ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރަށް ހިމާޔަތް ދިނުމަށް އެމެރިކާ ސިފައިން ހިންގަމުންދާ އަސްކަރީ އޮޕަރޭޝަން ވަގުތީގޮތުން މެދުކަނޑާލައިފި އެވެ.
އަންގާރަ ދުވަހު ޓްރަމްޕް ވިދާޅުވީ ހޮރްމޫޒް ކަނޑުއޮޅީގައި ތާށިވެފައިވާ އުޅަނދުފަހަރު ނެރުމަށް ހިންގާ "ޕްރޮޖެކްޓް ފްރީޑަމް" މަޑުޖައްސާލުމަށް ނިންމެވީ ޕާކިސްތާނާއި އެހެނިހެން ގައުމުތަކުގެ އެދުމުގެ މަތިން ކަމަށެވެ. އަދި އިރާނުގެ މަންދޫބުންނާއެކު ފައިނަލް އެއްބަސްވުމަކަށް އައުމަށް ކުރެވޭ މަސައްކަތްތަކަށް ފުރުސަތު ދިނުމުގެ ގޮތުން މި އޮޕަރޭޝަން ކުރު މުއްދަތަކަށް މެދުކަނޑާލި ނަމަވެސް، އެ ސަރަހައްދުގައި އަޅާފައިވާ ބްލޮކޭޑް ނުވަތަ ދަތުރުފަތުރު ހުރަސްކުރުމުގެ ފިޔަވަޅުތައް އެގޮތުގައި ދެމިއޮންނާނެ ކަމަށް އެމަނިކުފާނު ވިދާޅުވިއެވެ.
މި ނިންމެވުމާ ގުޅޭގޮތުން އިރާނުގެ ސަރުކާރުން އަދި ރަސްމީކޮށް އެއްޗެއް ބުނެފައެއް ނުވެއެވެ. ނަމަވެސް، މި ފިޔަވަޅު އަޅާފައި މިވަނީ ގަލްފް ސަރަހައްދުގައި ނުތަނަވަސްކަން އިންތިހާއަށް ބޮޑުވެފައިވާ ދަނޑިވަޅެއްގައެވެ. އެމެރިކާގެ އަސްކަރިއްޔާއިން ބުނެފައިވާ ގޮތުގައި، ފާއިތުވި ދުވަސްތަކުގައި އިރާނުގެ ބައެއް އުޅަނދުފަހަރާއި، ކްރޫޒް މިސައިލް އަދި ޑްރޯންތައް އެމެރިކާއިން ވަނީ ހަލާކުކޮށްލާފައެވެ. ހަމައެއާއެކު، ޔުނައިޓެޑް އަރަބް އެމިރޭޓްސްއިން ބުނެފައިވަނީ އިރާނުން ފޮނުވާލި މިސައިލްތަކާއި ޑްރޯން ހަމަލާތަކުން ދިފާއުވުމަށް އެގައުމުގެ އެއާ ޑިފެންސް ސިސްޓަމްތައް ބޭނުންކުރަން ޖެހުނު ކަމަށެވެ.
އިރާނުން ވަނީ ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރަށް އަމާޒުކޮށް އާ އުސޫލުތަކެއް ތައާރަފްކޮށްފައެވެ. މި އުސޫލުގެ ދަށުން، އެ ސަރަހައްދުން ދަތުރުކުރާ އުޅަނދުފަހަރަށް އިރާނުގެ ކަމާބެހޭ އިދާރާއަކުން އީމެއިލް މެދުވެރިކޮށް ދަތުރުފަތުރުގެ އެންމެ ފަހުގެ ގަވާއިދުތައް އަންގާނެއެވެ. މީގެ އިތުރުން، އިރާނުގެ ރިވޮލިއުޝަނަރީ ގާޑްސްއިން ވަނީ އެގައުމުގެ ބާރު ހިނގާ ސަރަހައްދު ފުޅާކޮށް، އާ ޗާޓެއް އާންމުކޮށްފައެވެ. އަދި އެ ގައުމުން ކަނޑައަޅާފައިވާ މަގުތަކުން ނޫން ގޮތަކަށް ދަތުރުކުރާ އުޅަނދުފަހަރަށް ހަރުކަށި ފިޔަވަޅު އަޅާނެ ކަމުގެ އިންޒާރުވެސް ވަނީ ދީފައެވެ.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ، އިރާނާ ދެކޮޅަށް އެމެރިކާއިން ހިންގި "އޮޕަރޭޝަން އެޕިކް ފިއުރީ" ގެ ހަމަލާދިނުމުގެ ބައި މިހާރު ނިމިފައިވާ ކަމަށެވެ. އަދި އެމެރިކާގެ ސިފައިންނަށް ހަމަލާއެއް ނާންނަހާ ހިނދަކު، އިސްވެ އެއްވެސް ހަމަލާއެއް ދެން ނުދޭނެ ކަމަށް އޭނާ ވިދާޅުވިއެވެ. ރޫބިއޯ އިތުރަށް ފާހަގަކުރެއްވި ގޮތުގައި، ގަލްފް ސަރަހައްދުގައި އެމެރިކާއިން ކުރިއަށްގެންދާ އަސްކަރީ ހަރަކާތްތަކަކީ ހަމައެކަނި އީރާނުގެ ނުރައްކާތަކުން ދިފާއުވުމަށް ކުރިއަށްގެންދާ މަސައްކަތްތަކެކެވެ.
