ކުރު މުއްދަތަކަށް ކުރާ ހަރުކަށި ޑައިޓްތަކަކީ ގިނަ ފަހަރަށް ދާއިމީ ހައްލެއް ލިބޭ ކަމެއް ނޫނެވެ. އެފަދަ ޑައިޓުތަކަށް ފަހު އާދައިގެ ކެއުމަށް ރުޖޫއަވާ ހިސާބުން ބަރުދަން އަނެއްކާވެސް އިތުރުވެއެވެ. ސިއްހީ މާހިރުން ވިދާޅުވާ ގޮތުގައި އެންމެ ފައިދާހުރި ގޮތަކީ ކެއުމުގެ ވައްޓަފާޅިއަށް ހެޔޮ ބަދަލުތަކެއް ގެނައުމެވެ. މި ކިޔައިދެނީ އެކަމަށް އެހީ އެކެވެ.
1. ކެއުމުގެ މިންވަރު ހިފެހެއްޓުން
ކާ އެއްޗެހީގެ މިންވަރު ކޮންޓްރޯލް ކުރުމަކީ ބަރުދަން ލުއިކުރުމަށް ވަރަށް މުހިންމު ކަމެކެވެ. ތިރީގައިވާ މިންގަނޑުތަކަށް ސަމާލުކަން ދޭށެވެ؛
- މޭވާ: އެއް ފަހަރު ކެއުމަށް މުށެއްގެ މިންވަރު
- މަސް ނުވަތަ ކުކުޅު: އަތްތިލައިގެ ބޮޑުމިން (3 އައުންސް).
- ޗީޒް: ބޮޑުވައި އިނގިލީގެ ބޮޑުމިން
- ނަޓްސް: މުށެއްގެ މިންވަރު
ފަސޭހަ އުކުޅެއް: ކާއިރު ބޮޑު ތަށީގެ ބަދަލުގައި ކުޑަ ސަލަޑް ތަށި ބޭނުންކުރާށެވެ.
2. ތަފާތު ބާވަތްތަކުގެ ކާނާ ހިމެނުން
ހަށިގަނޑަށް ބޭނުންވާ ޕްރޮޓީން، ކާބޯހައިޑްރޭޓްސް، އަދި ސިއްހަތަށް ފައިދާހުރި ފެޓްސް ހިމެނޭ ގޮތަށް ކެއުން ބައްޓަން ކުރަންވާނެއެވެ. ހާއްސަކޮށް، ފެހިކަން ގަދަ ތަރުކާރީ އާއި މޭވާ ގިނައިން ކާށެވެ. މަހާއި ކުކުޅުގެ ސަރުބީ ނެތް ބައިތައް އިހުތިޔާރު ކުރާށެވެ. ބޭކާރު ކެލޮރީސް (ހަކުރު ގިނަ ބުއިންތަކާއި ފޮނި އެއްޗެހި) އާ ދުރުވާށެވެ.
3. ކަސްރަތު ކުރުން
ހަފުތާއަކު މަދުވެގެން 150 މިނިޓު ކަސްރަތު ކުރުމަށް އަމާޒު ހިފާށެވެ. މިއީ ދުވާލަކު 3 ފަހަރު 10 މިނިޓުގެ ހަލުވި ހިނގުމަކުން ވެސް ހަމަޖެއްސިދާނެ ކަމެކެވެ.
4. ބަދިގެއާއި ކާގެ ވަކި ތަރުތީބަކުން ބެހެއްޓުން
ބަރުދަން އިތުރުވާ ފަދަ ތަކެތި (ޗިޕްސް، ބިސްކޯދު، އައިސްކްރީމް، ފޮނި ކެންޑީ) ފެންނަ ހިސާބުގައި ނުބަހައްޓާށެވެ. އޭގެ ބަދަލުގައި މޭވާ، ތަރުކާރީ، ނަޓްސް، އަދި އޮށް ފަދަ ފައިދާހުރި ތަކެތި ގޭގައި ބަހައްޓާށެވެ.
5. އެއް ފަހަރާ ގިނައިން ނުކެއުން
އެއް ފަހަރާ ގިނައިން ބަދަލުގައި، ދުވާލަކު 5 ނުވަތަ 6 ފަހަރު ކުޑަ އެތިކޮޅެއް ކެއުމަކީ ބަނޑުހައިވުން ކުޑަކޮށްދޭ ކަމެކެވެ. ކޮންމެ 3 ނުވަތަ 4 ގަޑިއިރަކުން ހަށިގަނޑަށް ފައިދާހުރި އެއްޗެއް ކާލުމަށް އާދަކުރާށެވެ.
ނޯޓް: ބަރުދަން ލުއިކުރުމުގެ ޕްލޭނެއް ފެށުމުގެ ކުރިން ޑޮކްޓަރެއްގެ ނުވަތަ ނިއުޓްރިޝަނިސްޓެއްގެ ލަފާ ހޯދުމަކީ އެންމެ ރަނގަޅު ގޮތެވެ. އަދި މި ދަތުރުގައި އެކުވެރިން ނުވަތަ އާއިލާގެ އެހީތެރިކަން ހޯދުމަކީ ސާބިތުކަމާއެކު ކުރިއަށްދާން ލިބޭނެ ހިތްވަރެކެވެ.
