ޑެޕިއުޓީ ކޮންޓްރޯލާ އޮފް އިމިގްރޭޝަންގެ މަގާމުން އަހްމަދު އަޝްފާން ވަކިކޮށް، އޭނާ ޔޫތު އެންޑް ސްޕޯޓްސް މިނިސްޓްރީގެ ޑެޕިއުޓީ މިނިސްޓަރަކަށް އައްޔަންކޮށްފި އެވެ.
އިމިގްރޭޝަންގައި ދިގު މުދްދަތެއްގައި ހިދުމަތްކޮށްފައިވާ އަޝްފާން ވަކިކޮށް ޔޫތު މިނިސްޓްރީގެ ޑެޕިއުޓީ މިނިސްޓަރަކަށް އައްޔަންކުރީ ކީއްވެގެން ކަމެއް މިހާތަނަށް ނޭގެ އެވެ.
އިމިގްރޭޝަންގައި އޮފިސަރެއްގެ ވަޒީފާގައި 18 އަހަރު ހިދުމަތްކޮށްފައިވާ އަޝްފާން އިމިގްރޭޝަންގެ ޑެޕިއުޓީ ކޮންޓްރޯލަކަށް އައްޔަންކުރީ 2024 ވަނަ އަހަރުގެ އެޕްރީލް މަހު އެވެ.
ރާއްޖޭގައި އުފެދުނު އެންމެ މޮޅު ފުޓުބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ގެ އެއްބަނޑު އެއްބަފާ ބޭބެ އަޝްފާން ވަނީ ފުރަތަމަ ޑިވިޝަންގެ ކްލަބްތަކަށް މީގެ ކުރިން ކުޅެފަ އެވެ.
އިމިގްރޭޝަން ކޮންޓްރޯލަރަކީ ކުރީގެ ކޮމިޝަނާ އޮފް ޕޮލިސް އަހުމަދު ފަސީހު އެވެ. އޭނާ އެ މަގާމަށް އައްޔަންކުރީ މި ސަރުކާރުގައި އެންމެ ފުރަތަމަ ކޮންޓްރޯލަރަކަށް ހަމަޖެއްސި މުހައްމަދު ޝަމްއާން ވަހީދު ވަކިކުރުމަށްފަހު އެވެ.
ޝަމްއާން ވަކިކުރި ފަހުން އޭނާ މަގާމުގެ ބޭނުން ނަހަމަ ގޮތުގައި ހިފައި ބިދޭސީއެއްގެ އަތުން ފައިސާ ނެގި ކަމުގެ ތުހުމަތުގައި ހައްޔަރުކޮށް ވާނުވާ ބަންދުގައި 278 ދުވަސް ހޭދަކުރި އެވެ. އޭނާ މިހާރު ބަންދުން ދޫކޮށްލާފައިވާއިރު، އޭނާގެ މައްޗަށް ޝަރީއަތް ދަނީ ކުރެވެމުންނެވެ.
