ސާފް ވިމެންސް ޗެމްޕިއަންޝިޕްގައި ރާއްޖޭގެ ގައުމީ އަންހެން ފުޓްބޯޅަ ޓީމުން ކުޅުުނު ފަހު މެޗުގައި އެންމެ ފަހުން ދެ ފަަހަރުގެ ޗެމްޕިއަން، ބަންގްލަދޭޝް ކައިރީގައި ހިތްވަރުގަދަ ކުޅުމެއް ދައްކައިފި އެވެ.
ރާއްޖޭން ފަހަތުން އަރައި، 2-2 އިން އެއްވަރުކުރި މި މެޗުގައި ބަންގްލަދޭޝް ވަނީ 4-2 އިން މޮޅުވެފަ އެވެ.
ބަންގްލަދޭޝް އިން ވަނީ މީގެ ކުރިން ރާއްޖެއާ ދެކޮޅަށް ކުޅުނު ހުރިހާ މެޗަކުން ފަސޭހަ މޮޅެއް ހޯދައިފަ އެވެ. އެކަމަކު، މިރޭ ކުޅުނު މެޗުގައި ރާއްޖޭން ވަނީ ބަންގްލަދޭޝަށް ރަނގަޅު ޗެލެންޖެއް ދީފަ އެވެ. ސާފް ޗެމްޕިއަންޝިޕްގައި މީގެ ކުރިން ރާއްޖޭން ތިން ފަހަރު، ބަންގްލަދޭޝާ ކުޅުނެވެ. އެ ގޮތުން، 2014 ވަނަ އަހަރު، ބަންގްލަދޭޝް 3-1 އިން ރާއްޖެ ބަލިކުރިއިރު، 2017 ވަނަ އަހަރުގެ ސެމީ ފައިނަލުގައި 6-0 އިން ރާއްޖެ ބަލިކުރި އެވެ. އެންމެ ފަހުން، 2022 ވަނަ އަހަރު މި ދެ ޓީމު ކުޅުނު މެޗު ނިމުނީ، 3-0 އިން ބަންގްލަދޭޝް މޮޅުވެގެންނެވެ. އަދި، 2016 ވަނަ އަހަރުގެ ސައުތު އޭޝިއަން ގޭމްސްގެ ފުޓްބޯޅަ އިވެންޓްގައި ބަންގްލަދޭޝް އިން ވަނީ 2-0 އިން ރާއްޖެ ބަލިކޮށްފަ އެވެ.
އިންޑިއާގެ ގޯއާގައި ކުޅޭ، މި ފަހަރުގެ ސާފް ވިމެންސް ޗެމްޕިއަންޝިޕްގައި ރާއްޖޭން ކުޅުނު ފުރަތަމަ މެޗުގައި، އިންޑިއާ އަތުން ވަނީ 11-0 އިން ބަލިވެފަ އެވެ. ދެ ވަނަ މެޗަށް ރާއްޖޭން މިރޭ ނުުކުމެ، ބަންގްލަދޭޝާ ދެކޮޅަށް ރަނގަޅު ކުޅުމެއް ދެއްކި އެވެ.
ގޯއާގެ ޖަވާހަރްލާލް ނެހްރޫ ސްޓޭޑިއަމްގައި ކުޅުނު މެޗު ފަށައިގެން ފުރަަތަަމަ މިނިޓްގައި، ބަންގްލަދޭޝް އިން ވަނީ ލީޑުނަގައިފަ އެވެ. އެ ގޮތުން، މި ލަނޑު ޖެހީ އަނީކާ ރާނިއާ ސިއްދީގު އެވެ. ދެ ވަނަ ލަނޑު ޖަހަން ބަންގްލަދޭޝް އިން ގިނަ މަސައްކަތްތަކެއް ކުރި ނަމަވެސް ރާއްޖޭގެ ގޯލު ބަލަހައްޓަމުން އައި ކީޕަރު، ފާތިމަތު ސައުޝަން ވަނީ ބަންގްލަދޭޝްގެ ރަނގަޅު ހަމަލާތަކެއް ހުއްޓުވައިފަ އެވެ. މެޗުގައި ބަންގްލަދޭޝް އިން ދެ ވަނަ ލަނޑު ޖެހީ، 34 ވަނަ މިނިޓްގައި އުމޭލާ މަރްމާ އެވެ.
ފުރަތަމަ ހާފު ނިމުމުގެ ކުރިން، ރާއްޖޭން ވަނީ މުބާރާތުގައި ފުރަތަމަ ފަހަރަށް ލަނޑެއް ޖަހައި، މެޗުގައި ފަރަގު ކުޑަކޮށްފަ އެވެ. އެ ގޮތުން، 43 ވަނަ މިނިޓްގައި މި ލަނޑު ޖެހީ، މަރިޔަމް ނޫރާ އެވެ. އަދި، ދެ ވަނަ ހާފު ފަށައިގެން ވެސް ރަނގަޅު ކުޅުމެއް ދައްކައި، މެޗުގެ 57 ވަނަ މިނިޓްގައި އައިމިނަތު ފަޒްލާ ވަނީ ލަނޑު ޖަހައި، ރާއްޖެ އަށް އެއްވަރުކޮށްދީފަ އެވެ.
ރާއްޖޭން ނަތީޖާ ހަމަހަމަކުރިތާ ހަތް މިނިޓް ފަހުން، މެޗުގެ 64 ވަނަ މިނިޓްގައި ބަންގްލަދޭޝް އިން އަލުން ލީޑުނެގި އެވެ. މި ލަނޑު ޖެހީ، ސޯރަވީ އަކަންދާ ޕްރިތީ އެވެ. އަދި، މެޗުގައި ބަންގްލަދޭޝްގެ ފަހު ލަނޑު ޖެހީ އިތުރު ވަގުތުގެ ފަސް ވަނަ މިނިޓްގައި، ކޮހާތީ ކިސްކޫ އެވެ.
ސަތާރަ އަހަރުން ދަށުގެ ގައުމީ ފުޓްބޯޅަ ޓީމުގެ ކޯޗު، ސޮބާހު މުހައްމަދު (ސޮބާ)، ގައުމީ އަންހެން ޓީމާ ހަވާލުވެ، ކުރު މުއްދަތެއްގައި ކުރި މަސައްކަތުން ދެ މެޗަށް ބަލާއިރު، ގައުމީ އަންހެން ޓީމުގެ ފަރާތުން މެޗުން މެޗަށް ވަނީ ކުރިއެރުން ފެނިފަ އެވެ.
