އިރާނަށް ހަމަލާ ދިނުން ހުއްޓުމަކަށް އައިސްފައިވާ ކަމަށް ވިދާޅުވެ، އެ ގައުމާ ދެކޮޅަށް ކުރާ ހަނގުރާމައަށް ކޮންގްރެސްގެ ހުއްދަ ހޯއްދަވަން ނުޖެހޭނެ ކަމަށް އެމެރިކާގެ ރައީސް ޑްރަލްޑު ޓްރަމްޕް ވިދާޅުވެއްޖެ އެވެ.
ޓްރަމްޕް މިހެން ވިދާޅުވީ އީރާނަށް ހަމަލާދޭން ފެށިކަން ރަސްމީކޮށް ކޮންގްރެސްއަށް އެންގިތާ 60 ދުވަސް ހަމަވި ދުވަހުއެވެ.
އެމެރިކާގެ ގާނޫނުތައް ބުނާގޮތުން، ރައީސަކު ހަނގުރާމައެއް ފަށާކަން ކޮންގްރެސްއަށް އެންގުމަށްފަހު، ކޮންގްރެސްގެ ހާއްސަ ހުއްދައެއް ނެތްނަމަ 60 ދުވަހުގެ ތެރޭގައި އެ ހަނގުރާމައެއް ހުއްޓާލަން ޖެހެއެވެ.
ޓްރަމްޕް ކޮންގްރެސްގެ ލީޑަރުންނަށް ފޮނުއްވި ސިޓީއެއްގައި ވިދާޅުވީ، ފެބްރުއަރީ 28 ގައި ފެށި ހަނގުރާމަ މިހާރު ނިމުމަކަށް އައިސްފައިވާ ކަމަށެވެ. އަދި އޭޕްރިލް 7 ވަނަ ދުވަހުން ފެށިގެން ހަމަލާ ބަދަލުކުރުން ހުއްޓިފައިވާ ކަމަށް ވިދާޅުވެފައިވެ އެވެ.
ނަމަވެސް، ދެ ގައުމުގެ ދެމެދުގައި ދާއިމީ ސުލްހައިގެ އެއްބަސްވުމަކަށް އަދި އާދެވިފައެއް ނުވެއެވެ. އިރާނުގެ ރަސްމީ މީޑިއާއިން ރިޕޯޓްކޮށްފައިވާ ގޮތުގައި، ޕާކިސްތާން މެދުވެރިކޮށް އިރާނުން ވަނީ މަޝްވަރާ ކުރުމުގެ އާ ހުށަހެޅުމެއް އެމެރިކާއަށް ފޮނުވާފައެވެ.
ކޮންގްރެސްގެ ތެރޭގައި މި ހަނގުރާމައަށް ރަސްމީ ހުއްދަ ހޯދުމަށް ވޯޓަކަށް ދިއުމާ މެދު ބަހުސްތައް ދަނީ ކުރެވެމުންނެވެ. ޑިމޮކްރެޓުން ޓްރަމްޕްގެ ބާރުތައް ހަނިކުރަން މަސައްކަތް ކުރަމުންދާއިރު، ޓްރަމްޕް ވިދާޅުވަނީ ކޮންގްރެސްގެ ހުއްދަ ހޯދުމަކީ ގާނޫނުއަސާސީއާ ހިލާފު ކަމެއް ކަމަށް ގިނަ ބަޔަކު ގަބޫލުކުރާ ކަމަށެވެ. ނަމަވެސް، ގާނޫނީ މާހިރުން ބުނާގޮތުގައި ހަމަލާ ބަދަލުކުރުން ހުއްޓާލުމަކީ ހަނގުރާމަ ނިމުނީ ކަމަށް ބަލައި، 60 ދުވަހުގެ މުއްދަތު ގުނުން ހުއްޓާލެވޭނެ ސަބަބެއް ނޫނެވެ.
މި ހަނގުރާމަ ފެށުނީ އިރާނުގެ ނިއުކްލިއާ ޕްރޮގްރާމާ ގުޅިގެން އުފެދުނު ނުތަނަވަސްކަމުގެ ތެރެއިން، އެމެރިކާއާއި އިޒްރޭލުން އިރާނަށް ދިން ވަރުގަދަ ހަމަލާތަކެއްގައި އެ ގައުމުގެ ރޫހާނީ ލީޑަރު އާޔަތުﷲ ހާމަނައި އަވަހާރަވުމާ ގުޅިގެންނެވެ. އިރާނުން ވަނީ އޭގެ ބަދަލުގައި އިޒްރޭލަށާއި ގަލްފުގެ ގައުމުތަކުގައި ހުރި އެމެރިކާގެ ތަންތަނަށް ހަމަލާދީފަ އެވެ.
