މަޝްހޫރު ލަވަކިޔުންތެރިޔާ ދުއާ ލިޕާގެ ފޮޓޯއެއް، އެމެރިކާގައި ޓީވީ ވިއްކުމަށްޓަކައި ގާނޫނާ ހިލާފަށް ބޭނުންކުރި ކަމަށް ބުނެ، ދެކުނު ކޮރެއާގެ ސެމްސަންގް ކުންފުންޏާ ދެކޮޅަށް އޭނާ ދައުވާކޮށްފި އެވެ.
ދުއާ ލިޕާގެ ވަކީލުން މިދިޔަ ހުކުރު ދުވަހު އެމެރިކާގެ ކެލިފޯނިއާގެ ކޯޓަކަށް ހުށަހެޅި މި ދައުވާގައި ބުނެފައިވަނީ، ސެމްސަންގް ކުންފުނިން ޓީވީ ބަންދުކޮށްފައި ހުންނަ ކާޑުބޯޑު ފޮށިތަކުގައި، އޭނާގެ ތަަސްވީރާއި ސިފަ، ހުއްދައަކާ ނުލައި ވިޔަފާރީގެ މަންފާއަށްޓަކައި ބޭނުންކުރަމުންދާ ކަމަށެވެ.
މިކަމާ ގުޅިގެން ސެމްސަންގް ކުންފުނިން ނެރުނު ބަޔާނެއްގައި ބުނެފައިވަނީ، އެ ކުންފުނީގެ ހިލޭ ސްޓްރީމިން ހިދުމަތް ކަމަށްވާ "ސެމްސަންގް ޓީވީ ޕްލަސް" އަށް ކޮންޓެންޓް ފޯރުކޮށްދޭ ތިންވަނަ ފަރާތަކުން އެ ލަވަކިޔުންތެރިޔާގެ ފޮޓޯ އެ ކުންފުންޏަށް ދީފައިވާ ކަމަށެވެ.
އެ ފޮޓޯ ބޭނުންކުރީ، ޓީވީ ފޮށިތަކުގައި ބޭނުންކުރުމުގެ ހުއްދަ ހިމެނޭހެން، ހުރިހާ ހުއްދައެއް ލިބިފައިވާ ކަމުގެ ފުރިހަމަ ޔަގީންކަން ކޮންޓެންޓް ޕާޓްނަރުގެ ފަރާތުން ލިބުމުން ކަމަށް އެ ބަޔާނުގައިވެ އެވެ. އަދި ދުއާ ލިޕާގެ ޓީމާއެކު ވާހަކަދައްކައިގެން މި މައްސަލައަށް ބިނާކުރަނިވި ހައްލެއް ހޯދުމަށް އެ ކުންފުނިން މަސައްކަތް ކުރަމުންދާ ކަމަށްވެސް ބުނެފައިވެ އެވެ.
ކޯޓަށް ހުށަހެޅި ލިޔެކިޔުންތަކުގައި، ހައި ޑެފިނިޝަން (އެޗްޑީ) ޓީވީއެއް ބަންދުކޮށްފައިވާ ފޮށީގެ ފޮޓޯއެއް ހިމަނާފައިވެ އެވެ. އެ ފޮށީގައިވާ ޓީވީ ސްކްރީނުން ފެންނަ ފޮޓޯތަކުގެ ތެރެއިން އެންމެ ބޮޑަށް ފެންނަން ހުރީ ދުއާ ލިޕާގެ މޫނުގެ ބައެކެވެ.
"ދުއާ ލިޕާ - ބެކްސްޓޭޖް އެޓް އޮސްޓިން ސިޓީ ލިމިޓްސް، 2024" ގެ ނަމުން ނަންދީފައިވާ މި ފޮޓޯއަކީ އެމެރިކާގެ ކޮޕީރައިޓް އޮފީހުގައި ރަޖިސްޓްރީކޮށްފައިވާ، ދުއާ ލިޕާގެ އަމިއްލަ މިލްކެއް ކަމަށް ދައުވާގައި ބަޔާންކޮށްފައިވެ އެވެ.
މި ދައުވާގައި ދުއާ ލިޕާ މިހާރު ވެސް ކުރިއަށްގެންދާ ވިޔަފާރީގެ ބޮޑެތި އެއްބަސްވުންތައް ފާހަގަކޮށްފައިވެ އެވެ. އޭގެ ތެރޭގައި ޕޫމާގެ ގްލޯބަލް ބްރޭންޑް އެމްބެސެޑަރުކަމާއި، ވާސާޗޭ އަދި އީވް ސަން ލޯރެންޓް ފަދަ ބްރޭންޑްތަކުގެ ކެމްޕޭންތަކުގެ އިތުރުން ޕޯޝޭ، އެޕަލް، ޝެނެލް، ނެސްޕްރެސޯ، ބަލްގަރީ އަދި ޓިފަނީ އެންޑް ކޯ ފަދަ މަޝްހޫރު ކުންފުނިތަކާއެކު އޭނާ ކުރާ މަސައްކަތްތައް ހިމެނެ އެވެ.
ދުއާ ލިޕާއަކީ ވިޔަފާރީގެ ބައިވެރިން އިޚްތިޔާރުކުރުމުގައި ވަރަށް ބޮޑަށް ބަލާ ފަރާތެއް ކަމަށާއި، އޭނާގެ ބްރޭންޑް ކުރިއަރުވަނީ ވަރަށް ފެންވަރު މަތީ ސްޕޮންސަޝިޕްތަކުގެ ޒަރީއާއިން ކަމަށް ދައުވާގައި ބުނެފައިވެ އެވެ. އަދި އޭނާ ގެންގުޅޭ މި ސިޔާސަތުގެ ދަށުން، ސެމްސަންގްގެ މި އުފެއްދުންތައް އިޝްތިހާރު ކުރުމަށް އޭނާގެ ނަމާއި ސިފަ ބޭނުންކުރުމުގެ ހުއްދަ އެއްވެސް ހާލެއްގައި ނުދޭނެ ކަމަށް ވެސް ބުނެފައިވެ އެވެ.
މި ދައުވާގައި ދުއާ ލިޕާ އެދިފައި ވަނީ ސެމްސަންގުން އޭނާގެ ފޮޓޯ ބޭނުންކުރުން ދާއިމީކޮށް ހުއްޓުވައިދިނުމަށާއި، ލިބުނު ގެއްލުމުގެ ބަދަލުގެ ގޮތުގައި މަދުވެގެން 15 މިލިއަން ޑޮލަރު ނަގައިދިނުމަށެވެ.
