ލަންޑަން (މެއި 3) - މި ސީޒަނަށް ފަހު މެންޗެސްޓާ ޔުނައިޓެޑް ދޫކޮށްލާނެކަން އިއުލާނުކޮށްފައިވާ ބްރެޒިލްގެ މިޑްފީލްޑަރު، ކަސެމީރޯ ގެންދަން އެމެރިކާ ލީގު، މޭޖަ ލީގު ސޮކާ (އެމްއެލްއެސް)ގެ އިންޓަ މިއާމީ އެފްސީން މަސައްކަތް ކުރަމުން އަންނަ ކަމަށް މީޑިއާ ރިޕޯޓްތައް ބުނެފި އެވެ.
ކަސެމީރޯ، ޔުނައިޓެޑާ ގުޅުނީ 2022 ވަނަ އަހަރު 80 މިލިއަން ޑޮލަރުގެ ޑީލެއްގަ އެވެ.
ހަތަރު އަހަރު މެންޗެސްޓާ ޔުނައިޓެޑްގައި ހޭދަކުރުމަށް ފަހު، ކަސެމީރޯ، 34، މި ސީޒަނަށް ފަހު އެ ޓީމު ދޫކޮށްލާނެކަން މީޑިއާގައި އިއުލާނުކުރިއިރު، އޭނާ ލައްވައި އާ ކޮންޓްރެކްޓެއް ހަދަން ޔުނައިޓެޑުން އެކަށީގެންވާ މަސައްކަތްތަކެއް ކޮށްފައިނުވެ އެވެ.
އެކަމަކު، މި ސީޒަނަކީ ކަސެމީރޯ، ޔުނައިޓެޑްގެ ޖޯޒީގައި އެންމެ ރަނގަޅު ކުޅުމެއް ދައްކަމުން އަންނަ އަހަރެވެ. އެ ގޮތުން، ކަސެމީރޯ ވަނީ ސީޒަނުގެ މިހާތަނަށް ކުޅުނު 33 މެޗުން ނުވަ ގޯލު ޖަަހައި، ދެ ގޯލު ޖަަހަން ފުރުސަތު ތަނަވަސްކޮށްދީފަ އެވެ.
ލިއޮނަލް މެސީގެ ކެޕްޓަންކަމުގައި ކުޅޭ އިންޓަ މިއާމީން ކަސެމީރޯ ގެންދިއުމުގެ މަސައްކަަތް ކުރަމުން އަންނަނީ، އެ ޓީމުގެ އެއް ހިއްސާދާރު ޔުނައިޓެޑްގެ ކުރީގެ ތަރި، ޑޭވިޑް ބެކަމްގެ އިރުޝާދުގެ ދަށުންނެވެ.
އެ ގޮތުން، އިންޓަ މިއާމީ އަށް ކުޅެމުން އައި ބާސެލޯނާގެ ކުރީގެ މިޑްފީލްޑަރު، ސްޕެއިނުގެ ސާޖިއޯ ބުސްކެޓްސް، ފުޓްބޯޅައިން ރިޓަޔާކުރަން މިދިޔަ އަހަރު ނިންމުމާ އެކު، އެ ޖާގަ އަށް ދުނިޔޭގެ ފުޓްބޯޅަ އަށް ފަރިތަ ތަޖުރިބާކާރު ކުޅުންތެރިއަކު ހޯދަން އިންޓަ މިއާމީން މަސައްކަތް ފެށިއިރު، އެ މަގާމަށް އެންމެ އެކަށޭނެ ކުޅުންތެރިއެއް ގޮތަށް، އިންޓަ މިއާމީގެ ޓެކްނިކަލް ޓީމަށް ގަބޫލުކުރެވުނީ ކަސެމީރޯ ކަމަށެވެ.
ރެއާލް މެޑްރިޑާއި ޕޯޓޯ އަށް ކުރިން ކުޅުނު ކަސެމީރޯ އަށް ޔޫރަޕާއި ސައުދީ އަރަބިއްޔާ އަދި ބްރެޒިލްގެ ކްލަބްތަކުގެ ހުށަހެޅުންތަކެއް ވަނީ ލިބިފަ އެވެ.
