ގާތް ގުޅުންތަކުގެ ސަބަބުން، އިންސާނާގެ ހަށިގަނޑުގެ ދިފާއީ ނިޒާމާއި ހަޖަމުކުރުމުގެ ނިޒާމަށް ނުފޫޒު ފޯރުވާ "ގަޓް ބެކްޓީރިއާ" ނުވަތަ ބަނޑުގައި ހުންނަ ފައިދާހުރި ޖަރާސީމުތައް އެކަކު އަނެކަކަށް ފޯރުކޮށްދޭކަން އައު ދިރާސާއަކުން ހާމަވެއްޖެ އެވެ.
ޔުނިވަރސިޓީ އޮފް އީސްޓް އެންގްލިއާއިން ކުރި މި ދިރާސާއިން ދައްކާ ގޮތުގައި، އެކުގައި އުޅޭ މީހުންނާއި ގާތް ގުޅުން ބާއްވާ ފަރާތްތަކުގެ މެދުގައި ބެކްޓީރިއާ ބަދަލުވަނީ ހަމައެކަނި އެއް މާހައުލެއްގައި އުޅޭތީއެއް ނޫނެވެ. އޭގެ ބަދަލުގައި، އެކަކު އަނެކަކާ ދެމެދު އޮންނަ ގާތް އިޖުތިމާއީ ގުޅުމަކީ މި ބަދަލު އައުމުގެ މައިގަނޑު ސަބަބެވެ.
ދޫނިތަކަކުން ހޯދި ހޯދުން
މި ހޯދުން ހޯދުމަށް ސައިންސްވެރިން ދިރާސާކުރީ ސީޝެލްސްގެ ކުޑަ ރަށެއް ކަމަށްވާ "ކަޒިން އައިލެންޑް" ގައި އުޅޭ "ސީޝެލްސް ވޯބްލާ" ނަމަކަށް ކިޔާ ދޫނިތަކެކެވެ. އެ ރަށަކީ އެކަހެރި ތަނަކަށް ވުމުން، ދޫނިތައް އެ ރަށުން ބޭރަކަށް ނުދެއެވެ. އެހެންކަމުން ކޮންމެ ދޫންޏެއްގެ ހަޔާތާއި، އޭގެ ގުޅުންތަކާއި، ސިއްހަތު ދިރާސާކުރުމަށް ސައިންސްވެރިންނަށް ފަސޭހަވިއެވެ.
ދިރާސާގައި އިސްކޮށް އުޅުއްވި ޑރ. ޗުއެން ޒަންގް ލީ ވިދާޅުވި ގޮތުގައި، ގިނަ ވަގުތު އެކުގައި ހޭދަކުރާ ދޫނިތަކުގެ ބަނޑުގައި ހުންނަ ބެކްޓީރިއާ އެއްގޮތްވާ މިންވަރު އިތުރެވެ. ހާއްސަކޮށް، ވައިގެ ތެރޭގައި ދިރިނޫޅެވޭ ބެކްޓީރިއާ ބަދަލުވަނީ ހަމައެކަނި ގާތް ގުޅުމުގެ ތެރެއިންނެވެ.
"އިޖުތިމާއީ ބައިވެރިންގެ މެދުގައި ގަޓް ބެކްޓީރިއާ ފެތުރޭ ގޮތް ހޯދުމަށްޓަކައި، އަހަރެމެން ގިނަ އަހަރުތަކެއް ވަންދެން ވަރަށް ފަރުވާތެރިކަމާއެކު ދޫނިތަކުގެ ނަޖިސް އެއްކުރިން. އަދި އިޖުތިމާއީ ގޮތުން ތަފާތު ދައުރުތައް އަދާކުރާ ދޫނިތަކުން ސަތޭކައަށްވުރެ ގިނަ ސާމްޕަލް އެއްކުރިން. އޭގެ ތެރޭގައި ޖޯޑުތަކާއި، އެހީތެރިވާ ދޫނިތަކާއި، އެއް ގްރޫޕެއްގައި އުޅޭ އެހީތެރިނުވާ ދޫނިތަކުގެ އިތުރުން ތަފާތު ގްރޫޕްތަކުގައި އުޅޭ ދޫނިތައް ހިމެނޭ،" އޭނާ ވިދާޅުވި އެވެ.
މީގެ ސަބަބުން، ހާލީގައި އެކަކު އަނެކަކާ ގާތްކޮށް އުޅޭ ދޫނިތަކާއި އެގޮތަށް ނޫޅޭ ދޫނިތަކުގެ ގަޓް ބެކްޓީރިއާ އަޅާކިޔުމުގެ ފުރުސަތު ސައިންސްވެރިންނަށް ލިބުނެވެ.
އިޖުތިމާއީ ގުޅުންތަކުގެ ސަބަބުން ބަނޑުގައި ހުންނަ ކުދި ޖަރާސީމުތައް (މައިކްރޯބްސް) އެކެއްގެ ހަށިގަނޑުން އަނެކާއަށް ބަދަލުވާ ގޮތާ ބެހޭ ވަރަށް ގިނަ މައުލޫމާތުތަކެއް މި ދިރާސާއިން ލިބިފައިވާ ކަމަށް ޑރ. ޗުއެން ވިދާޅުވި އެވެ.
އިންސާނުންނަށް މީގެ މުހިންމުކަން
މި ދިރާސާގެ ނަތީޖާއިން އިންސާނުންގެ ދިރިއުޅުމާ ބެހޭ ގޮތުން މުހިންމު ކަންތައްތަކެއް އެނގިގެންދެއެވެ. ގެއެއްގައި އެކުގައި ދިރިއުޅޭ މީހުން، އެކަކު އަނެކަކަށް ބައްދާލުމާއި، ކާތަކެތި ތައްޔާރުކުރުމުގައި ބައިވެރިވުމާއި، އަދި އެކުގައި ސޯފާގައި އިށީނދެގެން ތިބުން ފަދަ ކަންކަމުގެ ތެރެއިން މި ބެކްޓީރިއާތައް ބަދަލުވެއެވެ.
މި ގޮތަށް ބަދަލުވާ ޖަރާސީމުތަކަކީ ކާތަކެތިން ހަކަތަ އުފެއްދުމަށް އެހީތެރިވެދޭ އަދި ބަލިތަކުން ރައްކާތެރިވުމަށް ހަށިގަނޑު ވަރުގަދަކޮށްދޭ ޖަރާސީމެވެ. ގޭގައި އުޅޭ މީހުންގެ މެދުގައި ފައިދާހުރި ބެކްޓީރިއާ ބަދަލުވުމަކީ މުޅި އާއިލާގެ ދިފާއީ ނިޒާމު ވަރުގަދަވުމަށް މަގުފަހިވާ ކަމެކެވެ.
ސައިންސްވެރިން ވިދާޅުވާ ގޮތުގައި، މި ހޯދުމުގެ ސަބަބުން އަހަރެމެންނާއެކު ދިރިއުޅޭ މީހުންނަކީ ހަމައެކަނި އިޖުތިމާއީ ގޮތުން ގާތް ބައެއް ނޫންކަމާއި، އެމީހުންގެ ސަބަބުން އަހަރެމެންގެ ހަށިގަނޑުގެ އެތެރޭގެ މައިކްރޯސްކޯޕިކް ނިޒާމަށް ވެސް ބޮޑެތި ބަދަލުތަކެއް އަންނަކަން ވަނީ ކަށަވަރުވެފައެވެ.
