ޒިއުރިކް (އޭޕްރީލް 25) - މި ފަހަރުގެ ޗެމްޕިއަންސް ލީގުގެ މެޗެއްގެ ތެރެއިން، ރެއާލް މެޑްރިޑްގެ ވިނީޝިއުސް ޖޫނިއާއާ ނަސްލީ ގޮތުން ދިމާކުރި ބެންފީކާގެ ޖިއަންލޫކާ ޕްރެސްޓިއާނީގެ މައްސަލަ ބެލުމަށް ފަހު އޭނާ ހަ މެޗަށް ސަސްޕެންޑްކުރަން ވަނީ ނިންމައިފައި
ވިނީޝިއުސްގެ ގޯލުން 1-0 އިން ރެއާލުން ބެންފީކާ ބަލިކުރި މެޗުގައި، މި ލަނޑު ޖަަހައި، އުފާފާޅުކުރުމަށް ފަހު، ވިނީޝިއުސްއާ ދިމާލަށް ނަސްލީ ގޮތުން ދިމާކުރުމަށް ބެންފީކާގެ ޕްރެސްޓިއާނީ، 20، ބުނި އެއްޗެއްގެ ސަބަބުން މެޗުގެ ރެފްރީ ފްރަންކޮއިސް ލެޓެކްސިއާ އަށް އެކަން އަންގައި، ރެއާލްގެ ކުޅުންތެރިން ދަނޑުން ފޭބި އެވެ. އެ ކަމާ ހުރެ 10 މިނިޓަށް މެޗު މެދުކަނޑާލަން ޖެހުނެވެ.
ވިނީޝިއުސްއާ ދިމާކޮށްލި ޕްރެސްޓިއާނީ މެޗަކަށް ސަސްޕެންޑް
ރެއާލް މެޑްރިޑްގެ ވިނީޝިއުސް ޖޫނިއާއާ ނަސްލީ ގޮތުން ދިމާކޮށްލި ކަމަށް ބުނާ މައްސަލައެއްގައި، ބެންފީކާގެ ޖިއަންލޫކާ ޕްރެސްްޓިއާނީ ވަގުތީ ގޮތުން މެޗަކަށް ވަނީ ސަސްޕެންޑްކޮށްފައި،
ޕްރެސްޓިއާނީގެ މައްސަލަ ތަހުގީގުކުރަމުން އަންނާތީވެ، ޔުއެފާ އިން ނިންމީ މި މުއްދަތުގެ ތެރޭގައި، ރެއާލާއި ބެންފީކާ އިން ކުޅޭ ދެ ވަނަ ލެގުގެ މެޗު އޮތުމާ އެކު، ސީރިއަސް މައްސަލައެއްގެ ތުހުމަތެއް އޮތް ކުޅުންތެރިއެއްގެ ގޮތުގައި ޕްރެސްޓިއާނީ ފެންނާތީވެ، އޭނާ މެޗަކަށް ސަސްޕެންޑް ކުރުމަށެވެ.
ޕްރެސްޓިއާނީ، ވަގުތީ ގޮތުން ސަސްޕެންޑްކުރީ، މި މައްސަލައިގައި އޭނާ ޖަވާބުދާރީވި ގޮތުން ދައްކާފައިވާ ވާހަކަތަކަށް ބަލައި، އޭނާ އަށް ވަގުތީ ސަސްޕެންޝަނެއް ދޭން ފެންނާތީވެ އެވެ. މައްސަލަ އެއްކޮށް ބެލުމަށް ފަހު، ޔުއެފާ އިން ނިންމީ ޕްރެސްޓިއާނީ ހަ މެޗަށް ސަސްޕެންޑް ކުރުމަށެެވެ.
މީގެ ކުރިން ވެސް ޕްރެސްޓިއާނީ ދިން އިންޓަވިއުތަކުގައި ވަނީ، ވިނީޝިއުސްއާ ނަސްލީ ގޮތުން ދިމާނުކުރާ ކަމަށް ބުނެފަ އެވެ. ޕްރެސްޓިއާނީއާ ހަވާލާދީ ޕޯޗުގީސް އަދި ދެކުނު އެމެރިކާގެ ގިނަ މީޑިއާތަކުން ރިޕޯޓްކުރާ ގޮތުގައި، ވިނީޝިއުސްއާ ނަސްލީ ގޮތުން ދިމާކުރާ ފަދަ އިބާރާތެއް ޕްރެސްޓިއާނީ ބޭނުމެއް ނުކުރާ ކަމަށް ވަނީ ބުނެފަ އެވެ. އަދި، ވިނީޝިއުސްއާ ދިމާލަށް ޕްރެސްޓިއާނީ ބުނެފައިވަނީ، "ރާމާމަކުނެކޭ" އެއް ނޫން ކަމަށާއި ބުނީ "ބްރަދާ" އޭ ކަމަށް ވެސް އެ ހަބަރުތަކުގަިއ ވަނީ ހިމަނައިފަ އެވެ.
އެކަމަކު، ޔުއެފާ އިން ތަހުގީގުކުރިއިރު، ވީޑިއޯ އެވިޑެންސާއި އެހެނިހެން ހެކިތަކާއި ރެފްރީގެ ރިޕޯޓަށް ބަލާއިރު، ޕްރެސްޓިއާނީގެ މައްޗަށް މި ކުށް ސާބިތުވެ އެެވެ.
