ވާވު އަތޮޅު ދެވަނަ ކަނޑުގެ އަޑީގައި ހުންނަ ހޮހޮޅައެއްގައި ތާށިވެފައި ތިބި ކަމަށް ބެލެވޭ އިޓަލީގެ ހަތަރު ޑައިވަރުންގެ ހަށިގަނޑު ލޮކޭޓު ކުރެވިފައިވާ ކަމަށް އެމްއެންޑީއެފްއިން ހާމަކޮށްފި އެވެ.
ދެވަނަ ކަނޑު އަޑީގައި އޮތް ހޮހޮޅައިގައި މި ޓޫރިސްޓުން ތާށިވީތާ މިއަދަށް ހަތަރު ދުވަސްވެފައިވާއިރު، އެ މީހުންގެ ހަށިގަނޑުތައް ނެގުމުގެ މަސައްކަތް ކުރިއަށް ހުރި ޑައިވްތަކުގައި ކުރާނެ ކަމަށް ސިފައިން ބުނެ އެވެ. ދެ ދުވަހުގެ މެދުކެނޑުމަކަށް ފަހު ރެސްކިއު އޮޕަރޭޝަން އަލުން ފެށީ މިއަދު އެވެ.
ފުލުހުންގެ ޚިދުމަތާއި އަދި އިޓަލީ ސަރުކާރުން ހަމަޖެއްސި ބޭރުގެ ތަޖުރިބާކާރު ޑައިވަރުން ގުޅިގެން މިއަދު ހިންގި އޮޕަރޭޝަނުގައި، އެމީހުންގެ ހަށިގަނޑުތައް ވަނީ ލޮކޭޓްކުރެވިފައި. އްލުނު 4 ފަތުރުވެރިންގެ ހަށިގަނޑު ފެނިފައިވަނީ އެމީހުން ޑައިވް ކުރި ކޭވް (ހޮހަޅަ) ތެރެއިން،" އެމްއެންޑީއެފްއިން ބުނެފައިވެ އެވެ.
ރިކަވަރީ އޮޕަރޭޝަން އަލުން ފެށިއިރު، މި އޮޕަރޭޝަން ލީޑުކުރަނީ އިޓަލީ ސަރުކާރު މެދުވެރިވެގެން ރާއްޖެ ފޮނުވި ފިންލެންޑުގެ ތަޖުރިބާކާރު ކޭވް ޑައިވަރުންގެ ޓީމުންނެވެ. މި ޓީމުގައި އިސްކޮށް ހުރި ސާމީ ޕާކަރިނެން އަދި އެ ޓީމުގައި ހިމެނޭ ޕެޓްރިކް ގްރޮންކްވިސްޓަކީ ކޭވް ޑައިވިންއަށް ޝައުގުވެރިކަން ހުންނަ އެންމެންނަށް އެނގޭ، ނުރައްކާތެރި ރިކަވަރީ އޮޕަރޭޝަންތަކުގެ ތަޖުރިބާ ހުރި ދެ މީހުންނެވެ.
މިހާތަނަށް ނެގިފައިވަނީ މި ޓޫރިސްޓުންގެ ޓީމު ގޮވައިގެން އަޑިއަށް ދިޔަ ޑައިވު ޓީމް ލީޑަރު ޖިއަންލޫކާ ބެނެޑެއްޓީގެ ހަށިގަނޑު އެކަންޏެވެ. އޭނާގެ ހަށިގަނޑު ފެނުނީ، ޑައިވަރުން ގެއްލުނު ދުވަހު ފުރަތަމަ ކުރި ޑައިވުތަކުގައި، 60 މީޓަރު ފުނުގައި ހުރި ހޮހޮޅައިގެ އަނގަ މަތިން ކަމަށް މައުލޫމާތު ލިބެ އެވެ.
މި ހާދިސާ އާއި ރެސްކިއު އޮޕަރޭޝަންގައި ހަ މީހުން ވަނީ މަރުވެފަ އެވެ. އެއީ އިޓަލީގެ ފަސް ޑައިވަރުންގެ އިތުރުން ރެސްކިއު އޮޕަރޭޝަންގައި ހަރަކާތްތެރި ވަނިކޮށް ނިޔާވި ސްޓާފް ސާޖަންޓު މުހައްމަދު މަހުދީ އެވެ.
އެ ހާދިސާއާ ގުޅިގެން ސާޗް އެންޑް ރިކަވަރީ އޮޕަރޭޝަނުގައި ބައިވެރިވާ ދިވެހި ސިފައިންގެ ޑައިވަރުން 30 މީޓަރަށް ވުރެ ފުނަށް ނުދާ ގޮތަށް ވަނީ ނިންމާފަ އެވެ.
ފިންލެންޑުގެ ޑައިވަރުންގެ ޓީމާއެކީ ކަނޑުއަޑީގެ ދިރާސާތައް ކުރެވޭ އާރުއޯވީ ފަދަ ވަސީލަތްތައް ގެންގުޅޭ ދިވެހި ދެ ކުންފުންޏަކުން އަންނަނީ އެ މީހުންގެ ތަކެތި އޮޕަރޭޝަނަށް ފޯރުކޮށްދެމުންނެވެ. ދިވެހި ސިފައިން ހަރަކާތްތެރިވަނީ ސަޕޯޓު ސްޓޮޕުތަކުގައި، އެެހީތެރިންގެ ގޮތުގަ އެވެ.
މި ހާދިސާއާއެކީ ރާއްޖޭގައި ފީނުމުގެ ސަލާމަތާއި ރައްކާތެރިކަމާއި ގަވާއިދުތަކަށް ބޯނުލެނބުމާއީ ސަލާމަތީ ހިދުމަތްތަކުގެ ގާބިލިއްޔަތުކަމާއި ރެސްކިޔު އޮޕަރޭޝަންތަކުގައި ގޮތް ނިންމާ ގޮތާ ބެހޭ އުނދަގޫ ބަހުސެއް ވަނީ ފެށިފަ އެވެ.
