އެމެޒޯން ކުންފުނިން އާޓިފިޝަލް އިންޓެލިޖެންސްގެ ދާއިރާގައި މަސައްކަތްކުރާ އެންތްރޮޕިކް ކުންފުންޏަށް 25 ބިލިއަން ޑޮލަރު އިންވެސްޓްކުރުމަށް ނިންމައިފިއެވެ.
މި އިންވެސްޓްމަންޓަކީ ކުރިއަށް އޮތް 10 އަހަރު ދުވަހުގެ ތެރޭގައި އެމެޒޯންގެ ކްލައުޑް ޓެކްނޮލޮޖީ ބޭނުންކުރުމަށް އެންތްރޮޕިކް އިން 100 ބިލިއަން ޑޮލަރަށްވުރެ ގިނައިން ހޭދަކުރުމަށް އެއްބަސްވެފައިވާ މުހިންމު މުއާމަލާތެއްގެ ބައެކެވެ. މި އެއްބަސްވުމުގެ ސަބަބުން އޭއައި މޮޑެލްތައް ތަރައްގީކުރުމަށް ބޭނުންވާ ވަސީލަތްތައް ހޯދުމަށް މަސައްކަތްކުރާ އެންތްރޮޕިކް އާއި އެމެޒޯންގެ ގުޅުން އިތުރަށް ވަރުގަދަވެގެންދާނެއެވެ.
އެމެޒޯން ކުންފުނިން މިހާރު އެންތްރޮޕިކްއަށް 5 ބިލިއަން ޑޮލަރު އިންވެސްޓްކުރާނެއެވެ. އަދި ވިޔަފާރީގެ ވަކި ލަނޑުދަނޑިތަކެއް ހާސިލުވުމުން އިތުރު 20 ބިލިއަން ޑޮލަރު އިންވެސްޓްކުރުމަށް ވަނީ ހަމަޖެހިފައެވެ. މިއީ މީގެ ކުރިން އެމެޒޯން އިން އެ ކުންފުންޏަށް އިންވެސްޓްކޮށްފައިވާ 8 ބިލިއަން ޑޮލަރުގެ އިތުރުން ކުރާ އިންވެސްޓްމަންޓެކެވެ.
އެމެޒޯން އިން އަމިއްލައަށް އުފައްދާފައިވާ ނޯވާ ފަދަ އޭއައި މޮޑެލްތަކަށް އާންމުންގެ ސަމާލުކަން ހޯދުމުގައި ގޮންޖެހުންތަކެއް ހުރި ނަމަވެސް، އޭއައި ދާއިރާއަށް ބޭނުންވާ ކްލައުޑް ކޮމްޕިއުޓިން ފަދަ އިންފްރާސްޓްރަކްޗާ ފޯރުކޮށްދިނުމުގައި އެ ކުންފުނި ދަނީ އިސް ދައުރެއް އަދާކުރަމުންނެވެ.
މިއަހަރުގެ ތެރޭގައި އޭއައި ތަރައްގީކުރުމަށްޓަކައި ގާތްގަނޑަކަށް 200 ބިލިއަން ޑޮލަރު ހޭދަކުރާނެ ކަމަށް އެމެޒޯން އިން ލަފާކުރެއެވެ. މީގެ އިތުރުން އެންމެ ބޮޑެތި އޭއައި ކުންފުނިތަކަށް އެމެޒޯން އިން ދަނީ ބޮޑެތި އިންވެސްޓްމަންޓްތަކެއް ކުރަމުންނެވެ.
ކްލޯޑް އުފެއްދި އެންތްރޮޕިކްއަށް މިކުރާ އިންވެސްޓްމަންޓަކީ، ޗެޓްޖީޕީޓީ އުފެއްދި އޯޕަންއޭއައި އަށް 50 ބިލިއަން ޑޮލަރާ ހަމައަށް އިންވެސްޓްކުރާނެ ކަމަށް މިއަހަރު ކުރީކޮޅު އެމެޒޯން އިން އިއުލާނުކުރުމަށްފަހު ނިންމި ނިންމުމެކެވެ.
އެންތްރޮޕިކް އިން ނެރުނު ބަޔާނެއްގައި ބުނެފައިވަނީ، މިއަހަރު ނިމުމުގެ ކުރިން އެމެޒޯންގެ ޓްރެއިނިއަމް2 އަދި ޓްރެއިނިއަމް3 ޗިޕްތައް ބޭނުންކޮށްގެން ގާތްގަނޑަކަށް 1 ގިގަވޮޓްގެ ކެޕޭސިޓީ ހޯދުމަށް އުންމީދުކުރާ ކަމަށެވެ. އަދި ކުރިމަގުގައި މި މިންވަރު 5 ގިގަވޮޓަށް އިތުރުކުރުމަކީ އެ ކުންފުނީގެ އަމާޒެކެވެ.
އެމެޒޯންގެ ސީއީއޯ އެންޑީ ޖެސީ ވިދާޅުވި ގޮތުގައި އެންތްރޮޕިކް އިން ޓްރެއިނިއަމް ޗިޕްތައް ބޭނުންކުރުމަކީ ދެ ކުންފުނި ގުޅިގެން އަމިއްލަ ސިލިކަން ޗިޕްތައް ތަރައްގީކުރުމުގައި ހޯދާފައިވާ ކުރިއެރުން ދައްކުވައިދޭ ކަމެކެވެ.
އެންތްރޮޕިކްގެ އަމާޒަކީ ކޯޑިން އަދި ޑިޒައިން ކުރުމަށް ހާއްސަ މޮޑެލްތަކެއް ނެރެގެން އޭއައިގެ ވާދަވެރިކަމުގައި ކުރިހޯދުމެވެ. ހަމައެއާއެކު، އެމެޒޯން އިން މަސައްކަތްކުރަނީ އޭއައި ތަމްރީނުކުރުމަށް ހާއްސަކޮށްގެން އެ ކުންފުނިން އުފައްދާފައިވާ ޗިޕްތަކަށް ކަސްޓަމަރުން ހޯދުމަށެވެ. މި އިންވެސްޓްމަންޓްގެ ހަބަރާއެކު އެމެޒޯންގެ ހިއްސާގެ އަގު ބާޒާރުގައި ގާތްގަނޑަކަށް 2.7 ޕަސެންޓު މައްޗަށް ގޮސްފައިވާކަން ފާހަގަކުރެވެއެވެ.
