އިންސާނާ މުސްކުޅިވުމުގެ ދުވެލި އެކި މީހުންގެ ކިބައިގައި ތަފާތުވަނީ ކޮން ސަބަބުތަކާ ހުރެ ހެއްޔެވެ؟ ބައެއް މީހުން އަވަހަށް މުސްކުޅިވާއިރު، އަނެއް ބަޔަކު ގިނަ ދުވަސްތަކެއް ވަންދެން ޒުވާންކަންމަތީ ތިބޭ ސަބަބަކީ އެތައް އަހަރެއް ވަންދެން ސައިންސްވެރިންނަށް ހޯދަމުންދާ ޖަވާބެކެވެ.
ސްޓެންފޯޑް ޔުނިވަސިޓީގެ ސައިންސްވެރިން ވަނީ މި ސުވާލަށް ޖަވާބެއް ހޯދައިދީފައެވެ. އެމީހުން ބުނާ ގޮތުގައި، މުސްކުޅިވުމަކީ އެންމެންނަށް އެއްގޮތަކަށް ހިނގާ ކަމެއް ނޫނެވެ. ކޮންމެ މީހަކުވެސް މުސްކުޅިވަނީ މައިގަނޑު ހަތަރު "ބަޔޮލޮޖިކަލް މަގަކުން" ކުރެ މަގަކުންނެވެ. މިއަށް ސައިންސްވެރިން ދީފައިވާ ނަމަކީ "އޭޖްއޯޓައިޕްސް" އެވެ.
ޕްރޮފެސަ މައިކަލް ސްނައިޑަ އިސްވެ ހުންނަވައި ކުރިއަށް ގެންދިޔަ މި ދިރާސާގައި، އުމުރުން 34 އަހަރާއި 68 އަހަރާ ދެމެދުގެ 43 މީހެއްގެ ހަށިގަނޑުގެ މޮލިކިއުލާ ބަދަލުތައް ދެ އަހަރު ދުވަސް ވަންދެން ބަލާފައިވެ އެވެ. ސައިސްވެރިންނަށް ފެނުނީ އަންތަރީސްވާ ފަދަ ކަމެކެވެ. އިންސާނާގެ ހަށިގަނޑު މުސްކުޅިވާން ފަށަނީ ތަފާތު ހަތަރު މަގަކުންނެވެ.
ޕްރޮފެސަ ސްނައިޑަ އާއި އޭނާގެ ޓީމުން ކުރިއަށް ގެންދިޔަ މި ދިރާސާގައި، އުމުރުން 34 އަހަރާއި 68 އަހަރާ ދެމެދުގެ 43 މީހަކު ދެ އަހަރު ދުވަސް ވަންދެން ބައިވެރިކުރިއެވެ. މި މުއްދަތުގައި އެމީހުންގެ ހަށިގަނޑަށް އަންނަ މޮލިކިއުލާ ބަދަލުތައް ވަރަށް ގާތުން ބަލަމުން ދިޔައެވެ.
މި ދިރާސާއިން ފާހަގަވި ހަތަރު "އޭޖްއޯޓައިޕް" އަކީ؛
- މެޓަބޮލިކް: މި ގިންތީގެ މީހުން މުސްކުޅިވަނީ ކާނާ އާއި ހަކަތަ ބޭނުންކުރާ ނިޒާމުގެ ތެރެއިންނެވެ. މީގެ މާނައަކީ އުމުރުން ދުވަސްވާއިރު ހަކުރު ބައްޔާއި ބަރުދަން އިތުރުވުމުގެ ފުރުސަތު މި މީހުންނަށް ބޮޑެވެ.
- އިމިއުން: މިއީ ދިފާއީ ނިޒާމު މުސްކުޅިވާ މީހުންނެވެ. މި މީހުންނަށް އުމުރުން ދުވަސްވާއިރު ބަލިބައްޔަށް ހުށަހެޅުމާއި، ހަށިގަނޑުގައި އިންފްލެމޭޝަން އިތުރުވުމުގެ ނުރައްކާ އޮވެއެވެ.
- ހެޕަޓިކް: މި މީހުންގެ މުސްކުޅިވުން ގުޅިފައިވަނީ ފުރަމޭއާއެވެ. ފުރަމޭގެ މަސައްކަތްތައް ދަށްވުމަކީ މި ގިންތީގެ މީހުންނަށް ކުރިމަތިވާނެ އެންމެ ބޮޑު ގޮންޖެހުމެވެ.
- ނެފްރޮޓިކް: މިއީ ކިޑްނީ ނުވަތަ ގުރުދާއާ ގުޅުންހުރި މުސްކުޅިވުމެވެ. މި ގިންތީގެ މީހުންގެ ކިޑްނީގެ މަސައްކަތްތައް ވަގުތާއެކު ދަަށްވަމުންދެއެވެ.
މިގޮތަށް މީހުން ބަހާލުމުން، އުމުރުން ދުވަސްވާއިރު ވަކިވަކި މީހުންނަށް ދިމާވާ ސިއްހީ މައްސަލަތައް ކުރިއާލާ ދެނެގަތުމަށް ފަސޭހަވެގެންދެއެވެ.
މި ދިރާސާގެ އެންމެ ފާހަގަކޮށްލެވޭ ކަމަކީ މުސްކުޅިވުމަކީ އެކަމުގެ ސްޕީޑު ދަށް ނުކުރެވޭނެ ކަމެއް ނޫން ކަމެވެ. މުސްކުޅިވުމުގެ މަރުހަލާތަކަކީ ހަމައެކަނި "ވަން-ވޭ" ދަތުރެއް ނޫނެވެ. ދިރާސާގެ ބައެއް ބައިވެރިންގެ ހަށިގަނޑުން ފެނުނު މުސްކުޅިވުމުގެ ނިޝާންތައް، ދިރާސާ ނިމުނުއިރު ވަނީ ދަށްވެފައެވެ.
މީގެ ސިއްރަކީ ދިރިއުޅުމުގެ އާދަތަކެވެ. ކެއިންބުއިމަށް ގެނައި ހެޔޮ ބަދަލުތަކާއި ކަސްރަތުގެ ސަބަބުން، ހަށިގަނޑުގެ ބަޔޮލޮޖިކަލް ގަޑި މަޑުޖައްސާލެވިދާނެކަން މިވަނީ ސާބިތުވެފައެވެ.
ޕްރޮފެސަ ސްނައިޑަ ވެސް ވަނީ އޭނާގެ އަމިއްލަ އޭޖްއޯޓައިޕް ދެނެގަތުމަށްފަހު، ބަރު އުފުލުމުގެ ކަސްރަތުތައް ފަށައި، އޭނާގެ މުސްކުޅިވުމުގެ ދުވެއްޔަށް ހެޔޮ ބަދަލެއް ގެނެސްފައެވެ.
ޕްރޮފެސަ ސްނައިޑަ ވިދާޅުވާ ގޮތުގައި، "އޭޖްއޯޓައިޕް" އަކީ ހަމައެކަނި ނަމެއް ނޫނެވެ. އެއީ ކޮންމެ މީހަކަށްވެސް ކުރިމަތިވެދާނެ ސިއްހީ ނުރައްކާތައް ދެނެގަނެ، އެކަމަށް ދުރާލާ ތައްޔާރުވުމަށް ލިބޭ ފުރުސަތެކެވެ.
މީގެ ސަބަބުން ބަލިވުމުން ފަރުވާ ހޯދުމުގެ ބަދަލުގައި، ބަލިވުމުގެ ކުރިން ރައްކާތެރިކަމުގެ ފިޔަވަޅު އެޅުމަށް މަގުފަހިވެއެވެ.
މި ދިރާސާއަކީ މުސްކުޅިވުމާ ގުޅޭގޮތުން ކުރެވުނު ވަރަށް މުހިންމު މަސައްކަތެކެވެ. މިއީ ކުރިއަށް އޮތް ޖީލުތަކަށް އުމުރު ދިގު، ދުޅަހެޔޮ، އަދި އުފާވެރި ދިރިއުޅުމެއް ހޯދައިދިނުމަށް އެޅުނު ވަރަށް ބޮޑު ފިޔަވަޅެކެވެ.
