އިޒްރޭލާއި ލުބުނާނާ ދެމެދު ގާއިމުކުރި 10 ދުވަހުގެ ހަނގުރާމަ ހުއްޓާލުމުގެ އެއްބަސްވުމާ އެކު، އިރާނުން ބަންދުކޮށްފައިވާ ހޮރްމޫޒް ކަނޑުއޮޅި ވިޔަފާރި އުޅަނދުފަހަރަށް އަލުން ހުޅުވާލައިފިއެވެ.
އިރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވީ، ލުބުނާނުގައި ހަނގުރާމަ ހުއްޓާލާފައިވާ މުއްދަތުގައި ހުރިހާ ވިޔަފާރި އުޅަނދުފަހަރަކަށް ހޮރުމޫޒު ކަނޑުއޮޅި ހުޅުވާލެވިފައިވާ ކަމަށާއި، ނަމަވެސް ދަތުރުކުރެވޭނީ އިރާނުގެ ކަމާބެހޭ އިދާރާތަކުން ކަނޑައަޅާފައިވާ ވަކި ރޫޓުތަކަކުން ކަމަށެވެ.
މި ނިންމުމާ އެކު ދުނިޔޭގެ ބާޒާރުގައި ތެލުގެ އަގު ވަނީ ވަރަށް ބޮޑަށް ދަށަށް ގޮސްފައެވެ. އެގޮތުން ބްރެންޓް ކްރޫޑްގެ އަގު 11.5 ޕަސެންޓު ދަށަށް ގޮސް، ފީފާއެއްގެ އަގު 87.94 ޑޮލަރަށް ވަނީ ވެއްޓިފައެވެ. މިއީ ސާފު ނުކުރާ ތެލުގެ އަގެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ މިކަން ކަށަވަރުކޮށްދެއްވައި، އިރާނާ އެކު އޮތް ހަނގުރާމަ ނިމުމަކަށް ގެނައުމުގެ އެއްބަސްވުމަކާ "ވަރަށް ގާތް" ވެފައިވާ ކަމަށް ވިދާޅުވެފައެވެ.
ޓްރަމްޕް ވިދާޅުވި ގޮތުގައި އިރާނުން ދެން ދުވަހަކުވެސް ހޮރުމޫޒް ކަނޑުއޮޅި ބަންދުނުކުރަން ވަނީ އެއްބަސްވެފައެވެ. ނަމަވެސް، ރަސްމީ އެއްބަސްވުމަކަށް އާދެވެންދެން އިރާނާ ދެކޮޅަށް އޮތް ކަނޑުގެ ބްލޮކޭޑް ދެމިއޮންނާނެ ކަމަށް އޭނާ ވިދާޅުވިއެވެ.
މީގެ އިތުރުން، އިޒްރޭލުން ލުބުނާނަށް ބޮން އެޅުން މިހާރު މަނާކުރެވިފައިވާ ކަމަށްވެސް ޓްރަމްޕް ވަނީ އިއުލާން ކުރައްވާފައެވެ.
"އިޒްރޭލުން ދެން ލުބުނާނަކަށް ބޮމެއް ނާޅާނެ. އެމެރިކާއިން ވަނީ އެކަން މަނާކޮށްފައި،" ޓްރަމްޕް ވިދާޅުވިއެވެ.
މިދިޔަ ފެބްރުއަރީ މަހު 28 އިން ފެށިގެން އެމެރިކާ އާއި އިޒްރޭލުން އިރާނާ ދެކޮޅަށް ކުރަމުންދާ ހަނގުރާމައިގައި މިހާތަނަށް 3,000 އަށްވުރެ ގިނަ މީހުން ވަނީ މަރުވެފައެވެ.
އިރާނުގެ އަތުގައި ހުރި ޔުރޭނިއަމް އެމެރިކާއަށް ގެންދިއުމުގެ މަޝްވަރާތައް ކުރެވެމުންދާ ކަމަށް ޓްރަމްޕް ވިދާޅުވި ނަމަވެސް، އިރާނުގެ ދައުލަތުގެ މީޑިއާއިން ވަނީ އެފަދަ އެއްބަސްވުމެއް ނެތް ކަމަށް ބުނެފައެވެ.
