ބޭންކް އޮފް މޯލްޑިވްސް (ބީއެމްއެލް) ގެ ކާޑު ލިމިޓުތަކުގެ ބޭނުން ނަހަމަ ގޮތުގައި ހިފައި، ރާއްޖޭގައި ތިބޭ މީހުންގެ ކާޑުތަކުން ބޭރުގެ އޭޓީއެމްތަކާއި ޕީއޯއެސް މެޝިންތަކުން ބޭރު ފައިސާއިން މުއާމަލާތްކުރުން ހުއްޓުވަން އެ ބޭންކުން އިމިގްރޭޝަނާ ގުޅިފައިވާ ކަން މިއަދު އިއުލާންކޮށްފި އެވެ.
ބީއެމްއެލްއިން ބޭއްވި ނޫސްވެރިންގެ ބައްދަލުވުމެއްގައި އެ ބޭންކުގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފު ވިދާޅުވީ، މިކަމަށް ޓަކައި ބީއެމްއެލް އާއި އިމިގްރޭޝަންއާ ދެމެދު ޑިޖިޓަލް އިންޓަގްރޭޝަން ގާއިމުކުރެވިފައިވާ ކަމަށެވެ. މިއާއެކީ، ރާއްޖޭން ބޭރުގައި ތިބޭއިރު އެކަނި އޭޓީއެމް އާއި ޕީއޯއެސްތަކުގެ ފޮރިން ސްޕެންޑް ލިމިޓު އެކްޓިވް ވާގޮތަށް ހަމަޖެހިފައިވާ ކަމަށް އޭނާ ވިދާޅުވި އެވެ.
ބީއެމްއެލްއިން މި ފިޔަވަޅު އެޅީ، ކާޑުތަކުގެ ލިމިޓުތައް މަތިކުރި ފަހުން، އެކި މީސްމީހުންގެ ކާޑުތައް ހިފައިގެން ގޮސް އެ ކާޑުތައް ބޭނުންކުރާ މައްސަލަ ފާހަގަވިތާ މަސްތަކެއް ފަހުން، އިރާނު ހަނގުރާމައާ ހެދި ޑޮލަރު ތާށިކަން އިހުނަށް ވުރެ އިތުރުވެފައިވާ ދަނޑިވަޅެއްގަ އެވެ.
ބޭންކުގެ މި ފިޔަވަޅާ ގުޅިގެން ބޭރުގައި ތިބޭ ކިޔަވާ ކުދިންނަށް އުނދަގޫ ވެދާނެތީ ބީއެމްއެލްއިން ވަނީ ހާއްސަ ސްޓޫޑަންޓް ކާޑެއް ވެސް ތައާރަފުކޮށްފަ އެވެ.
މިއީ ރާއްޖޭން ބޭރުގައި ތިބި ކިޔަވާ ކުދިންގެ އަމިއްލަ ކާޑެއް ނެތުމުން ބެލެނިވެރިންގެ ކާޑު ބޭނުންކުރާ ކުދިންނަށް ބީއެމްއެލްއިން ދިން ހައްލެކެވެ. އެ ބޭންކުން ބުނީ މި ސްޓޫޑަންޓް ކާޑުތަކުގައި ކިޔަވާ ކުދިންނަށް ދެވިފައިވާ ހާއްސަ ލިމިޓު (1200 ޑޮލަރު) ލިބޭނެ ކަމަށެވެ.
ބީއެމްއެލްއިން ވަނީ މި ގޮތަށް ބެލެނިވެރިންގެ ކާޑުތައް ބޭނުންކުރާ ކުދިން ސްޓޫޑަންޓް ކާޑަށް ބަދަލުކުރަން ތިން މަސް ދުވަސް ދީފަ އެވެ. މި މުއްދަތުގެ ތެރޭގައި ބެލެނިވެރިންގެ ކާޑު ބޭނުންކުރެވޭނެ ކަމަށް އެ ބޭންކުން ބުންޏެވެ.
ޑޮލަރު ތާށިކަމާ ހުރެ ބީއެމްއެލްއިން އަޅާ އެހެން ފިޔަވަޅުތަކުގެ ތެރޭގައި ދިވެހިން އާންމުކޮށް ވިޔަފާރިކުރާ އީކޮމާސް ސައިޓުތަކަށް ވަކި ބަޖެޓެއް ކަނޑައަޅައިގެން ރުފިޔާ އެކައުންޓުތަކުގެ ކުރެވޭ މުއާމަލާތްތައް ލިމިޓުކުރުން ވެސް ހިމެނެ އެވެ.
ޝަރީފު ވިދާޅުވީ، މި ބަޖެޓު އެންމެ ހަމަހަމަ ގޮތެއްގައި ބޭނުންކުރަން ފަހިކުރުމުގެ ގޮތުން، ކޮންމެ މަހެއްގައި ކޮންމެ ކަސްޓަމަރަކަށް ހެދޭ ޓްރާންސެކްޝަންތަކުގެ އަދަދު 30 އަށް ލިމިޓުކުރާނެ ކަމަށެވެ.
މި ފިޔަވަޅުތައް އެޅުމުގެ ކުރިން ބީއެމްއެލްއިން ބޭއްވި ނޫސްވެރިންގެ ބައްދަލުވުމެއްގައި އިރާނު ހަނގުރާމައާ ގުޅިގެން ޓޫރިސްޓު ނަމްބަރުތައް ވެއްޓުމާއެކު، ބޭންކުގެ ޑޮލަރު އާމްދަނީ ދަށްވެފައިވާ ކަމަށް އެ ބޭންކުން ވަނީ ހާމަކޮށްފަ އެވެ. އެ ބޭންކުގެ މި އަހަރުގެ ފުރަތަމަ ކުއާޓަލީ ރިޕޯޓުގައި ވެސް ޑޮލަރު ތާށި ކަމުން ފިޔަވަޅުތަކެއް އަޅަން ޖެހިދާނެ ކަމަށް އިލްތިމާސްކޮށްފައިވެ އެވެ.
ބީއެމްއެލްއިން މިއަދު އާންމުކުރި ތަފާސްހިސާބުތަކުގައިވާ ގޮތުގައި، މި އަހަރުގެ އޭޕްރިލް މަހުގެ ނިޔަލަށް ބޭންކަށް 1.5 ބިލިއަން ޑޮލަރު ވަންއިރު، 1.4 ބިލިއަން ޑޮލަރު ބޭރަށް ފޮނުވި އެވެ. މިއީ މިދިޔަ އަހަރު ލިބުނު 1.2 ބިލިއަން ޑޮލަރާއި ފޮނުވި 1.03 ބިލިއަން ޑޮލަރަށް ވުރެ އިތުރު އަދަދެކެވެ.
