ބައިނަލްއަގުވާމީ ހަކަތައިގެ ބާޒާރަށް ބޮޑު ލޮޅުމެއް އަރުވާފައިވާ ހޮރްމުޒް ކަނޑުއޮޅި، އިރާނުގެ އެހީތެރިކަމާ އެކު ނުވަތަ އެހީތެރިކަމާ ނުލައިވެސް، ވަރަށް އަވަހަށް ހުޅުވާލާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.
ޕާކިސްތާނުގައި އެމެރިކާ އާއި އިރާނުގެ އޮފިޝަލުންގެ މެދުގައި ބޭއްވުމަށް ހަމަޖެހިފައިވާ ސުލްހައިގެ ވާހަކަތަކުގެ ކުރިން، ހުކުރު ދުވަހު ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ އެމެރިކާއިން އެ ކަނޑުއޮޅި ހުޅުވާލާނެ ކަމަށާއި، އެކަމުގައި އެހީތެރިވުމަށް އެހެން ގައުމުތައް ވެސް ތިބީ ތައްޔާރަށް ކަމަށެވެ.
"އެއީ ފަސޭހަ ކަމަކަށް ނުވާނެ. އެކަމަކު އަޅުގަނޑު ބުނާނީ މިހެން؛ ވަރަށް އަވަހަށް އެތަން އަޅުގަނޑުމެން ހުޅުވާލާނަން،" ޓްރަމްޕް ވިދާޅުވިއެވެ.
ނަމަވެސް، މި ކަނޑުއޮޅި ހުޅުވާލާނީ ކޮން ގޮތަކަށް ކަމެއް ޓްރަމްޕް ތަފްސީލެއް ނުކުރައްވައެވެ. މީގެ އިތުރުން، ކަނޑުއޮޅިން ދަތުރުކުރާ އުޅަނދުތަކުން އިރާނުން އަމިއްލައަށް ކަނޑައަޅާފައިވާ "ޓޯލް ފީ" އެއް ނެގުމަށް ކުރާ މަސައްކަތަށް އެމެރިކާއިން އެއްބަސްނުވާނެ ކަމަށްވެސް އެމަނިކުފާނު ވިދާޅުވިއެވެ.
ހަނގުރާމަ ހުއްޓާލުމުގެ އެއްބަސްވުމަކަށް އާދެވުނު ނަމަވެސް، ކަނޑުއޮޅިން ސަލާމަތްތެރިކަމާއެކު ދަތުރުކުރުމުގެ ފުރުސަތު ދިނުމަށް އުޅަނދުތަކުން ފީއެއް ނަގަން ގަސްތުކުރާ ކަމަށް އިރާނުން ވަނީ އިޝާރާތްކޮށްފައެވެ.
ޓްރަމްޕް އިތުރަށް ވިދާޅުވީ، ކޮންމެ އެއްބަސްވުމެއްގައިވެސް އެންމެ އިސްކަމެއް ދޭނީ އިރާނަށް ނިއުކްލިއާ ހަތިޔާރު ނުލިބޭނެކަން ކަށަވަރު ކުރުމަށް ކަމަށާއި، އެކަން ހާސިލްވުމުން ކަނޑުއޮޅި "އަމިއްލައަށް" ހުޅުވިގެންދާނެ ކަމަށެވެ.
"ނިއުކްލިއާ ހަތިޔާރު ނެތުން، އެއީ މުޅި މައްސަލައިގެ 99 ޕަސެންޓު،" އެމަނިކުފާނު ވިދާޅުވިއެވެ.
ފާއިތުވި އަންގާރަ ދުވަހު ދެ ހަފުތާގެ މުއްދަތަށް ހަނގުރާމަ ހުއްޓާލުމަށް އެއްބަސްވި ނަމަވެސް، ކަނޑުއޮޅީގެ ދަތުރުފަތުރުތައް ވަނީ ގާތްގަނޑަކަށް ހުއްޓިފައެވެ. މީގެ ސަބަބުން ދުނިޔޭގެ ތެލާއި ގޭހުގެ ސަޕްލައިގެ ފަސްބައިކުޅަ އެއްބަޔަށް ވަނީ ބުރޫއަރާފައެވެ. އެސް އެންޑް ޕީ ގްލޯބަލް މާކެޓް އިންޓެލިޖެންސްގެ ތަފާސްހިސާބުތައް ދައްކާގޮތުން، ހުކުރު ދުވަހު އެ ސަރަހައްދުން ދަތުރުކުރީ އެންމެ ދެ އުޅަނދެވެ.
ލޮއިޑްސް ލިސްޓް އިންޓެލިޖެންސް އިން ރިޕޯޓްކުރާ ގޮތުގައި، ކަނޑުއޮޅި ބަންދުވުމުގެ ސަބަބުން 325 ޓޭންކަރު ހިމެނޭހެން 600 އަށްވުރެ ގިނަ އުޅަނދު ވަނީ ގަލްފްގެ ތެރޭގައި ތާށިވެފައެވެ.
މި މައްސަލައަށް ދާއިމީ ހައްލެއް ހޯދުމަށް އިސްލާމްއާބާދުގައި ބާއްވާ މަޝްވަރާތަކުގައި އެމެރިކާގެ ފަރާތުން އިސްކޮށް ހުންނަވާނީ ނައިބު ރައީސް ޖޭޑީ ވެންސް އެވެ. އީރާނުގެ ފަރާތުން އިސްކޮށް ހުންނަވާނީ އެގައުމުގެ މަޖިލީހުގެ ރައީސް މުހައްމަދު ބާގިރު ގާލިބާފް އެވެ.
