ދުނިޔޭގެ މަޝްހޫރު ބޭންޑު ބީޓީއެސް އުފެއްދި، އަދި ކޭ-ޕޮޕް މިއުޒިކްގެ އެންމެ ނުފޫޒުގަދަ އެއް ޝަހުސިއްޔަތު ކަމަށްވާ ބަންގް ޝީ-ހްޔުކް ހައްޔަރުކުރުމުގެ އަމުރަކަށް ދެކުނު ކޮރެއާގެ ފުލުހުން އެދިއްޖެއެވެ.
ބަންގްގެ މައްޗަށް ކުރެވެނީ އޭނާގެ ކުންފުނި، ހައިބް ހިއްސާގެ ބާޒާރަށް ނެރުމުގެ ކުރިން މަކަރާއި ހީލަތުން މުއާމަލާތްތަކެއް ހިންގި ކަމުގެ ތުހުމަތެވެ.
ފުލުހުން ތުހުމަތުކުރާ ގޮތުގައި 2019 ވަނަ އަހަރު ބަންގް ވަނީ އިންވެސްޓަރުންނަށް އޮޅުވާލާފައެވެ. އެގޮތުން ކުންފުނި ޕަބްލިކް ލިސްޓިންއަކަށް ދިއުމުގެ އެއްވެސް ވިސްނުމެއް ނެތް ކަމަށް ބުނެ، ސިއްރުން އެކަމަށް ތައްޔާރުވަމުން ދިޔަ ކަމަށް ބުނެވެއެވެ.
މި އޮޅުވާލުމުގެ ތެރެއިން ބަންގް ގާތްގަނޑަކަށް 200 ބިލިއަން ވޮން (136 މިލިއަން ޑޮލަރު) ގެ ނަހަމަ ފައިދާއެއް ހޯދާފައިވާ ކަމަށް ފުލުހުން ބުނާއިރު، ބަންގް އާއި ހައިބް ކުންފުނިން މި ހުރިހާ ތުހުމަތުތަކަކަށް އިންކާރު ކުރެއެވެ. އޭނާގެ ވަކީލުން ބުނާ ގޮތުގައި ހުރިހާ ކަމެއްވެސް ކުރިއަށް ދިޔައީ ގާނޫނީ އިމުގެ ތެރެއިންނެވެ.
މިދިޔަ އޯގަސްޓް މަހުން ފެށިގެން ބަންގް ފުރުން މަނާކޮށްފައިވާއިރު، ހައިބްގެ ހިއްސާގެ އަގު ވަނީ 2.3 މިލިއަން އަށް ވެއްޓިފައެވެ. ދެކުނު ކޮރެއާގެ ގާނޫނު ބުނާގޮތުން 5 ބިލިއަން ވޮންއަށް ވުރެ ގިނަ ފައިސާގެ ހިޔާނާތެއް ނުވަތަ މަކަރެއް ހަދައިފިނަމަ، އެމީހަކަށް 5 އަހަރުގެ ޖަލު ހުކުމުން ފެށިގެން ޖަލަށް ލުމުގެ އަދަބެއް އަތުވެދާނެއެވެ.
"ހިޓްމޭން ބަންގް" ގެ ނަމުން މަޝްހޫރުވެފައިވާ ބަންގް އަކީ ކޭ-ޕޮޕް ސިނާއަތް މުޅި ދުނިޔެއަށް ފަތުރާލުމުގައި އެންމެ އިސް ދައުރެއް އަދާކުރި އެކަކެވެ. އޭނާ 2005 ގައި އުފެއްދި ކުންފުނިން 2013 ގައި ބީޓީއެސް ތައާރަފްކުރިއިރު، އޭނާގެ މިލްކިއްޔާތު މިހާރު ބިލިއަން ޑޮލަރަށް ވުރެ ގިނަ އެވެ. މި މައްސަލަ ފެންމަތިވެފައި މިވަނީ 4 އަހަރަށްފަހު ބީޓީއެސް އިން އަލުން ދުނިޔޭގެ ޓުއާއެއް ފަށާފައިވާ ދަނޑިވަޅެއްގައެވެ.
