އެމެރިކާގެ އުޅަނދުފަހަރަށް އިރާނުން ހަމަލާދީފިނަމަ އެ ގައުމު ދުނިޔޭގެ ޗާޓުން ފޮހެލާނެ ކަމުގެ އިންޒާރު ރައީސް ޑޮނަލްޑް ޓްރަމްޕް ދެއްވައިފިއެވެ.
ހޮރްމޫޒް ކަނޑުއޮޅީގެ ނުތަނަވަސްކަން އިންތިހާއަށް ބޮޑުވެ، ދެ ގައުމުގެ ދެމެދުގައި އޮތް ހަނގުރާމަ ހުއްޓާލުމުގެ އެއްބަސްވުން ނެތިދިއުމުގެ ބިރު މިހާރު ވަނީ ބޮޑުވެފައެވެ. އިއްޔެ ވަނީ ހަމަލާތައް ބަދަލުކުރަން ފަށައިފަ އެވެ.
ފޮކްސް ނިއުސްއަށް ދެއްވި ބަސްދީގަތުމެއްގައި ޓްރަމްޕް ވިދާޅުވީ އެމެރިކާގެ އަސްކަރީ ގާބިލުކަން ކުރިއަށްވުރެ ވަރުގަދަ ކަމަށާއި، ދުނިޔޭގެ އެކި ކަންކޮޅުތަކުގައި ހުރި އެމެރިކާގެ މަރުކަޒުތައް ހުރީ އެންމެ ޒަމާނީ ހަތިޔާރާއެކު ތައްޔާރީ ހާލަތުގައި ކަމަށެވެ.
މި ނުތަނަވަސްކަމުގެ ތެރޭގައި ހޮރްމޫޒް ކަނޑުއޮޅިން ދަތުރުކުރާ އުޅަނދުފަހަރަށް ރައްކާތެރިކަން ދިނުމަށް އެމެރިކާއިން ވަނީ ޕްރޮޖެކްޓް ފްރީޑަމްގެ ނަމުގައި ހާއްސަ ހަރަކާތެއް ފަށާފައެވެ. އެމެރިކާގެ ސެންޓްރަލް ކޮމާންޑްގެ ވެރިޔާ އެޑްމިރަލް ބްރެޑް ކޫޕަރ ވިދާޅުވީ، މި ސަރަހައްދުގައި ތާށިވެފައިވާ 87 ގައުމެއްގެ އުޅަނދުފަހަރަށް އެހީތެރިވުމަށް މަސައްކަތް ކުރަމުންދާ ކަމަށެވެ. ނަމަވެސް، އިރާނުން ވަނީ މި ސަރަހައްދުގެ ފުރިހަމަ ކޮންޓްރޯލް އޮތީ އެގައުމުގެ އަތްމަތީގައި ކަމަށް ބުނެފައެވެ. އަދި އެމެރިކާއިން އިރާނުގެ ހަތް ބޯޓެއް ފައްތާލި ކަމަށް ބުނާ ވާހަކަ އިރާނުގެ ރަސްމީ ނޫސް އެޖެންސީން ވަނީ ދޮގުކޮށްފައެވެ.
ހޯމަ ދުވަހު އިރާނުން ވަނީ ޔުނައިޓެޑް އެރަބް އެމިރޭޓްސް (ޔޫއޭއީ) އަށް އަމާޒުކޮށް ވަރުގަދަ ހަމަލާތަކެއް ދީފައެވެ. ޔޫއޭއީގެ ދިފާއީ ވުޒާރާއިން ހާމަކުރި ގޮތުގައި އިރާނުން ފޮނުވާލި 12 ބެލިސްޓިކް މިސައިލާއި، ތިން ކްރޫޒް މިސައިލް އަދި ހަތަރު ޑްރޯން ވަނީ ދިފާއީ ނިޒާމުގެ އެހީގައި ހުއްޓުވާފައެވެ. އެހެންނަމަވެސް، ފުޖައިރާގެ ތެޔޮ ރައްކާކުރާ ސަރަހައްދަށް ދިން ހަމަލާއެއްގައި ތިން މީހަކު ޒަހަމްވެ، އެތަނުގައި އަލިފާން ރޯވެފައިވާ ކަމަށް ރިޕޯޓްތައް ބުނެއެވެ. ޔޫއޭއީން ވަނީ މި ހަމަލާތައް ހަރުކަށި އިބާރާތުން ކުށްވެރިކޮށް، ގައުމުގެ ސިޔާދަތީ ނަގަހައްޓަން ކުރަންޖެހޭ ކޮންމެ ކަމެއް ކުރާނެ ކަމަށް ބުނެފައެވެ.
މީގެ އިތުރުން، ދެކުނު ކޮރެއާގެ މުދާ އުފުލާ ބޯޓަކަށްވެސް މި ސަރަހައްދުން ވަނީ ހަމަލާދީފައެވެ. މި ހާދިސާއާ ގުޅިގެން ރައީސް ޓްރަމްޕް ވަނީ އިރާނާ ދެކޮޅަށް އެމެރިކާއިން ކުރިއަށްގެންދާ އަސްކަރީ ހަރަކާތުގައި ބައިވެރިވުމަށް ދެކުނު ކޮރެއާއަށް ގޮވާލައްވާފައެވެ. އިނގިރޭސިވިލާތުގެ މެރިޓައިމް ޓްރޭޑް އޮޕަރޭޝަންސްއިން ބުނި ގޮތުގައި މި ސަރަހައްދުގެ އިތުރު ދެ އުޅަނދެއްގައިވެސް ވަނީ އަލިފާނުގެ ހާދިސާތަކެއް ހިނގާފައެވެ.
މި ހަމަނުޖެހުންތަކުގެ ސަބަބުން ދުނިޔޭގެ ބާޒާރުގައި ތެލުގެ އަގު ވަނީ އުފުލިފައެވެ.
