ރައީސް މުހައްމަދު މުއިއްޒު ސްރީ ލަންކާއަށް ކުރައްވާ ދަތުރާ ގުޅިގެން އެ ގައުމުގައި ދިރިއުޅޭ ބައެއް ދިވެހީންނަށް ފުލުހުން ބިރުދައްކައިފި އެވެ.
ލަންކާ ފުލުހުން ވަނީ ބައެއް ދިވެހިން ލައްވައި ސިންހަލަ ބަހުން އޮތް ގަނޑެއްގައި ސޮއި ކުރުވައިފަ އެވެ. އެ ގަނޑުގައި އޮންނަނީ ލަންކާގައި ދިރިއުޅޭ ދިވެހިންނާ މުއިއްޒު ބައްދަލު ކުރައްވާ ތަނެއް ނުދާނެ ކަމަށް އެއްބަސްވާ ކަމަށެވެ.
"އާންމުކޮށް ސޯސަންވިލާގެ އެއްވެސް ހަރުދަނާ އުސޫލެއް ނެތި ދޯހަޅިކޮށް ކަންތައް ކުރާތީ އެކެންކަން އިސްލާހު ކުރަން ބުނާތީ އަދި ކޮމިއުނިޓީއަށް ބޭނުންވާ ކަންކަން އެމްބަސީއިން ނުކޮށްދޭތީ އެ ވާހަކަ ދައްކާ މީހުން އެއީ،" ޗެނަލް-13 އަށް ދިން އިންޓަވިއުއެއްގައި ލަންކާގައި ދިރިއުޅޭ މީހަކު ބުންޏެވެ.
އޭގެ އިތުރުން، ބައެއް ދިވެހިންގެ ގޭގެއަށް ވެސް ލަންކާ ފުލުހުން ވަން ކަމަށްވެ އެވެ. އެ ގަތަކަށް ފުލުހުން ވަނީ ކޯޓު އަމުރެއް ވެސް ނުލައި ކަމަށްވެ އެވެ. ފުލުހުން އެގޮތަށް ވަން ބައެއް ގެތައް ބަލައިފާސް ކުރި ކަމަށް ވެސް ބައެއް މީހުން ބުންޏެވެ.
ރައީސް މުއިއްޒު ދިވެހިންނާ ބައްދަލު ކުރައްވަން ހަމަޖެހިފައި ވަނީ މިއަދު ހަވީރު 5:15 ގައި ހިލްޓަން ހޮޓަލް، ކޮލޮމްބޯގެ ދަ ގްރޭންޑް ބޯލް ރޫމްގަ އެވެ.
ލަންކާގައި ހުންނަ ދިވެހި އެމްބަސީ އިން އެންމެ ފުރަތަމަ ފޮނުވި ދައުވަތުގައި ބުނެފައި އޮތީ އެމްބަސީ އިން ބާއްވާ ހަރަކާތަކަށް ދައުވަތު އަރުވާ ކަމަށެވެ. އެކަމަކު އާންމުން ޝަކުވާ ބޮޑުވުމުން އެއީ މުއިއްޒު ބައިވެރިވަޑައިގަންނަވާ އިވެންޓެއް ކަމަށް ފަހުން ހާމަ ކުރި އެވެ.
ސްރީ ލަންކާއަށް ރައީސް ވަޑައިގަތީ މިދިޔަ އާދީއްތަ ދުވަހެވެ. އެނބުރި ވަޑައިގަތުމަށް ހަމަޖެހިފައި ވަނީ މިއަދުގެ ވަގުތެއްގައި ކަމަށްވެ އެވެ. އެމަނިކުފާނުގެ ދަތުރުގައި ދެ ގައުމުން ވަނީ ހަތް އެއްބަސްވުމެއްގައި ސޮއިކޮށްފަ އެވެ.
