ރިއޯ ޑި ޖަނެއިރޯ (މެއި 7) - ބްރެޒިލްގެ ކުރީގެ މަޝްހޫރު ތަރި ރޮބީނިއޯގެ ދަރިފުޅު، ރޮބީނިއޯ ޖޫނިއާ ގައިގައި ޖެނުތީ އެކަމާ އަމިއްލަ އަށް ދެރަވާ ކަމަށާއި އެ ކަންކުރެވުނީތީވެ، މާފަށް އެދޭ ކަމަށް ސަންޓޯސްގެ ތަރި، ނޭމާ ބުނެފި އެވެ.
ސަންޓޯސްގެ ޓްރެއިނިން ސެޝަނެއްގެ ތެރެއިން، އުމުރުން 18 އަހަރުގެ ރޮބީނިއޯ ޖޫނިއާ ޖޫނިއާ ވަނީ ނޭމާ ކައިރިން ނައްޓާފައި ގޮސްފަ އެެވެ. އެ ވަގުތު ކަންތައްތައް ހިނގައިދިޔަ ގޮތުން ނޭމާ ރުޅިގަދަވެ، ރޮބީނިއޯ ޖޫނިއާ މޫނުމަތީގައި ޖަހާފައިވެ އެވެ.
މިދިޔަ އާދިއްތަ ދުވަހު ހިނގައިދިޔަ މި ކަންތައްތަކަށް ފަހު، ސަންޓޯސް އިން ވަނީ ނޭމާ، 34، ގެ މައްސަލަ ބަލަން ފަށައިފަ އެވެ. އެކަމަކު، މިދިޔަ އަންގާރަ ދުވަހު، ސަންޓޯސްގެ ރެއި ޕެލޭ ޓްރެއިނިން ސެންޓަރުގައި، ނޭމާ ވަނީ މި މައްސަލަ ހައްލުކޮށްފަ އެވެ.
"މީޑިއާ ކުރިމަތީގައި އަހަރެން މި ކަމުގައި މާފަށް އެދެންޖެހޭ ކަމަށް ފެންނަންޏާ. މިއީ އެ ވަގުތު. އަހަންނަށް އޯވަރިއެކްޓް ކުރެވުނީ. އަހަންނަށް ރިއެކްޓްކުރެވުނު ގޮތް ޔަގީނުން ވެސް އެ އަށް ވުރެން ރަނގަޅު ކުރެވޭނެ. އެކަމަކު، އަހަންނަށް ގޯސްކޮށް ކަންކަން ކުރެވުނީ، މާފަށް އެދެން،" ބްރެޒިލް ގައުމީ ޓީމަށް އެންމެ ގިނަ ގޯލު ޖަހައިދިނުމުގެ ރެކޯޑް އޮތް ނޭމާ ބުންޏެވެ.
"ކޮންމެ މީހަކަށް ވެސް ގޯސް ހެދޭނެ، މި ފަހަރު އެކަން ކުރެވިފައި އެ އޮތީ އަހަންނަށް،"
ރޮބީނިއޯ ޖޫނިއާ ބުނީ، ނޭމާ އަށް އެކަން ކުރެވުމާ އެކު، ހެދުނީ ގޯހެއް ކަމުގެ އިހުސާސް ކުރެވުނުކަން އެނގޭ ކަމަށެވެ. އަދި، އެ ކަމާ ނޭމާ ވަނީ ތަކުރާރުކޮށް އެތައް ފަހަރަކު މާފަށް އެދިފައި ކަމަށް ރޮބީނިއޯ ޖޫނިއާ ވަނީ ބުނެފަ އެވެ.
