މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) ގެ ޑެޕިއުޓީ މެނޭޖިން ޑިރެކްޓަރުގެ މަގާމުން މުހައްމަދު ލައްމާން އިސްތިއުފާ ދެއްވައި އޭނާގެ މައްޗަށް އަމާޒުވެފައިވާ ކޮރަޕްޝަންގެ ތުހުމަތުތައް ދޮގުކޮށްފި އެވެ.
ލައްމާން އެކްސް ގައި ކުރެއްވި ޕޯސްޓެއްގައި ވިދާޅުވީ އެމްއޭސީއެލްގައި ހޭދަކުރި މުއްދަތުގައި އެއްވެސް ވައްކަމެއް ހިންގާފައި ނުވާނެ ކަމަށާއި އޭނާގެ މައްޗަށް އަމާޒުވެފައިވާ ހުރިހާ ތުހުމަތުތަކެއް ދޮގުކުރާ ކަމަށެވެ.
"އެމްއޭސީއެލްގައި ހޭދަކުރި މުއްދަތުގައި ކުރެވުނު މަސައްކަތާ މެދު ފަހުރުވެރިވޭ އަދި އެކަން ގިނަ މީހުންނަށް ފެންނާނެ. ކުރި މަސައްކަތަކީ ވައްކަންކުރުމޭ ބުންޏަސް ހެޔޮ، އެކަމަކު އެ ހުރިހާ ތުހުމަތެއް އަހަރެން ދޮގުކުރަން،" އޭނާ ވިދާޅުވި އެވެ.
އެމްއޭސީއެލްގެ ޑީއެމްޑީގެ މަގާމުން ލައްމާން އިސްތިއުފާ ދެއްވީ އޭނާގެ މައްޗަށް ކޮރަޕްޝަންގެ ތުހުމަތުތަކެއް އަމާޒުވެފައިވަނިކޮށެވެ. އޭނާގެ މައްޗަށް ކުރާ ތުހުމަތުތަކުގެ ތެރޭގައި އެމްއޭސީއެލްގެ ގުދަނުގައި ހުރި ކޭބަލްތަކެއް އަމިއްލަ ކުންފުނިތަކަށް ވިއްކުން ހިމެނެ އެވެ.
މީގެއިތުރުން ޗެނަލް 13 ލައްމާން ހިންގި ދުވަސްވަރު އެތަނުގެ ފައިބާ ކޭބަލް ގަތުމަށް ޖަމާކުރި ފައިސާ އަމިއްލަ ވިޔަފާރިއަށް ބޭނުންކޮށްފައިވާކަމުގެ ތުހުމަތުތައްވެސް ވަނީ ފެންމަތިވެފަ އެވެ.
މައުލޫމާތު ލިބޭ ގޮތުގަިއ ލައްމާން އެމްއޭސީއެލްގެ ޑީއެމްޑީގެ މަގާމުން އިސްތިއުފާ ދެއްވީ އެހެން މަގާމަކަށް އައްޔަންކުރާތީ އެވެ. ނަމަވެސް އޭނާގެ ބަހެއް މިކަމުގައި ލިބިފައިނުވާތީ އެކަން ކަށަވަރެއް ނުވެ އެވެ.
