެއްގައި ބުނެފައި އޮތް ޝަރުތެއް އުނިވެގެން ގޮސްފައިވާތީ އެސްޖީ މަގާމުން ވަކިކުރެވިގެންދާނެ ކަމަށް ސީއެސްސީއިން އެންމެ ފުރަތަމަ އެ ކައުންސިލަށް އެންގި އެވެ. އީދު ބަންދަށް ފަހު ކުއްލިއަކަށް އެ ނިންމުން ވަނީ ބަދަލުކޮށްފަ އެވެ. ނަމަވެސް، އަދިވެސް ކައުންސިލަށް އެކަން ރަސްމީކޮށް އަންގާފައި ނުވާ ކަމަށް މައުލޫމާތު ލިބެ އެވެ.
ސިވިލް ސާވިސް ޤާނޫނުގެ 41 ވަނަ މާއްދާގެ ހ. ގެ ދަށުން ބަޔާންކޮށްފައިވާ ސިވިލް ސާވިސް މުވައްޒަފުންގެ ކިބައިގައި ހުންނަންޖެހޭ ޝަރުތުތަކަކީ އެ ކޮމިޝަނުގެ ބައްދަލުވުމަކުން ނިންމައިގެން އެއަށް ބަދަލު ގެނެވޭނެ ޝަރުތުތަކެއް ނޫނެވެ. އަދި ކޮމިޝަނުގެ މެންބަރުންގެ ތަރުޖަމާކޮށް އެއަށް ތަފްސީލާއި ތަފްސީރު ދެވޭނެ ޝަރުތަކެއް ނޫނެވެ.
ސިވިލް ސާވިސް ގަވައިދުގައި އޮތް ޝަރުތެއްނަމަ ކޮމިޝަނުން އެ ގަވައިދު އިސްލާހުކޮށްގެން އެއަށް ބަދަލު ގެނައުމުގެ ފުރުސަތު އޮންނާނެ އެވެ. މި ހާލަތުގައި ކިނބިދޫ ކައުންސިލްގެ އެސްޖީ މަގާމުގައި ބެހެއްޓުމަށް ޝަރުތުތަކަށް ބަދަލު ގެނައުމަށް ގާނޫނު އިސްލާހު ކުރަން ޖެހޭނީ މަޖިލިސް މެދުވެރިކޮށެވެ.
އެ ކައުންސިލުގެ ނައިބު ރައީސްއާ ބައެއް މަސްއޫލިއްޔަތުތައް ހަވާލުކުރުމަށް ސީއެސްސީއިން ނިންމިއިރު ލާމަރުކަޒީ ގާނޫނަކީ އެ ކޮމިޝަނުގެ ބާރު ހިނގާ ދާއިރާ ތެރޭގައި ހިމެނޭ ގާނޫނެއް ނޫނެވެ. އިންތިހާބުވެފައި ތިބޭ ކައުންސިލަރުންނަކީ ސީއެސްސީއަށް އެއްވެސް ގާނޫނީ ބާރެއް ހިންގޭނެ ބައެއް ނޫނެވެ.
ލާމަރުކަޒީ ގާނޫނުގައި ކައުންސިލްގެ ނައިބު ރައީސްގެ މަސްއޫލިއްޔަތުތަކުގެ ތެރޭގައި ނުހިމެނޭ ކަމެއް ސީއެސްސީއަށް ހަވާލެއް ނުކުރެވޭނެ އެވެ.
