ދިވެހިބަހުން ސިއްހީ މައުލޫމާތު އާންމުންނަށް ފޯރުކޮށްދިނުމުގެ މަގްސަދުގައި "ސިއްހަތާއި ދުނިޔެ" ނަމުގައި ޑރ. ފާތިމަތު މުފްލިހާ ލިޔުއްވާފައިވާ ފޮތެއް ނެރެފި އެވެ.
ޑރ. މުފްލިހާ ވިދާޅުވި ގޮތުގައި މިފަދަ ފޮތެއް އެކުލަވާލުމުގެ އެންމެ ބޮޑު ބޭނުމަކީ ދިވެހި ބަހުން ސިއްހީ މައުލޫމާތު ކިޔުންތެރިންނަށް ފަސޭހައިން ލިބޭނެ މަގު ފަހިކޮށްދިނުމެވެ. ސިއްހީ ދާއިރާއިން ދިވެހި ބަހުން ލިޔެފައިވާ ފޮތްތައް މަދުވުމަކީ މި ފޮތް ނެރުމަށް ލިބުނު ވަރަށް ބޮޑު ހިތްވަރެއްކަން އޭނާ ފާހަގަކުރެއްވިއެވެ.
ފަސްދޮޅަސް އަށް ސަފުހާގެ މި ފޮތް ތައްޔާރުކޮށްފައިވަނީ ހުރިހާ އުމުރުފުރައެއްގެ މީހުންނަށްވެސް ކިޔާލަން ފަސޭހަ، ގަޔާވާނެ ފަދަ ގޮތަކަށެވެ. މި ފޮތުގައި މައުލޫމާތުތައް ގެނެސްދިނުމުގައި ކުރެހުމާއި ވާހަކައިގެ އުކުޅުތައް ބޭނުންކޮށްފައިވެއެވެ.
މި ފޮތުގައި މައިގަނޑު ފަސް ބާބެއް ހިމެނޭއިރު، އޭގެ ތެރޭގައި އާންމުކޮށް ދިމާވާ ސިއްހީ މައްސަލަތަކުގެ ތެރެއިން ފެޓީ ލިވާ ނުވަތަ ފުރަމޭގައި ސަރުބީޖެހުމާއި، ޕްރޮސްޓްރޭޓް ދުޅަވުން ފަދަ މައުޟޫއުތަކަށް ތަފްސީލީ ގޮތެއްގައި އަލިއަޅުވާލާފައިވެއެވެ. މީގެ އިތުރުން ޖިސްމާނީ، ނަފުސާނީ އަދި ރޫހާނީ ދުޅަހެޔޮކަމުގެ މުހިންމުކަމާއި، އެކަކު އަނެކެއްގެ އިހުސާސްތައް ދެނެގަތުމުގެ މުހިއްމުކަން ފޮތުގައި ގެނެސްދީފައިވެ އެވެ.
ސިއްހީ ހިދުމަތް ދިނުމުގެ އެކި މަރުހަލާތަކުގައި ކަންކަން ހިނގަމުންދާ ގޮތާއި، މަސައްކަތުގެ މާހައުލުގައި ދިމާވާ ގޮންޖެހުންތަކުގެ ވާހަކަވެސް މި ފޮތުގައި ވަނީ ހިމަނާފައެވެ. ވަކިން ހާއްސަކޮށް، ހިދުމަތް ލިބިގަންނަ ފަރާތްތަކުގެ ކަންބޮޑުވުންތަކާއި، ބަލިމީހުންނާއި ޑޮކްޓަރުންނާ ދެމެދު އޮންނަ މުއާމަލާތްތައް ވަރުގަދަކުރުމުގެ މުހިންމުކަމުގެ މައްޗަށް ޑރ. މުފްލިހާ ވަނީ ބައްލަވާލައްވާފައެވެ. މިއީ ސިއްހީ ނިޒާމުގެ ތެރޭގައި ހިމެނޭ އެކި ފަރާތްތަކުގެ ދެމެދުގައި އޮންނަ ގުޅުން ހަރުދަނާކުރުމަށް އެހީތެރިވެދޭނެ މައުލޫމާތުތަކެކެވެ.
"ސިއްހަތާއި ދުނިޔެ" މި ފޮތަކީ ހަމައެކަނި ބަލިތަކުގެ މައުލޫމާތު ހިމެނޭ ފޮތެއް ނޫނެވެ. މިއީ އިންސާނީ ގުޅުންތަކާއި، އަނެކުންގެ އިހުސާސްތައް ދެނެގަތުމާއި، ދުޅަހެޔޮ ދިރިއުޅުމަކަށް ބޭނުންވާ މުހިންމު އިރުޝާދުތަކެއް ދިވެހި ބަހުން ގެނެސްދީފައިވާ އަގުހުރި މަސައްކަތެކެވެ.
