އިރާނުގެ ފޮރިން މިނިސްޓަރު އައްބާސް އަރަގްޗީ އޮމާނާއި ޕާކިސްތާނަށް ކުރައްވާ ރަސްމީ ދަތުރުފުޅުތަކަށްފަހު ރަޝިޔާއަށް ވަޑައިގަތުމަށް ނިންމަވައިފިއެވެ.
މިއީ ފާއިތުވި 24 ގަޑިއިރުގެ ތެރޭގައި އިރާނުގެ އިސް އޮފިޝަލަކު ކުރައްވާ އެންމެ މުހިންމު ސިޔާސީ ހަރަކާތްތަކުގެ ގޮތުގައި ވަނީ ފާހަގަކުރެވިފައެވެ. މި ދަތުރުތަކަކީ ސަރަހައްދީ ފެންވަރުގައި އިރާނުން ފަށާފައިވާ ޑިޕްލޮމެޓިކް މަސައްކަތްތަކުގެ ބައެއްގެ ގޮތުގައި ބެލެވެއެވެ.
އިސްލާމްއާބާދުން ފެށިގެން މަސްކަޓަށް އަދި އަލުން އިސްލާމްއާބާދަށް ކުރެއްވި މި ދަތުރުފުޅުތަކަށްފަހު އަރަގްޗީ ރަޝިއާއަށް ވަޑައިގަތުމަށް ހަމަޖެހިފައިވަނީ މިއަދު އެވެ. މި ދަތުރުގައި އޭނާ ރަޝިޔާގެ ރައީސް ލަޑީމިއަ ޕޫޓިންއާ ބައްދަލުކުރައްވާނެ ކަމަށް ބެލެވެއެވެ.
މި ދަތުރުތަކުގެ އެންމެ މުހިންމު އެއް އަމާޒަކީ ހޮރްމޫޒް ކަނޑުއޮޅީގެ މައްސަލައެވެ. އެމެރިކާގެ ކަނޑުގެ ސިފައިން އެ ސަރަހައްދު ބަންދުކުރުމަށް ކުރާ މަސައްކަތްތަކާ ދެކޮޅަށް އިރާނުން ދަނީ ތަކުރާރުކޮށް އަޑުއުފުލަމުންނެވެ. އިރާނުގެ ފޮރިން މިނިސްޓަރު ދާދިފަހުން ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ، އެ ސަރަހައްދުގެ ފުރިހަމަ ކޮންޓްރޯލް އޮތީ އިރާނަށް ކަމަށާއި، ކަނޑުއޮޅީގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި މަޝްވަރާގެ މަގު އިހުތިޔާރުކުރަންޖެހޭ ކަމަށެވެ.
ރަޝިޔާއަކީ އެތައް އަހަރެއްގެ ކުރިން ފެށިގެން އިރާނުގެ އެންމެ ގާތް އެކުވެރިޔާއެވެ. އެހެންކަމުން މި ދަތުރުފުޅުގެ މައިގަނޑު ބޭނުމަކީ ރަޝިޔާގެ ސިޔާސީ އެހީތެރިކަމާއި އެއްބާރުލުން ހޯދުމެވެ. އީރާނުން ބޭނުންވަނީ ބައިނަލްއަގުވާމީ މައިދާނުގައި އެ ގައުމުގެ މަގާމު ވަރުގަދަކޮށް، ރަޝިޔާ ފަދަ ބާރުގަދަ ގައުމުތަކުގެ ތާއީދު ހޯދުމަށެވެ.
