ރިއޯ ޑި ޖަނެއިރޯ، ބްރެޒިލް (މެއި 15) - ބްރެޒިލްގެ ކޯޗަކަށް ހުރި އިޓަލީގެ ތަަޖުރިބާކާރު ކޯޗު، ކާލޯ އަންޗެލޮޓީއާ އެކު، ހަދާފަައިވާ ކޮންޓްރެކްޓް 2030 ވަނަ އަހަރުގެ ފީފާ ވޯލްޑް ކަޕްގެ ނިޔަލަށް އާ ކޮށްފި އެވެ.
އަންޗެލޮޓީ އަކީ ފާއިތުވި 100 އަހަރު ތެރޭ ބްރެޒިލް ގައުމީ ޓީމަށް ކޯޗުކޮށްދޭ އެ ގައުމަށް ނިސްބަތްނުވާ ފުރަތަމަ ފުލްޓައިމް ކޯޗެވެ. އޭނާ އެ މަގާމާ ހަވާލުވީ މިދިޔަަ އަހަރުގެ މެއި މަހު އެވެ. އެއީ، ރެއާލްގެ ކޯޗުކަން ދޫކޮށްލުމަށް ފަހު އެވެ. އަންނަ މަހު އެމެރިކާ، މެކްސިކޯ އަދި ކެނަޑާގައި ބާއްވާ ފީފާ ވޯލްޑް ކަޕަށް ބްރެޒިލް ގެންގޮސްދިން އަންޗެލޮޓީގެ ކޮންޓްރެކްޓް ކުރިން އޮތީ އެ މުބާރާތުގެ. ނިޔަލަށެވެ.
އެކަމަކު، ބްރެޒިލް ފުޓްބޯޅަ ފެޑެރޭޝަން އިން ނިންމާފައިވަނީ އިތުރު ހަަތަރު އަހަރު އަންޗެލޮޓީއާ އެކު ކުރިއަށްދިއުމަށެވެ.
"ފުރަތަމަ މިނިޓުން ފެށިގެން އަހަންނަށް ވިސްނުނު ފުޓްބޯޅަ އަކީ މި ގައުމަށް ކިހާ މުހިންމު ކަމެއް ކަން، މިދިޔަ އަހަރެއްހާ ދުވަަހު މި ގައުމުގައި، ބްރެިޒިލް ގައުމީ ޓީމާ އެކު ކުރެވުނު މަސައްކަތުން މި ބަލަނީ އަލުން ދުނިޔޭގެ އެއް ވަނަ އަށް ދާން،" އަންޗެލޮޓީ، 66، ބުންޏެވެ.
އޭނާ ބުނީ، އިތުރު ހަތަރު އަަހަރު އެ މަގާމުގައި ހުންނަން ނިންމީ، ދުރު ވިސްނުމަށް ބަލައި ވެސް ކަންތައްތަކެއް ކުރަން ޖެހޭތީ ކަމަށާއި ބްރެޒިލް ފުޓްބޯޅަ ފެޑެރޭޝަނުން އޭނާ އަށް އިތުބާރު ކުރަން ނިންމީތީ ވަރަށް ހިތްހަމަޖެހޭ ކަމަށެވެ.
ބްރެޒިލާ ހަވާލުވެ، އަންޗެލޮޓީ ވަނީ މިހާތަނަށް އެ ޓީމަށް 10 މެޗުގައި ކޯޗުކޮށްދީފަ އެވެ. ފަސް މެޗުން މޮޅުވިއިރު، ދެ މެޗުން އެއްވަރުވެ، ތިން މެޗުން ވަނީ ބަލިވެފަ އެވެ.
ފަސް ފަހަރު ވޯލްޑް ކަޕްގެ ޗެމްޕިއަންކަން ހޯދާފައިވާ ބްރެޒިލުން އެންމެ ފަހުން މުބާރާތް ކާމިޔާބުކުރީ 2002 ވަނަ އަހަރު އެވެ. މި ފަހަރުގެ ވޯލްޑް ކަޕަށް ބްރެޒިލުން އެކުލަވާލާ ސްކޮޑު، ކުރިއަށް އޮތް ތިން ދުވަސް ތެރޭ އިއުލާނުކުރާން ނިންމާފައިވާއިރު، ބްރެޒިލުން ވޯލްޑް ކަޕްގައި ކުޅޭ ފުރަތަމަ މެޗު އޮތީ އަންނަ މަހުގެ 13 ވަނަ ދުވަހު، މޮރޮކޯއާ ދެކޮޅަށެވެ.
ދެން، އެ ގްރޫޕްގައި ބްރެޒިލް ކުޅެން ޖެހޭނީ ހައިޓީ އާއި ސްކޮޓްލެންޑާ އެވެ.
