އަންހެން ކުއްޖަކު ބްލެކްމެއިލް ކުރުމަށްޓަކައި އެ ކުއްޖާގެ ފޮޓޯ އާއި ވީޑިއޯ ހޯދައިދިނުމަށް ސަރުކާރު ހިންގާ މައި ޕާޓީ، ޕީއެންސީގެ މެންބަރަކު އެދުނު ކަމަށް ބުނެ ރައްޔިތުންގެ މަޖިލީހުގެ ވެލިދޫ ދާއިރާގެ މެންބަރު މުހައްމަދު އައްބާސް ބޮޑު ތުހުމަތެއް ކުރައްވައިފި އެވެ.
އައްބާސް އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި މިދިޔަ ރަމަޟާން މަހުގެ ތެރޭގައި ޕީއެންސީގެ މެންބަރަކު އޭނާއަށް ގުޅުއްވައި، ވަކި އަންހެން ކުއްޖަކު ދިރިއުޅޭ އެޕާޓްމަންޓް ބިލްޑިންގާއި އުޅޭ ފްލޯ އެނގޭތޯ ސުވާލު ކުރި އެވެ.
އެ ސުވާލުގެ ޖަވާބުގައި އެކަން ނޭނގޭ ކަމަށާއި އެއީ ކާކު ބުނެގެން ކުރާ ކަމެއްތޯ އައްބާސް ސުވާލު ކުރެއްވުމުން، އެއީ އޭނާގެ އަންހެނުން ބުނެގެން ބަލާލީ ކަމަށް ބުނި ކަމަށެވެ.
އެ ގުޅި މީހާ އިތުރަށް އެދިވަޑައިގަތީ އެ އަންހެން ކުއްޖާ ބްލެކްމެއިލް ކުރުމަށްޓަކައި ބޭނުންވާނެ ފޮޓޯ ނުވަތަ ވީޑިއޯއެއް ހޯދައިދިނުމަށް ކަމަށް އައްބާސް ވިދާޅުވިއެވެ.
އެކަމަށް ބޭނުންވާނެ ހުރިހާ އާލާތްތަކާއި ފަންޑު ވެސް ހަމަޖައްސައިދޭނެ ކަމަށް ބުނި ކަމަށާއި ނަމަވެސް އެއީ އޭނާއަށް ކުރެވޭނެ ކަމެއް ނޫން ކަމަށް ވިދާޅުވެ އެކަމަށް އިންކާރު ކުރެއްވި ކަމަށް އައްބާސް ވިދާޅުވިއެވެ.
އެމަންޖެ ދިރިއުޅޭ އެޕާޓްމަންޓު ބިލިޑިންގް އާ އުޅޭ ފުލޯ އެގޭތޯ ބަލަން މިދިޔަ ރަމަޟާން މަހުގެ ތެރޭގައި މެޖޯރިޓީ ޕާޓީގެ މަޖުލީސް މެންބަރަކު އަޅުގަނޑަށް ގުޅުއްވާ އެއްސެވ. ޖަވާބުގައި އަޅުގަނޑު ބުނިން އަޅުގަނޑަށް ނޭނގޭ ވާހަކައާ ކިހިނެތްވީތޯ ކާކު ބުނުއްވައިގެންތޯ. ޖަވާބުގައި ވިދާޅުވި އޭނަގެ އަންހެނުން ބުނެގެން ބަލަނީކަމަށް. އޭގެ ފަހުގައި މެންބަރު އަޅުގަނޑު ކައިރީގައި އެއްސެވީ އެމަންޖެ ބުލެކްމެއިލް ކޮށްލުމަށް ފޮޓޯއެއް ނުވަތަ ވީޑިއޯއެއް ހޯދައި ދިނުމަށް. އެކަމަށް ބޭނުންވާނެ އާލާތްތަކާ ފަންޑު ދެއްވާނެ ކަމަށް ވިދާޅުވި. ޖަވާބުގައި އަޅުގަނޑު ބުނިން އަޅުގަނޑަކަށް ނުވާނޭ. އެބޭފުޅަކާ އެވާހަކަތައް އަޅުގަނޑު ދެއްކިއިރު އަޅުގަނޑުގެ އަބިމީހާ އަޅުގަނޑު ކައިރީގައި އިންނާނެ. އެމީހުން އެކަމުން ސަލާމަތްވާން ނުވަތަ އޭނަ ކުރި މުޑުދާރު ކަންތައް ސިއްރު ކުރުމަށް އެމަންޖެ ބުލެކްމެއިލް ކުރަން އުޅޭކަން އެމަންޖެއަށް އެވަގުތު ގުޅާ އަޅުގަނޑު އަންގާފައި ވާނީ. އޭނަ ނުކުރާ ކަމެއްނަމަ ކޮންތެޅުމެއް އެތެޅުނީ؟މުހައްމަދު އައްބާސް
އައްބާސް އިތުރަށް ވިދާޅުވީ މި މުއާމަލާތް ހިނގި ވަގުތު އޭނާގެ އަނބިމީހާ ވެސް ކައިރީގައި އިިން ކަމަށެވެ. އަދި އެ މީޙުން ރަން އުޅޭ ކަންތައްތަކުން ސަލާމަތްވުމަށާއި، އެ މީހުން ކުރި "މުޑުދާރު" ކަންތައްތައް ސިއްރު ކުރުމަށްޓަކައި އެ އަންހެން ކުއްޖާ ބްލެކްމެއިލް ކުރަން އުޅޭކަން އެ ވަގުތުން ވަގުތަށް އެ ކުއްޖާއަށް ގުޅައި ކިޔައިދީފައިވާނެ ކަމަށް ވެސް އައްބާސް ވިދާޅުވިއެވެ.
ނަމަވެސް އެއީ ކޮން އަންހެން ކުއްޖެއްކަން އައްބާސް ވުދާޅެއް ނުވެ އެވެ.
