ޕާކެއްގެ ތެރޭގައި ހިނގާލުމުން ނުވަތަ ގަސްތަކުގެ ތެރޭގައި ވަގުތުކޮޅެއް ހޭދަކޮށްލުމުން ހިތަށް ހަމަޖެހުން ލިބޭ ކަމަށް އިހުސާސް ކުރެވޭނަމަ، އެއީ ހަމައެކަނި ހީވާ ހީވުމެއް ނޫނެވެ. އެއީ ސީދާ އިންސާނާގެ ހަށިގަނޑާ ގުޅިފައިވާ ކަމެކެވެ.
ބޭރު ތެރޭގައި ވަގުތު ހޭދަކުރުމަކީ ހަށިގަނޑުގެ އެތެރެއަށް ފާހަގަކުރެވޭ ފަދަ ބަދަލުތަކެއް އަންނަ ކަމެކެވެ. އޭގެ ތެރޭގައި ސްޓްރެސް ހޯމޯންތައް ދަށްވުމާއި، ލޭގެ ޕްރެޝަރު ރަނގަޅުވުމާއި، އަދި ބަނޑާއި ގޮހޮރުގެ ދުޅަހެޔޮކަން އިތުރުވުން ހިމެނެ އެވެ.
މި ފައިދާތައް ހޯދުމަށްޓަކައި އެތައް ގަޑިއިރަކު ހިނގާކަށް ނުޖެހެ އެވެ. އެންމެ ބޮޑު ފައިދާއެއް ކުރަނީ އެންމެ 20 މިނެޓުގެ ވަގުތުކޮޅަކުން ކަމަށްވާތީ، ހަފުތާއަކު މަދު ފަހަރަކު މެންދުރުގެ ކެއުމުގެ ވަގުތުގައި ޕާކަކަށް ގޮސް ބެންޗެއްގައި އިށީނދެލައިގެން އިނުމަކީ ވެސް ހަށިގަނޑަށާއި ސިކުނޑިއަށް ނުހަނު ފައިދާހުރި ކަމެކެވެ.
ތިރީގައި މިވަނީ ގުދުރަތީ މާހައުލެއްގައި ވަގުތު ހޭދަކުރުމުން ސިއްހަތަށް ފައިދާކުރާ ބައެއް ގޮތްތަކެވެ.
ފެހިކަން ގަދަ ގަސްތައް ފެނުމާއި، ފައިން ގަހުގެ ވަސް ދުވުމާއި، ފަތްތައް ހެލޭ އަޑާއި ދޫނި ސޫފާސޫފީގެ މިއުޒިކީ އަޑުތައް އިވުމުން، ހަށިގަނޑުގެ އަމިއްލަ ޒާތުގައި މަސައްކަތްކުރާ ނާރުގެ ނިޒާމު (އޮޓޮނޮމިކް ނާވަސް ސިސްޓަމް) ވަގުތުން އެކަމަށް އިޖާބަދެ އެވެ.
އޮކްސްފޯޑް ޔުނިވާސިޓީގެ ބަޔޯޑައިވާސިޓީ ޕްރޮފެސަރު ބެރޮނެސް ކެތީ ވިލިސް ބީބީސީގެ "ވަޓްސް އަޕް ޑޮކްސް؟" ޕޮޑްކާސްޓުގައި ވިދާޅުވި ގޮތުގައި، ގުދުރަތީ މާހައުލެއްގައި ހުންނައިރު ލޭގެ ޕްރެޝަރު ދަށްވުމާއި، ހިތުގެ ވިންދު ޖަހާ މިންވަރަށް ބަދަލު އައިސް ހިތް މަޑުމަޑުން ވިންދު ޖަހަން ފަށަ އެވެ. މިއީ ހަށިގަނޑު ފިޒިއޮލޮޖިކަލް ގޮތުން ހަމައަކަށް އެޅޭކަމުގެ ނިޝާންތަކެވެ.
އިނގިރޭސިވިލާތުގައި ގާތްގަނޑަކަށް 20،000 މީހުން ބައިވެރިކޮށްގެން ކުރި ދިރާސާއަކުން ދެއްކި ގޮތުގައި، ހަފުތާއަކު މަދުވެގެން 120 މިނެޓު ފެހި މާހައުލެއްގައި ހޭދަކުރާ މީހުންގެ ސިއްހަތު ރަނގަޅުވެ، ނަފްސާނީ ދުޅަހެޔޮކަން އިތުރުވުމުގެ ފުރުސަތު ބޮޑެވެ.
ގުދުރަތީ މާހައުލުން ލިބޭ ފައިދާތައް ކަށަވަރުވާތީ، ބައެއް ސަރަހައްދުތަކުގައި "ގްރީން ސޯޝަލް ޕްރިސްކްރައިބިންގް" ނުވަތަ ގުދުރަތީ މާހައުލާ މީހުން ގުޅުވައިދީގެން ފަރުވާ ދިނުމުގެ މަސައްކަތް ވަނީ ފަށާފަ އެވެ. މީގެ ސަބަބުން މީހާގެ އުފާވެރިކަމާއި ދުޅަހެޔޮކަމަށް ހެޔޮ ބަދަލުތަކެއް އަންނަކަން ވަނީ ފާހަގަކުރެވިފަ އެވެ.
ޕްރޮފެސަރު ވިލިސް ވިދާޅުވާ ގޮތުގައި، ބޭރު ތެރޭގައި ވަގުތު ހޭދަކުރުމުން ހަށިގަނޑުގެ އެންޑޯކްރިން ސިސްޓަމް ހަރަކާތްތެރިވެ، ސްޓްރެސްވުމުން ނުވަތަ ހާސްވުމުން އިތުރުވާ ކޯޓިޒޯލް އަދި އެޑްރެނަލިން ފަދަ ހޯމޯންތަކުގެ މިންވަރު ދަށްކޮށްދެ އެވެ.
ޔުނިވާސިޓީ އޮފް އިލިނޯއީގެ ޕްރޮފެސަރު މިންގް ކުއޯ ބީބީސީއަށް ވިދާޅުވި ގޮތުގައި، ގުދުރަތީ މާހައުލަކީ "ހަމައަކަށް އަޅުވަންޖެހޭ ކަންކަން ހަމައަކަށް އަޅުވައި، ވަރުގަދަކުރަންޖެހޭ ކަންކަން ވަރުގަދަކޮށްދޭ" އެއްޗެކެވެ.
"ގުދުރަތީ މާހައުލެއްގައި ހޭދަކުރާ ތިން ދުވަހުގެ ބަންދަކުން ވެސް، ވައިރަސްތަކާ ހަނގުރާމަކުރުމަށް ހަށިގަނޑުގައި ހުންނަ ނިޒާމަށް ބޮޑު ކުރިއެރުމެއް ލިބޭ. އަދި އެއް މަސް ފަހުން ވެސް އެ ނިޒާމުގެ ބާރު އާދައިގެ މިންވަރަށްވުރެ 24 އިންސައްތަ އިތުރުވެފައި ހުރެދާނެ،" އޭނާ ވިދާޅުވި އެވެ.
ކުޑަ ވަގުތުކޮޅަކަށް ގުދުރަތީ މާހައުލަށް ނުކުމެލުމުން ވެސް، ކުޑަ ނަމަވެސް ދެމިގެންދާ ފަދަ ފައިދާތަކެއް ކުރާކަން ދިރާސާތަކުން ދައްކާ ކަމަށް އޭނާ ވިދާޅުވިއެވެ.
ގަސްތަކާއި ފަތުން ދުވާ ވަހަކީ ގަސްގަހާގެހިން ބޭރުކުރާ އޯގަނިކް މާއްދާތަކެކެވެ. "އެ ވަސްތައް އެތެރެއަށް ދަމާލުމުން، އޭގައި ހުންނަ ބައެއް މޮލިކިއުލްތައް ލޭގެ ތެރެއަށް ދަތުރުކުރޭ،" ޕްރޮފެސަރު ވިލިސް ވިދާޅުވި އެވެ.
ގޮހޮރަށް ބޭނުންވާ ފައިދާހުރި ބެކްޓީރިއާ ލިބުމުން ސިކުނޑިއަށް ލިބޭ ހަމަޖެހުމުގެ އިތުރުން، ގަސްގަހާގެހީގައި ހުންނަ ފައިދާހުރި ބެކްޓީރިއާތަކުގެ ސަބަބުން ހަށިގަނޑުގެ މައިކްރޯބަޔޯމް (ގޮހޮރުގައި ހުންނަ ބެކްޓީރިއާގެ ނިޒާމު) ވަރުގަދަކޮށްދެ އެވެ.
"މިއީ އަގުދީފައި ގަންނަ ޕްރޯބަޔޮޓިކްސް ނުވަތަ ބުއިންތަކުގައި ހުންނަ ފަދަ ފައިދާހުރި ބެކްޓީރިއާ،" ވިލިސް ކިޔައިދެއްވި އެވެ.
ޕްރޮފެސަރު މިންގް ކުއޯ ވަނީ ބަލިތަކަށް ހުށަހެޅޭ މިންވަރާއި ނަފްސާނީ ދުޅަހެޔޮކަމަށް މިކަމުން ކުރާ އަސަރުތައް ދިރާސާކުރައްވާފަ އެވެ. އޭނާ ވިދާޅުވާ ގޮތުގައި ބައެއް ކަހަލަ ބެކްޓީރިއާތަކަށް ނޭވާލުމުން މީހާގެ މޫޑު ރަނގަޅުކޮށްދެ އެވެ. އަދި ގަސްތަކުން ބޭރުކުރާ 'ފައިޓޮންސައިޑްސް' ކިޔާ ކެމިކަލްތަކަކީ ބަލިތަކާ ހަނގުރާމަކުރުމަށް އެހީތެރިވެދޭ މާއްދާތަކެކެވެ.
