ހދ. ނޮޅިވަރަމުން ދުވާލެއްގެ މައްޗަށް އެތައް ފަހަރެއްގެ މަތިން ކަރަންޓުގެ ހިދުމަތް ކެނޑޭ މައްސަލަ ބޮޑުވެ، އާންމުންނަށް ބޮޑު ތަކުލީފަކަށްވެއްޖެ އެވެ.
ނޮޅިވަރަމް ކައުންސިލްގެ ރައީސް ޔޫސުފް މޫސާ އަދަދު އަށް ވިދާޅުވީ ނޮޅިވަރަމަށް 24 ގަޑިއިރު ކަރަންޓު ޔަގީންނުވާ ކަމަށާއި ދުވާލެއްގެ މައްޗަށް އެވްރެޖުކޮށް ހަ ވަރަކަށް ފަހަރު ކަރަންޓު ކެނޑޭ ކަމަށެވެ.
"24 ގަޑިއިރު ކަރަންޓެއް ޔަގީނެއް ނޫން ދުވާލެއްގެ ތެރޭގައި. ދުވާލަކު ހައެއްކަ ފަހަރުވެސް ކަރަންޓު ހިނގައިދާނެ. މިއަދުވެސް މިހާރު ދެފަހަރެއްގެ މަތިން ކަރަންޓު ހިނގައްޖެ،" އޭނާ ވިދާޅުވި އެވެ.
ނޮޅިވަރަމުން ކަރަންޓު ކެނޑުމުގެ މައްސަލަ ފަހަކަށް އައިސް ބޮޑުވެފައި މިވަނީ ކަރަންޓު ލޯޑު ނުހިފަހައްޓާތީ ކަމަށް ޔޫސުފް މޫސާ ވިދާޅުވި އެވެ. އޭނާ ވިދާޅުވީ ރޯދަ މަހަށްފަހު ކަރަންޓުގެ މައްސަލަ ދިމާވުން އާންމު ކަމަކަށްވެފައިވާ ކަމަށެވެ.
"ލޯޑު ނުހިފަހައްޓަނީ ޖަނަރޭޓަރު އެއްޗެހި ކުޑަވެފައި ރައްޔިތުންނަށް ބޭނުންވާ ވަރަށް ކަރަންޓު ފޯރުނުކޮށްދެވެނީ އަސްލު. މިހާރު ދެތިން މަހެއްވެއްޖެ މިގޮތަށް ކޮންޓިނުއަސްކޮށް ތަކުރާރުވާތާ. ރޯދަ މަހުގެ ފަހުން މާ ބޮޑަށް މި މައްސަލަ ތަކުރާރުވާން ފަށައިފި،" އޭނާ ވިދާޅުވި އެވެ.
ޔޫސުފް މޫސާ ވިދާޅުވީ ކަރަންޓުގެ މައްސަލަ ހައްލުކުރަން ފެނަކައާ އެކި ފަހަރު މަތިން މަޝްވަރާތައް ކުރެވި ފެނަކައިން އެދުނު ހުރިހާ ކަމެއް ކައުންސިލުން ވާނީ ފޯރުކޮށްދީފައި ކަމަށެވެ. އެގޮތުން ޓްރާންސްފޯމަރުތަކެއް ބަހައްޓާނެ ބިމެއް ހަމަޖައްސައިދޭން އެދުމުން އެކަންވެސް ހަމަޖައްސައިދިން ކަމަށް އޭނާ ވިދާޅުވި އެވެ.
މި ނޫހަށް މައުލޫމާތު ލިބޭ ގޮތުގައި ނޮޅިވަރަމުން ކަރަންޓު ކެނޑޭ މައްސަލައިގައި އެ ރަށުގެ ބައެއް ގެތަކުގައި ބޭނުންކުރާ އިލެކްޓްރޯނިކް ސާމާނަށްވެސް ވަނީ ގެއްލުންވެފަ އެވެ. ރައްޔިތުންނަށް ލިބޭ ގެއްލުންތައް ފެނަކައާ ހިއްސާކޮށްފައިވާ ކަމަށް މައުލޫމާތު ލިބެ އެވެ.
ނޮޅިވަރަމްގެ ރައްޔިތުން އެދެމުންދަނީ އެ ރަށަށް ދިމާވެފައިވާ ކަރަންޓުގެ މައްސަލަ ވީހާވެސް އަވަހަށް ހައްލުކޮށްދިނުމަށެވެ. އެ ރަށުގެ ކަރަންޓުގެ ހާލަތު ދުވަހެއް ދުވަހަކަށް ދަށްވަމުން ދިޔުމަކީ އެ ރަށުގެ ރައްޔިތުންގެ ބޮޑު ކަންބޮޑުވުމެކެވެ.
