ޕަންޖާބް، އިންޑިއާ (މެއި 28) - ފަނަރަ އަހަރުގެ ވައިބަވް ސޫރްޔަވަންޝީ، އިންޑިއަން ޕްރިމިއާ ލީގު (އައިޕީއެލް)ގެ އެއް ސީޒަނެއްގައި އެންމެ ގިނައިން ހަޔަކަށް ޖަހައިގެން ހެދި ރެކޯޑާ އެކު، 47 ލަނޑުން ސަންރައިޒާސް ހައިދަރުއާބާދު ބަލިކޮށް ރާޖަސްތާން ރޯޔަލްސް އިން ފައިނަލުގެ ޖާގައެއް ހޯދުމަށް ކޮލިފަޔާ 2 ގެ ޖާގަ ހޯދައިފި އެވެ.
ހުކުރު ދުވަހުގެރޭ ކޮލިފަޔާ 2 ގައި، ރާޖަސްތާނުން ކުޅޭނީ ކޮލިފަޔާ 1 އިން ބަލިވި ގުޖުރާތު ޓައިޓަންސްއާ ދެކޮޅަށެވެ. ގުޖުރާތު އަތުން ކޮލިފަޔާ 1 ގައި މޮޅުވެ، އެންމެ ފަހުގެ ޗެމްޕިއަން، ރޯޔަލް ޗެލެންޖާސް ބެންގަލޫރު (އާރްސީބީ) ވަނީ އާދިއްތަ ދުވަހުގެ ފައިނަލުން ޖާގަ ހޯދައިފަ އެވެ. ފައިނަލުގައި، ބެންގަލޫރާ ކުޅޭނީ ގުޖުރާތާއި ރާޖަސްތާން ކުޅެގެން މޮޅުވާ ޓީމެކެވެ.
މި ފަހަރުގެ އައިޕީއެލް ސީޒަނުގައި އެންމެ ގިނަ ލަނޑު ހެދުމުގެ ރެކޯޑް އޮތީ ރޭ 29 ބޯޅައިން 97 ލަނޑު ހެދި ސޫރްޔަވަންޝީ އަތުގަ އެވެ. މި މެޗުގައި، އޭނާ ވަނީ ބެންގަލޫރުގެ ކުރީގެ ތަރި، ކްރިސް ގޭލް، 2012 ވަނަ އަހަރު ހެދި ރެކޯޑެއް މުގުރާލައިފަ އެވެ. އެ ގޮތުން، ގޭލް ރެކޯޑް ހެދީ އެއް ސީޒަނެއްގައި 59 ބޯޅަ ހަޔަކަށް ޖަހައިގެންނެވެ. އެ ރެކޯޑް މުގުރާލީ ސޫރްޔަވަންޝީ އެވެ. އެއީ، ރޭގެ މެޗުގައި 12 ބޯޅަ ހަޔަކަށް ޖަހައި، މި ސީޒަނުގައި ޖުމްލަ އެކު، 65 ބޯޅަ ހަޔަކަށް ޖަހައިގެންނެވެ.
މަހަރާޖާ ޔަދަވިންދުރަ ސިންގް އިންޓަނޭޝަނަލް ކްރިކެޓް ސްޓޭޑިއަމްގައި ކުޅުނު މެޗުގައި، ހައިދަރުއާބާދުން ޓޮސް ދިމާވުމުން ނިންމީ ހޮވާށެވެ. ރާޖަސްތާނުން ކުޅެން އަރައި، ސޫރްޔަވަންޝީ ތަފާތު ދެއްކިއިރު، 21 ބޯޅައިން 50 ލަނޑު ހެދި ދްރޫވް ޖުރެލްގެ ތަފާތާ އެކު، އެ ޓީމުން ވަނީ މި އިނިންސްގައި، 20 އޯވަރުން އަށް ކުޅުންތެރިން ނުބައިވެގެން 243 ލަނޑު ހަދައިފަ އެވެ.
ޖަވާބުގައި ކުޅެން އަރައި، ހައިދަރުއާބާދަށް 19.2 އޯވަރުގެ ތެރޭގައި ހުރިހާ ކުޅުންތެރިން ނުބައިވެގެން ހެދުނީ 196 ލަނޑެވެ. މި އިނިންސްގައި، ރާޖަސްތާންގެ އިނގިރޭސި ބޯލަރު، ޖޯފްރާ އާޗާ ވަނީ ހަތަރު އޯވަރަށް ތިން ވިކެޓް ނަގައިފަ އެެވެ.
ރާޖަސްތާނަކީ، 2008 ވަނަ އަހަރު އައިޕީއެލް ބޭއްވި ފުރަތަމަ ސީޒަނުގެ ޗެމްޕިއަނެވެ. އޭގެ ފަހުން އެ ޓީމަށް އައިޕީއެލް ކާމިޔާބުކުރެވިފައިނުވާއިރު، މި ސީޒަނުގައި އެ ޓީމަކީ މުބާރާތް ކާމިޔާބު ކުރާނެ ކަމަށް ގުނާ ފޭވަރިޓެކެވެ.
