އިޒްރޭލަށް ހިތިޔާރު ވިއްކުން ހުއްޓުވުމަށް އެމެރިކާގެ ސެނެޓުގައި މި ހަފުތާގައި ނެގި ވޯޓުން ނާކާމިޔާބީއާ ކުރިމަތިލާން ޖެހުނު ނަމަވެސް، އިންސާނީ ހައްގުތަކަށް މަސައްކަތްކުރާ ފަރާތްތަކުން ބުނާ ގޮތުގައި، މި ވޯޓުގެ ނަތީޖާއަކީ އިޒްރޭލުގެ ސިޔާސަތުތަކާ މެދު އެމެރިކާގެ ސިޔާސީ މަސްރަހުގައި އޮތް ހިތްހަމަނުޖެހުން ބޮޑުވަމުންދާކަން ހާމަވި ތާރީހީ ބަދަލެއް ފެށުނު ކަމުގެ ނިޝާނެކެވެ.
ބުދަ ދުވަހު ނެގި މި ވޯޓަކީ އިޒްރޭލަށް ހަތިޔާރު ވިއްކުން ހުއްޓުވުމަށް ޕްރޮގްރެސިވް ސެނެޓަރު ބާނީ ސޭންޑާސް ހުށަހެޅުއްވި ބިލެކެވެ. މި ބިލާ ދެކޮޅަށް 59 ސެނެޓަރުން ވޯޓު ދެއްވިއިރު، ބިލާ އެއްކޮޅަށް 40 ސެނެޓަރުން ވޯޓު ދެއްވިއެވެ. މީގެ ތެރޭގައި ޑިމޮކްރެޓިކް ޕާޓީގެ ގިނަ އަދަދެއްގެ ސެނެޓަރުން ހިމެނޭއިރު، އާންމުކޮށް އިޒްރޭލަށް ވަރަށް ބޮޑަށް ތާއީދުކުރެއްވި ބޭފުޅުން ވެސް މިފަހަރު ވަނީ ބިލަށް ތާއީދުކުރައްވާފައެވެ.
މި އިސްލާހުތައް ހުށަހަޅާފައިވަނީ އެމެރިކާގެ ކޮންގްރެސްގެ ހުއްދައަކާ ނުލައި، ރައީސް ޑޮނަލްޑް ޓްރަމްޕާއި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ގުޅިގެން އިރާނާ ދެކޮޅަށް ފަށާފައިވާ ހަމަލާތަކާ މެދު ކަންބޮޑުވުން އުފެދިފައިވާ ދަނޑިވަޅެއްގައެވެ.
ސެނެޓަރު ސޭންޑާސް ވިދާޅުވި ގޮތުގައި، އެމެރިކާގެ ރައްޔިތުން ބޭނުންވަނީ އެމީހުންގެ ޓެކްސް ފައިސާ ގައުމުގެ އެތެރޭގެ ކަންކަން ރަނގަޅުކުރުމަށް ހަރަދުކުރުމަށެވެ. އަދި މެދުއިރުމަތީގައި ކުށެއް ނެތް އަންހެނުންނާއި ކުޑަކުދިން މެރުމަށާއި، ނަތަންޔާހޫގެ ޣައިރު ގާނޫނީ ހަނގުރާމަތަކަށް އެ ފައިސާ ހަރަދުކުރުމާ ރައްޔިތުން ދެކޮޅު ކަމަށް އޭނާ ފާހަގަކުރެއްވިއެވެ.
ތަފާސްހިސާބުތަކުން ދައްކާ ގޮތުގައި، އިޒްރޭލަށް ހަތިޔާރު ދިނުމާ ދެކޮޅަށް ސެނެޓުގައި ލިބޭ ތާއީދު ދަނީ އަހަރަކަށް ވުރެ އަހަރެއް އިތުރުވަމުންނެވެ. 2024 ވަނަ އަހަރު މިފަދަ ބިލަކަށް 18 ވޯޓު ލިބުނުއިރު، މިފަހަރުގެ އަސްކަރީ ބުލްޑޯޒަރު ވިއްކުން ހުއްޓުވުމުގެ ބިލަށް ވަނީ 40 ވޯޓު ލިބިފައެވެ. މިއީ ކުރިއާ އަޅާބަލާއިރު ދެގުނައަށް ވުރެ ބޮޑު އިތުރުވުމެކެވެ.
ޕިއު ރިސާޗް ސެންޓަރުގެ އެންމެ ފަހުގެ ސާވޭއަކުން ދައްކާ ގޮތުގައި، އެމެރިކާގެ 60 ޕަސެންޓު މީހުން އިޒްރޭލާ މެދު ދެކެނީ ނުބައި ގޮތަކަށެވެ. ވަކިން ހާއްސަކޮށް، އުމުރުން 50 އަހަރުން ދަށުގެ ޒުވާނުންގެ މެދުގައި މި އަދަދު ވަނީ 70 ޕަސެންޓަށް އަރާފައެވެ.
ނަމަވެސް، ރިޕަބްލިކަން ސެނެޓަރުން ވަނީ މި ބިލާ ދެކޮޅަށް އިއްތިފާގުން ވޯޓު ދެއްވާފައެވެ. ސެނެޓަރު ރިކް ސޮކޮޓް ތުހުމަތު ކުރެއްވި ގޮތުގައި، މި ބިލަށް ތާއީދުކުރި ޑިމޮކްރެޓުން ވަނީ ޓެރަރިޒަމާ ބައިވެރިވެފައެވެ.
ޖުވިޝް ވޮއިސް ފޯ ޕީސް އިން ބުނާ ގޮތުގައި، ވޯޓުން ބަލިވި ނަމަވެސް، 40 ސެނެޓަރުންގެ ތާއީދު ލިބުމަކީ އެމެރިކާ އާއި އިޒްރޭލުގެ ގުޅުމުގެ ބިންގަލުގައި ބޮޑެތި ރެނދުތަކެއް ލާފައިވާކަން ހާމަކޮށްދޭ ކަމެކެވެ.
