ރާއްޖޭގެ ފުޓްބޯޅަ އަށް 75 އަހަރު ފުރުމުގެ ގޮތުން ކުޅޭ ޑައިމަންޑް ޖޫބިލީ އިންޓަނޭޝަނަލް މުބާރާތުގައި ގައުމީ ފުޓްބޯޅަ ޓީމުން ކުޅުނު ފުރަތަމަ މެޗުގައި 1-0 އިން އަފްގާނިސްތާން އަތުން ބަލިވި ނަމަވެސް، މެޗަށް ފަހު، ރާއްޖޭގެ ގައުމީ ޓީމުގެ މެދުގައި ވާހަކަ ދެކެވުނުއިރު، މުބާރާތުގެ ފައިނަލަށް ދިއުމުގެ ރޫހު ޓީމުތެރޭގައި އޮތްކަން އެނގުނު ކަމަށް ގައުމީ ކޯޗު އިސްތަވާން އުރްބާނީ ބުނެފި އެވެ.
ހަތަރު ގައުމުގެ މެދުގައި ކުޅޭ ޑައިމަންޑް ޖޫބިލީ މުބާރާތުގައި އިއްޔެ ހަވީރު ކުޅުނު މެޗުން ބަންގްލަދޭޝްގެ ޒުވާން ޓީމު ވަނީ ކުޅުންތެރިއަކު މަދުކޮށް މެޗު ނިންމާލަން ޖެހުނު ނަމަވެސް، 0-0 އިން ޕާކިސްތާނާ އެއްވަރުވެފަ އެވެ. ރޭ ރާއްޖޭން ކުޅުނު މެޗުގެ ފުރިހަަމަ ވަގުތު ހަމަވާން 10 މިނިޓަށް ވެފައި ވަނިކޮށް، އަފްގާނިސްތާނުން ޖެހި ގޯލާ އެކު އެ ޓީމު މޮޅުވި އެވެ. ދިހަ ދުވަހަށް ދިގު ދެމިގެންދާ ޑައިމަންޑް ޖުބިލީ މުބާރާތުގެ ފޯމެޓް އޮތްގޮތުން ލީގު ބުރެއް ކުޅުމަށް ފަހު، އެންމެ ނަތީޖާ ރަނގަޅު ދެ ޓީމެއް ފައިނަލަށް ދާނެ އެވެ.
ރޭގެ މެޗަށް ފަހު ބޭއްވި ނޫސްވެރިންގެ ބައްދަލުވުމުގައި އުރްބާނީ ބުނީ، ފުރަތަމަ މެޗުތަކަށް ބަލާއިރު، ޕާކިސްތާނާ ދެކޮޅަށް ބަންގްލަދޭޝްގެ ޒުވާން ޓީމުން ސާބިތުކޮށްދިނީ އެ ގައުމުގެ ފުޓްބޯޅަ ކުރިއަރަމުންދާ މިންވަރު ކަމަށެވެ. ދެން، ޕާކިސްތާނުން އެ މެޗުގައި އެ ޓީމުގެ ފިޒިކަލީ ވަރުގަދަ ކަމާއި ބައިނަލްއަގުވާމީ ލެވަލްގައި ޔޫރަޕް ހިމެނޭހެން އެކި ގައުމުތަކުގައި ކުޅޭ ކުޅުންތެރިންނާ އެކު ކުރިއަށްދާނެ ގޮތް ކަމަށާއި ހަމަ އެ ގޮތަށް އަފްގާނިސްތާނުން އެއީ ކޮން ލެވަލެއްގައި ކުޅޭނެ ޓީމެއްކަން ދައްކުވައިދިން ކަމަށެވެ.
ރާއްޖޭން ކުރިއަށްދާނީ މަސައްކަތް ފެށިފައިވާ ގޮތަށް ކަމަށާއި މިއީ ގިނަ މެޗުތަކެއް ކުޅެެގެން ބޭނުންވާ ހިސާބަށް ދެވޭނެ ކަމެއް ކަމަށް އުރްބާނީ ފާހަގަކުރި އެެވެ. އަދި، އަފްގާނިސްތާނާ ދެކޮޅަށް ކުޅުނީ ރާއްޖެ އަށް މޮޅުވެވޭނެ މެޗެއްކަން ވެސް އެނގޭ ކަމަށާއި ލިބުނު ގެއްލުމަކީ ހެދުނު ހަަމައެކަނި ގޯހާ އެކު ކޮޅަށް ގޯލެއް ވަދެ، ނަތީޖާ އިން ބަލިވުން ކަަމަށް އުރްބާނީ ވަނީ ބުނެފަ އެވެ.
"އެއް ކަމަކީ މެޗުގައި ކުޅެފައި އެ ހުންނަން ޖެހޭ ވަރުބަލިކަން. ދެން، އިމޯޝަނަލީ ބޫސްޓެއް އައުން، އެންމެ މުހިންމު މެސެޖަކީ، އަހަރެެމެން މެޗަށް ފަހު ދަނޑުގެ މެދަށް ދިޔައިރު، ކުޅުންތެރިން ވާހަކަ ދައްކަމުން ދިޔައީ ފައިނަލަށް ދެވޭނެ ގޮތާ މެދު، އެހެންވީމަ، އެކަން އެބަ ބޭނުންވޭ އެންމެން ވެސް،" އުރްބާނީ ބުންޏެވެ.
އުރްބާނީ ބާކީ މެޗުތަކުގައި ކުޅޭއިރު އެންމެން ބުނާނީ ކުޅެވޭނެ އެންމެ މޮޅަށް ކުޅުމަށް ކަމަށާއި އެކަމަކު، އޭނާ ވިސްނުން ބައްޓަން ކުރަން ބޭނުންވަނީ ކުރަން ޖެހޭ ކަންކަން ކުރަން ފޯކަސް ކުރުމަށް ކަމަށެވެ. އެ ގޮތުން، ރޭގެ މެޗުގައި ވެސް ކުޅެން ބޭނުންވާ ސްޓައިލާއި އައިޑެންޓިޓީގެ ތެރެއިން ކަންކަން ހާސިލްކުރެވުނު ކަމަށާއި އެ ގޮތުން، ޑިފެންޑަރަކަށް ކުޅުނު ހަސަން އީނާޒް ފަދަ ކުޅުންތެރިންނަށް މެޗުތަކުގައި ފުރުސަތު ދީގެން ކުރިއަށްދެވިދާނެކަން ފެނިގެންދިޔަކަން އުރްބާނީ ފާހަަގަކުރި އެވެ.
"މި ބަލިވި ގޮތް ވަރަށް ހިތްދަތި، ދެން، އެހެން ގޮތަކަށް މި މެޗުން ހާސިލްވި ކަންކަމުގެ ވިސްނުން ބައްޓަންކުރާނަމަ، އަހަރެން ވަރަށް ހިތްހަމަޖެހޭ ކުޅުންތެރިން އެ ކުރި މަސައްކަތް ފެނިފައި. އަހަރެން ބުނިން، ޔަގީންކަމާ އެކު ސީދާ ނަތީޖާއެއް ނެރުމަކީ ވާނެ ކަމެއް ނޫނޭ. އެކަމަކު ޔަގީންކަމާ އެކު ކޮންފިޑެންސް އޮވެގެން ރަނގަޅު ކުޅުމެއް ދައްކައިގެން ކުރިއަށްދެވޭނެއޭ،" އުރްބާނީ ބުންޏެވެ.
މިދިޔަ މާޗް މަހު އޭޝިއަން ކަޕް ކޮލިފައިންގައި ޓިމޯ ލެސްޓޭ އަތުން މޮޅުވި މެޗުގައި ނެރުނު ޓީމުގެ ފަސް މަގާމަކަށް ބަދަލުތަކެއް ގެނެސްގެން ރޭގެ މެޗުގައި ކުޅެން ޖެހުނުއިރު، އެކުގައި ކުޅެން އާ ޑިފެންޑަަރުންތަކެއް ލައިގެން ވެސް ކުރެވުނު މަސައްކަަތަކީ، މުސްތަގުބަލަށް ބަލާކަމަށްވާނަމަ ފައިދާކުރާނެ ކަމެއް ކަމަށް އުރްބާނީ ވަނީ ބުނެފަ އެވެ.
