މިއާމީ (އޭޕްރީލް 14) - އިންޓަ މިއާމީގެ ކޯޗުގެ މަގާމުގައި ހުރި އާޖެންޓީނާގެ ކުރީގެ ތަރި، ހަވިއޭ މަޝެރާނޯ އަމިއްލަ ސަބަބަކާ ހެދި ޓީމު ދޫކޮށްލަން ނިންމައިފި އެވެ.
މަޝެރާނޯ، 41، މިއާމީގެ ކޯޗަކަށް ގެނައީ 2024 ވަނަ އަހަރުގެ ޑިސެމްބަރު މަހުގަ އެވެ. މަޝެރާނޯގެ ކޯޗުކަމުގައި މިއާމީން ވަނީ މިދިޔަ އަހަރު ބޭއްވި އެމްއެލްއެސް ކަޕްގެ ޗެމްޕިއަންކަން ހޯދައިފަަ އެވެ. މަޝެރާނޯ އިއުލާނުކޮށްފައިވާ ގޮތުގައި އަމިއްލަ ސަބަބަކާ ހެދި އިންޓަ މިއާމީ ކޯޗުކަން ދޫކޮށްލަން ވނީ ނިންްމައިފަ އެވެ.
"މި ޓީމާ އެކު މި ހޯދި ފުރަތަމަ ކާމިޔާބީގެ ހަނދާންތައް އަހަންނާ އެކު އަބަދުވެސް ވާނެ،" މަޝެރާނޯ ބުންޏެވެ.
އިންޓަ މިއާމީގައި މަޝެރާނޯ ވަނީ އޭނާއާ އެކު ކުޅުނު ކުޅުންތެރިންތަކަކަށް ކޯޗުކޮށްދީފަ އެވެ. އެއީ، މަޝެރާނޯއާ އެކު، ބާސެލޯނާ އަށް ކުޅުނު ލިއޮނަލް މެސީ، ސާޖިއޯ ބުސްކެޓްސް، ޖޯޑީ އަލްބާ އަދި ލުއިސް ސުއަރޭޒް އެވެ.
މަޝެެރާނޯގެ ކޯޗުކަމުަގައި އިންޓަ މިއާމީން ކުޅުނު 67 މެޗުގެ ތެެރެއިން 38 މެޗުން ވަނީ މޮޅުވެފަ އެވެ. މީގެ ތެރެއިން 15 މެޗުން އެއްވަރުވިއިރު، 14 މެޗުން ވަނީ ބަލިވެފަ އެވެ.
އިންޓަ މިއާމީން ވާދަކުރާ މޭޖަ ލީގު ސޮކާ (އެމްއެލްއެސް) އީސްޓާން ކޮންފަރެންސް ލީގުގައި އެ ޓީމު މި ވަގުތު އޮތީ ތިން ވަަނައިގަ އެވެ. އިންޓަ މިއާމީން އެންމެ ފަހުން ކުޅުނު މެޗުގައި ނިއު ޔޯކް ރެޑްބުލްްސްއާ 2-2 އިން ވީ އެއްވަރެވެ.
އާޖެންޓީނާ ގައުމީ ޓީމަށް ކުޅެފައިވާ މަޝެރާނޯ ކޯޗިން ކެރިއަރުގައި ކްލަބަކުން ފެނުނު ފުރަތަމަ ފަހަރަކީ އިންޓަ މިއާމީންނެވެ. އޭނާ އަށް އިންޓަ މިއާމީގެ ކޯޗުކަން ދިނީ، އަންނަ އަހަރުގެ އެމްއެލްއެސް ސީޒަނުގެ ނިޔަލަށެވެ. އެކަމަކު، އޭގެ އަހަރެއް ކުރިން އަމިއްލަ އަށް ވަކިވީ އެވެ.
އިންޓަ މިއާމީގެ ކޯޗަކަށް ހަމަޖެއްސީ އެ ކްލަބްގެ ޓެކްނިކަލް ޑިރެކްޓަރަކަށް ހުރި ބާސެލޯނާގެ ބީ ޓީމުގައި ކުރިން މަސައްކަތްކުރި ގިލެރްމޯ ހޯޔޯސް އެވެ.
މަޝެރާނޯގެ ކޯޗިން ކެރިއަރު ފެށުނީ 2021 ވަނަ އަހަރުގެ ޑިސެމްބަރު މަހު އާޖެންޓީނާގެ 20 އަހަރުން ދަށުގެ ޓީމުގެ ކޯޗުގެ މަގާމާ ހަވާލުވުމަށް ފަހު އެވެ. އެ ޓީމާ އެކު، މަޝެރާނޯ ވަނީ ގިނަ މުބާރާތްތަކެއްގައި މަސައްކަތްކޮށްފަ އެެވެ. އޭގެ ތެރޭގައި، ޕެރިހުގައި 2024 ވަނަ އަހަރު ބޭއްވި އޮލިމްޕިކްސް، 20 އަހަރުން ދަށުގެ ފީފާ ވޯލްޑް ކަޕް، 2022 ވަނަ އަހަރުގެ ސައުތު އެމެރިކަން ގޭމްސް، 2023 ވަނަ އަހަރުގެ ސައުތު އެެމެރިކާގެ 20 އަހަރުން ދަށުގެ މުބާރާތުގެ އިތުރުން، 2024 ވަނަ އަހަރުގެ އޮލިމްޕިކްސްގެ ކުރިން ދެކުނު އެމެރިކާގައި ބޭއްވި ޕްރީ ޓޯނަމަންޓް ހިމެނެ އެވެ.
