ރައީސް މުހައްމަދު މުއިއްޒުއާ ޖެހިވަޑައިގެންނެވި މައްސަލައެއްގައި ކެބިނެޓުން އިސްތިއުފާ ދެއްވަން އުޅުނު ވާހަކަ މާލީ ވަޒީރު މޫސާ ޒަމީރު ދޮގު ކުރައްވައިފި އެވެ.
އަދަދު އާ ވާހަކަ ދެއްކި ސަރުކާރުގެ ބައެއް އޮފިޝަލުން ވިދާޅުވި ގޮތުގައި ޒަމީރު އިސްތިއުފާ ދެއްވަން އުޅުއްވީ، ލޯކަލް ކައުންސިލުގެ އިންތިހާބާއި ފެންނަ ނުފެންނަ ވޯޓުން ސަރުކާރަށް ލިބުނު ނާކާމިޔާބީއަށްފަހު ބޭއްވި ބައްދަލުވުމެއްގައި ޖެހުނު މައްސަލައެއްގެ ސަބަބުންނެވެ.
ނަމަވެސް އެކަމާ ގުޅޭ ގޮތުން މި ނޫހުން ސުވާލު ކުރުމުން ޒަމީރު އިއްޔެ ވިދާޅުވީ އޭނާ ކެބިނެޓުން އިސްތިއުފާ ދެއްވަން އުޅުނު ވާހަކައަކީ ދޮގެއް ކަމަށެވެ.
"އެއީ ދޮގެއް،" އިނގިރޭސިބަހުން މި ނޫހުގެ ނޫސްވެރިޔަކަށް ފޮނުއްވި މެސެޖެއްގައި ޒަމީރު ވިދާޅުވި އެވެ.
ޒަމީރު އާއި މުއިއްޒުއާ މައްސަ ޖެހުނީ އިންތިހާބުގެ ބަލިން އިބުރަތެއް ލިބިގަތުން މުހިންމު ކަމަށް އޭނާ ރައީސްއަށް ދެންނެވުމުން ކަމަށް ކަމުގެ މައުލޫމާތު އެނގޭ މަސްދަރުތަކުން ބުނެ އެވެ.
އިންތިހާބުގެ ނާކާމިޔާބީއިން ފިލާވަޅެއް ލިބިގަތުމަށް ޒަމީރު ދެންނެވުމުން، އެ ވާހަކަ ގަބޫލު ނުކުރައްވައި، އެއީ ސަރުކާރަށް ލިބުނު ބޮޑު ބައްޔެއް ކަމަށް ވިދާޅުވެ ރައީސް މުއިއްޒު، ޒަމީރަށް ހަރުކަށި ރައްދެއް ދެއްވި ކަމަށް މަސްދަރުތަކުން ބުނެ އެވެ.
ޒަމީރު އިސްތިއުފާ ނުދެއްވަން ނިންމީ ރައީސް މުއިއްޒު މައާފަށް އެދިވަޑައިގަތުމުން ކަމަށް ވެސް މަސްދަރުތަކުން ޔަގީންކޮށްދެ އެވެ.
ކުރިން ހާރިޖީ ވަޒީރުގެ މަގާމުގައި ހުންނެވި ޒަމީރު ވަނީ މި ސަރުކާރުގައި ވަރަށް މުހިންމު މަސައްކަތްތަކެއް ދައުލަތަށް ކޮށްދެއްވައިފަ އެވެ. އެގޮތުން، މުއިއްޒާއި ސަރުކާރުގެ ޑެޕިއުޓީ މިނިސްޓަރުންތަކެއް އިންޑިއާއަށް ފުރައްސާރަ ކުރުމުން ޖެހުނު މައްސަލަތައް ހައްލު ކުރަން ޒަމީރު އިސް ދައުރެއް އަދާކުރެއްވި އެވެ.
އޭގެ އިތުރުން، މި ހިނގާ އޭޕްރީލް 2، ގައި ސުކޫކަށް ދައްކަންޖެހުނު 524.68 މިލިއަން އެމެރިކާ ޑޮލަރު އެކީ އެއްފަހަރާ ދެއްކުމުގެ މާސްޓާމައިންޑް އަކީ ވެސް ޒަމީރު ކަމަށް ވަރަށް ގިނަ ބަޔަކު ބުނެ އެވެ.
