އިދިކޮޅު އެމްޑީޕީގެ ޗެއާޕާސަންގެ އިންތިހާބަށް ކުރި އިއުލާނު ބާތިލު ކުރުމަށް، އެ ޕާޓީގެ އިސްތިއުނާފުގެ ފަނޑިޔާރު މަޖިލީހުން އެންގިތާ ތިން ދުވަސް ފާއިތުވެގެންދިޔައިރު މިހާތަނަށް އެކަމާމެދު ޕާޓީން ގޮތެއް ނިންމާފައި ނުވާކަން އެނގިއްޖެ އެވެ.
އެމްޑީޕީގެ ޗެއާޕާސަންގެ އިންތިހާބު ޖޫން 12، ގައި ބޭއްވުމަށް ނިންމައި އެކަން އެމްޑީޕީގެ ސެކްރެޓޭރިއޭޓުން އިއުލާނުކުރީ މިދިޔަ ބުރާސްފަތި ދުވަހު އެވެ. އެ އިއުލާނުގައި ބުނެފައި ވަނީ ޗެއާޕާސަންގެ އިންތިހާބުގައި ވޯޓުލެވޭނީ އެ ރޭގެ ނިޔަލަށް ޕާޓީގެ ދަފުތަރުގައި ތިބޭ މެންބަރުންނަށް ކަމަށެވެ. އަދި، އިންތިހާބަށް ކުރިމަތިލުމަށް އިއުލާނުގައި ދީފައި އޮތީ 10 ދުވަހެވެ.
ނަމަވެސް، ޗެއާޕާސަންގެ އިންތިހާބުގެ ޓައިމްލައިންއާއެކު އެމްޑީޕީގެ ސެކްރެޓޭރިއެޓުން ކުރި އިއުލާނު ބާތިލުކުރަން ޖެހިގެން އައި ހުކުރު ދުވަހު އެ ޕާޓީގެ އިސްތިއުނާފުގެ ފަނޑިޔާރު މަޖިލީހުގެ ރައީސް، އަހުމަދު އަބްދުالله އަފީފް އެންގި އެވެ.
އެމްޑީޕީގެ ވަގުތީ ޗެއާޕާސަން، އަބްދުލްޣަފޫރު މޫސާއަށް އެޑްރެސްކޮށް ފޮނުވި ސިޓީގައި އަހުމަދު އަބްދުالله ވިދާޅުވީ ޕާޓީގެ ޗެއާޕާސަންގެ އިންތިހާބުގެ ކަންތައްތައް ރާވައި ހިންގުން ޕާޓީގެ އަސާސީ ގަވާއިދުގެ ދަށުން އިސްތިއުނާފް ފަނޑިޔާރުންގެ މަޖިލީހުގެ ރައީސަށް އޮތްއިރު، އޭނާއަށް ނާންގައި ޗެއާޕާސަންގެ އިންތިހާބާ ގުޅޭ އެއްވެސް ނިންމުމެއް ނިންމުމަކީ އަސާސީ ގަވާއިދާ ހިލާފު ކަމެއް ކަމަށެވެ.
އޭނާ ވިދާޅުވީ ޗެއާޕާސަންގެ އިންތިހާބުގެ ކަންކަން އިންތިޒާމުކުރާ ބެހޭގޮތުން އިންތިހާބާބެހޭ ކޮމިޓީން ބޭއްވި ބައްދަލުވުމަކަށް ހާޒިރުވި ކަމަށެވެ. ނަމަވެސް އެ ބައްދަލުވުމުގައި ކޮމިޓީން ނިންމި އިންތިހާބުގެ ޓައިމްލައިނަކީ ކޮމިޓީންދޭ ލަފައެއް ކަމަށާއި ޕާޓީގެ ލީޑަރުންނާއި ޗެއާއާ މަޝްވަރާ ކުރުމަށްފަހު އެކުގައި ގޮތެއް ނިންމާނެ ކަމަށް އޭނާ ވިދާޅުވި އެވެ.
މީގެއިތުރުން އެމްޑީޕީގެ ގިނަ އަދަދެއްގެ މެންބަރުން ވަގަށް ޕީއެންސީއަށް ވައްދާފައިވާއިރު، އެ މެންބަރުން އަލުން ޕާޓީއަށް ވަނުމުގެ ފުރުސަތު ނުދީ އިންތިހާބު ކުރިއަށްގެންދިޔުމަކީ ކެންޑިޑޭޓުންނާއި މެންބަރުންގެ އިންތިހާބީ ހައްގުތަކަށް އުނިކަން އަންނާނެ ކަމެއް ކަމަށް އަހުމަދު އަބްދުالله ގެ ސިޓީގައި ވިދާޅުވި އެވެ.
އެމްޑީޕީގެ އަސާސީ ގަވާއިދުގެ 46 ވަނަ މާއްދާގައި ބަޔާން ކޮށްފައި ވަނީ އެ ޕާޓީގެ ޗެއާޕާސަންގެ އިންތިހާބުގެ ކަންކަން ހިންގަން ޖެހޭނީ އިސްތިއުނާފުގެ ފަނޑިޔާރު މަޖިލީހުގެ ރައީސް ކަމަށެވެ. އަދި، އެ ގަވާއިދުގެ 69 ވަނަ މާއްދާގައި، ޗެއާޕާސަންގެ މަސްއޫލިއްޔަތުތަކުގެ ތެރޭގައި، (ށ) ގައި ބަޔާން ކޮށްފައި ވަނީ ޗެއާޕާސަންގެ އިންތިހާބު ފިޔަވައި އެހެން ހުރިހާ އިންތިހާބެއް އިންތިޒާމުކޮށް ރޭވުމަކީ ޗެއާޕާސަންގެ ޒިންމާއެއް ކަމަށެވެ.
އަސާސީ ގަވާއިދުގައި އެހެން ބަޔާން ކޮށްފައި އޮތް ނަމަވެސް، ޗެއާޕާސަންގެ ބެލުމުގެ ދަށުން ހިންގާ ސެކްރެޓޭރިއޭޓުން ކުރި އިއުލާނު މިހައިތަނަށް ވެސް ބާތިލެއް ނުކުރެ އެވެ. އެކަމާ ގުޅޭގޮތުން އޭނާގެ ބަހެއް ހޯދަން ގުޅައި މެސެޖުކުރުމުން ވެސް ޣަފޫރު ޖަވާބެއް ނުދެއްވި އެވެ.
އެމްޑީޕީގެ ޗެއާޕާސަން ކަމަށް މިހައިތަނަށް ޝައުގުވެރިކަން ފާޅުކުރައްވާފައި ވަނީ ކުރީގެ ރައީސް، މުހައްމަދު ނަޝީދު އާއި ގަލޮޅު ދެކުނު ދާއިރާގެ މެންބަރު، މީކާއިލް ނަސީމްގެ އިތުރުން، އެމްޑީޕީގެ ކުރީގެ ރައީސްކަން ކުރެއްވި އަލްހާން ފަހުމީ އެވެ.
އޭގެ ތެރެއިން، ނަޝީދުގެ ފަހަތުގައި ކުރީގެ ޗެއާޕާސަން ފައްޔާޒް އިސްމާއިލް އާއި، ނަޝީދުގެ ސަޕޯޓަރުން ތިބިއިރު، މީކާއިލްގެ ފަހަތުގައި އޮތީ ކުރީގެ ރައީސް، އިބްރާހިމް މުހައްމަދު ސޯލިހުގެ ސަޕޯޓަރުންނާއި މަޖިލިސް މެންބަރުންނެވެ.
