އެމްޑީޕީގެ ޗެއަރޕާސަންގެ މަގާމަށް ވާދަކުރައްވާ ގަލޮޅު ދެކުނު ދާއިރާގެ މެންބަރު މީކާއީލް އަހުމަދު ނަސީމަށް، އެ ޕާޓީގެ ޕާލިމަންޓަރީ ގުރޫޕުގެ ބޮޑު ތާއީދެއް އޮތްކަން މިއަދު ހާމަކޮށްފި އެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި، އެމްޑީޕީގެ ޕާލިމަންޓަރީ ގްރޫޕުގެ 10 މެންބަރަކު ވަނީ މީކާއީލަށް ފުރިހަމައަށް ތާއީދުކުރައްވާކަން ރަސްމީކޮށް އިއުލާން ކުރައްވާފަ އެވެ.
މީކާއީލަށް ތާއީދުކުރައްވާކަން ހާމަކުރެއްވި މެންބަރުންގެ ތެރޭގައި އެމްޑީޕީ ޕާލިމަންޓަރީ ގުރޫޕުގެ ލީޑަރު އަދި ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލްގެ އިތުރުން މަޖިލީހުގެ އިސް މެންބަރުންތަކެއް ހިމެނިވަޑައިގަންނަވަ އެވެ. އޭގެ ތެރޭގައި ކެންދޫ ދާއިރާގެ މެންބަރު މައުރޫފް ޒާކިރު، މަރަދޫ ދާއިރާގެ މެންބަރު އަހުމަދު ދީދީ، ވައިކަރަދޫ ދާއިރާގެ މެންބަރު ހުސައިން ޒިޔާދު، ކަނޑިތީމު ދާއިރާގެ މެންބަރު އަމީން ފައިސަލް، މާވަށް ދާއިރާގެ މެންބަރު އަހުމަދު ޝާކިރު، ހުޅުމާލެ ދެކުނު ދާއިރާގެ މެންބަރު ޑރ. އަޙްމަދު ޝަމްހީދު، ކެޔޮދޫ ދާއިރާގެ މެންބަރު މުޙައްމަދު ނިއުޝާދު އަދި ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް ހިމެނިވަޑައިގަންނަވަ އެވެ.
މި ނޫސްވެރިންގެ ބައްދަލުވުމުގައި ވާހަކަދައްކަވަމުން ޕީޖީ ލީޑަރު އިބްރާހިމް ނާޒިލް ވިދާޅުވީ، 19 ވަނަ މަޖިލީހާއި 20 ވަނަ މަޖިލީހުގައިވެސް މީކާއީލާއެކު ވަރަށް ގާތުން މަސައްކަތް ކުރެވިފައިވާ ކަމަށެވެ. އަދި މަޖިލީހުގެ ތަޅުމުގައާއި ޕާޓީގެ އެކި މަސައްކަތްތަކުގައި މީކާއީލަކީ އަބަދުވެސް އެންމެ އިސް ދައުރެއް އަދާކުރައްވާ އެއް ބައިވެރިޔާކަން ނާޒިލް ފާހަގަކުރެއްވި އެވެ. ނާޒިލް އިތުރަށް ވިދާޅުވީ، އެމްޑީޕީގެ މެންބަރުންނަށް މަޖިލީހުގެ ތެރެއިން ކުރެވުނު މަސައްކަތުގެ ނަތީޖާ ވަރަށް ސާފުކޮށް ފެންނަން އޮތް ކަމަށާއި، އެ ހުރިހާ މަސައްކަތެއްގައިވެސް މީކާއީލަކީ އޭނާގެ އެންމެ ބޮޑު އެއް ބައިވެރިޔާ ކަމަށެވެ.
ކެންދޫ ދާއިރާގެ މެންބަރު މައުރޫފް ޒާކިރު ވަނީ ޕާޓީ އިދިކޮޅުގައި އޮތް ދަނޑިވަޅުތަކުގައި މީކާއީލް ދެއްކެވި ސާބިތުކަމާއި ކުރެއްވި ހިތްވަރުގަދަ މަސައްކަތްތަކަށް ވަރަށް ބޮޑަށް ތައުރީފު ކުރައްވާފަ އެވެ. މައުރޫފު ވިދާޅުވި ގޮތުގައި ޕާޓީއަށް ދިމާވި ކޮންމެ ގޮންޖެހުމެއްގައިވެސް މީކާއީލް ހުންނެވީ ސާބިތުކަމާއެކު ޕާޓީގެ ދިފާއުގަ އެވެ.
އޭގެ އިތުރުން، ހުޅުމާލެ ދެކުނު ދާއިރާގެ މެންބަރު ޑރ. ޝަމްހީދު ފާހަގަކުރެއްވި ގޮތުގައި، ނިމިދިޔަ ކެމްޕޭންގެ ތެރޭގައި މީކާއީލް ވަނީ ރާއްޖޭގެ 100 އަށްވުރެ ގިނަ ރަށަށް ދަތުރުކުރައްވައި، އާންމު މެންބަރުންގެ ހާލަތު ބައްލަވައި އެ މެންބަރުންގެ އަޑު އައްސަވާފަ އެވެ. މިއީ ޕާޓީގެ ޗެއާޕާސަންގެ މަގާމަށް ކުރިމަތިލައްވާ ބޭފުޅެއްގެ ކިބައިގައި ހުންނަންޖެހޭނެ މުހިންމު ސިފައެއްކަން އޭނާ ފާހަގަކުރެއްވި އެވެ.
އެމްޑީޕީގެ ކުރިއަށް އޮތް ޗެއާޕާސަން އިންތިހާބުގެ ފޯރި ގަދަވެފައިވާއިރު، މީކާއީލްގެ ކެމްޕޭން ޓީމުން ބުނަނީ ޕާޓީގެ އާންމު މެންބަރުންގެ ފަރާތުންވެސް ބޮޑު ތަރުހީބެއް ލިބެމުންދާ ކަމަށެވެ.
