އިރާނުން ތެޔޮ ހިފައިގެންދާ ޗައިނާގެ ތެޔޮ ބޯޓުތައް ހުއްޓުވާނެ ކަމަށް އެމެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް ވިދާޅުވެއްޖެ އެވެ.
ވޮޝިންޓަންގައި ނޫސްވެރިންނާ ވާހަކަދައްކަވަމުން ބެސެންޓް ވިދާޅުވީ، ޗައިނާއަށް ބޭނުންވާ ތެޔޮ އެހެން ގައުމުތަކުން ހޯދިދާނެ ކަމަށެވެ.
"އެމީހުންނަށް ތެޔޮ ލިބޭނެ. އެކަމަކު އިރާނުގެ ތެލެއް ނުލިބޭނެ،" ބެސެންޓް ވިދާޅުވި އެވެ.
އިރާނުން އެންމެ ގިނައިން ތެޔޮ ގަންނަ ގައުމަކީ ޗައިނާ އެވެ. ބެސެންޓް ވަނީ ޗައިނާ އަކީ "އިތުބާރު ނުކުރެވޭ ބައިނަލްއަގުވާމީ ބައިވެރިއެއް"ގެ ގޮތުގައި ސިފަކުރައްވައި ފާޑުވިދާޅުވެފަ އެވެ.
އޭނާ ވިދާޅުވީ ޗައިނާއިން ތެޔޮ ރައްކާކޮށް، ބައެއް މުދާ އެކްސްޕޯޓް ކުރުން ލިމިޓް ކުރަމުންދާ ކަމަށެވެ. މި މައްސަލައިގައި ޗައިނާގެ އޮފިޝަލުންނާ ވާހަކަދައްކަވާފައިވާ ކަމަށް ބެސެންޓް ވިދާޅުވި ނަމަވެސް، މި ދެބަސްވުމުގެ ސަބަބުން މެއި މަހުގެ މެދުތެރޭގައި ރައީސް ޓްރަމްޕް، ޗައިނާއަށް ކުރައްވަން ހަމަޖެހިފައިވާ ދަތުރު ބުރޫއަރާފާނެތޯ ކުރި ސުވާލަށް ޖަވާބެއް ނުދެއްވަ އެވެ.
"އަޅުގަނޑު ދެކޭގޮތުގައި މި ދަތުރުގެ މެސެޖަކީ ހަމަޖެހުން. މިދިޔަ ހޫނު މޫސުމުން ފެށިގެން ދެ ގައުމުގެ ގުޅުން އޮތީ ވަރަށް ބޮޑަށް ހަމައަކަށް އެޅިފައި،" ބެސެންޓް ވިދާޅުވި އެވެ.
މީގެ އިތުރުން އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނީ އީރާނުގެ ބަނދަރުތައް ބަންދުކުރުމަށް ހިންގާ އޮޕަރޭޝަނަކީ ވަކި ގައުމަކަށް ބެލުމެއް ނެތް، ހުރިހާ ގައުމަކަށް ހަމަހަމަކޮށް ހިންގާ އޮޕަރޭޝަނެއް ކަމަށެވެ.
ސެންޓްކޮމް އިން ހާމަކުރި ގޮތުގައި، އިރާނުގެ އައްސޭރިފަށުގެ ސަރަހައްދުތަކާއި ބަނދަރުތަކަށް ވަންނަ އަދި ނުކުންނަ ހުރިހާ އުޅަނދުތަކަކަށް މި ބްލޮކޭޑް ހިނގާނެ އެވެ. އަދި މި އޮޕަރޭޝަންގައި އެމެރިކާގެ ނޭވީގެ ގައިޑަޑް މިސައިލް ޑިސްޓްރޯޔަރުތައް ހަރަކާތްތެރިވަމުންދާ ކަމަށްވެސް އެ އިދާރާއިން ބުނެފައިވެ އެވެ.
