އިރާން ހަނގުރާމައާ ގުޅިގެން މެދުކަނޑާލާފައި އޮތް ވައިގެ ދަތުރުފަތުރުގެ ހިދުމަތްތައް، ދެ މަސް ދުވަހަށް ފަހު ތެހެރާންގެ ބައިނަލްއަގުވާމީ ވައިގެ ބަނދަރުން އަލުން ފަށައިފި އެވެ.
އިރާނުގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި، ތެހެރާންގެ އިމާމް ޚުމައިނީ އިންޓަނޭޝަނަލް އެއާޕޯޓުން ހޮނިހިރު ދުވަހު ވަނީ އިސްތަންބޫލް، މަސްކަޓް އަދި ސައުދީ އަރަބިއްޔާގެ މަދީނާއަށް ދަތުރުތައް ފަށާފަ އެވެ.
އިރާނުގެ ރަސްމީ ނިއުސް އެޖެންސީ ކަމަށްވާ އިރްނާއިން ބުނި ގޮތުގައި، ކުރިއަށް އޮތް ދުވަސްތަކުގައި ބަކޫ، ނަޖަފް، ބަޣުދާދު އަދި ދޯހާއަށް ކުރާ ދަތުރުތައް ތާވަލާ އެއްގޮތަށް ކުރިއަށްދާނެއެވެ.
އެމެރިކާއާއެކު އޮތް ނުތަނަވަސްކަމަށް ކޮންމެވެސް ވަރެއްގެ ލުޔެއް ލިބި، ޕާކިސްތާނުގައި ދެ ގައުމުގެ މެދުގައި މަޝްވަރާތައް ކުރިއަށްދާއިރު، ބޭރުގެ އެއާލައިންތައް އަލުން އިރާނަށް ގެނައުމަށްޓަކައި ކަމާބެހޭ ފަރާތްތަކުން ދަނީ މަސައްކަތް ކުރަމުންނެވެ.
ފެބްރުއަރީ މަހުގެ 28 ވަނަ ދުވަހު ފެށުނު ހަނގުރާމައިގެ ސަބަބުން މެދުއިރުމަތީގެ ވައިގެ ސަރަހައްދު ބަންދުކުރަން ޖެހުމުން، ބައިނަލްއަގުވާމީ ދަތުރުފަތުރަށް ބޮޑެތި ހުރަސްތަކެއް ކުރިމަތިވެ، އެތައް ހާސް ބަޔަކު ގައުމަށް ނުދެވި ތާށިވިއެވެ.
ގައުމުތަކުން އެ ގައުމުތަކުގެ ރައްޔިތުން އަނބުރާ ގެންދިއުމަށް ހާއްސަ ފްލައިޓްތައް ބޭއްވި ނަމަވެސް، ދުނިޔޭގެ އެންމެ ބާރުބޮޑު އެއް ސަރަހައްދުގެ ވައިގެ ދަތުރުފަތުރު ހުއްޓުމަކަށް އައުމުން އެ މަސައްކަތަށް ބޮޑެތި ގޮންޖެހުންތަކެއް ކުރިމަތިވިއެވެ. ގަތަރާއި ޔުނައިޓެޑް އަރަބް އެމިރޭޓްސް ފަދަ ގައުމުތަކުން އެ ގައުމުތަކުގެ ވައިގެ ސަރަހައްދު ބައެއް ހުޅުވާލާފައިވަނީ ހަމަލާތައް ފެށުނުތާ ދުވަސްތަކެއް ފަހުންނެވެ.
ހޮރްމޫޒް ކަނޑުއޮޅި ބަންދުކޮށްފައި އޮތުމުގެ ސަބަބުން މަތިންދާބޯޓަށް އަޅާ ތެލުގެ ދަތިކަން ވަނީ ވަރަށް ބޮޑަށް ކުރިމަތިވެފައެވެ.
އިންޓަނޭޝަނަލް އެނާޖީ އެޖެންސީގެ ވެރިޔާ ފާތިހް ބިރޯލް އިންޒާރު ދެއްވާފައިވާ ގޮތުގައި، ޔޫރަޕްގައި މިހާރު ހުރީ ގާތްގަނޑަކަށް ހަ ހަފުތާއަށް ވާވަރުގެ ތެލެވެ.
މި މައްސަލައާ ގުޅިގެން ޖަރުމަނުގެ ލުފްތަންސާ ގްރޫޕުން ވަނީ ތެލުގެ އަގު އުފުލުމާއި ތެޔޮ ލިބުމުގެ ދަތިކަމާ ހުރެ އޮކްޓޯބަރު މަހާ ހަމައަށް ކުރަން އޮތް 20،000 ކުރު ދަތުރު ކެންސަލްކުރަން ނިންމާފައެވެ. އިރާނުން ވައިގެ ދަތުރުތައް އަލުން ފެށި ނަމަވެސް، ސަރަހައްދީ ހަމަނުޖެހުންތަކުގެ ސަބަބުން ދުނިޔޭގެ ވައިގެ ދަތުރުފަތުރުގެ ސިނާއަތަށް ކުރިމަތިވެފައިވާ ނުތަނަވަސްކަން އަދިވެސް މުޅިން ފިލައިގެން ނުދެއެވެ.
