ސްރީލަންކާގެ ރައީސް، އަނޫރާ ކުމާރާ ޑިސަނަޔަކެގެ ދައުވަތަކަށް އެ ގައުމަށް ކުރެއްވި ތިން ދުވަހުގެ ރަސްމީ ދަތުރަށްފަހު މުހައްމަދު މުއިއްޒު މިއަދު ރާއްޖެ ވަޑައިގެންފި އެވެ.
ލަންކާއަށް ކުރެއްވި ދަތުރު ނިންމަވާލައްވައި އެކްސް ގައި ކުރެއްވި ޕޯސްޓެއްގައި މުއިއްޒު ވިދާޅުވީ ދަތުރުގެ ސަބަބުން ދެ ގައުމުގެ ގުޅުން އިތުރަށް ވަރުގަދަވެގެންދާނެ ކަމަށެވެ.
ދަތުރުގައި ސްރީލަންކާއިން އަދާކުރި މެހެމާންދާރީއަށް ޝުކުރު އަދާކުރައްވައި މުއިއްޒު ވިދާޅުވީ ދެ ގައުމު ގުޅިގެން މަސައްކަތްކުރަން ބޭނުންވާ ކަމަށެވެ.
ލަންކާއަށް މުއިއްޒު ކުރެއްވި ދަތުރުގައި ޑިސަނަޔަކެގެ އިތުރުން އެ ގައުމުގެ އިސްވެރިންނާއި ބައްދަލުކުރައްވައި، އެކި ދާއިރާތަކުން ޖުމްލަ ހަތް އެމްއޯޔޫއެއްގައި ދެ ގައުމުން ސޮއިކުރި އެވެ.
ލަންކާ އާއި ރާއްޖެއާ ދެމެދު ސޮއިކުރި އެއްމޯޔޫތަކުގެ ތެރޭގައި ޑިފެންސް ދާއިރާއިން މީހުން ތަމްރީނު ކުރުމާއި ތައުލީމު ހާސިލު ކުރުމުގެ އިތުރުން އެ ދާއިރާއިން ދިރާސާތައް ކުރުމުގެ އެއްބަސްވުމަަކާއި ދެ ގައުމު ގުޅިގެން ޓެރަރިޒަމާ ދެކޮޅަށް މަސައްކަތް ކުރުމުގެ އެމްއޯޔޫއެއް ހިމެނެ އެވެ.
މީގެއިތުރުން ރީ ފަތުރުވެރިކަމުގެ ދާއިރާއިން ދެ ގައުމުގެ ގުޅުން ބަދަހި ކުރުމުގެ އެމްއޯޔޫއަކާއި ތައުލީމީ ދާއިރާއިން މީހުން ތަމްރީނު ކުރުމުގެ އެމްއޯޔޫއަކާއި ދެ ގައުމުގެ ތާރީހީ ލިޔެކިޔުންތައް އާކައިވް ކުރުމުގެ އެމްއޯޔޫއެއްގެ އިތުރުން ކުޅިވަރުގެ ދާއިރާއިން ޒުވާނުން ތަމްރީނު ކުރުމުގެ އެމްއޯޔޫއެއް އައު ކުރުމަށް ވެސް ދަތުރުގެ ތެރެއިން ސޮއިކުރި އެވެ.
