މޯލްޑިވްސް ނެޝަނަލް ޔުނިވާސިޓީ (އެމްއެންޔޫ) ގެ އެކޮމޮޑޭޝަން ބްލޮކް މަޖްދުއްދީން ދަނާލުގައި ދިރިއުޅެމުންދިޔަ ދަރިވަރަކު މިދިޔަ ހޯމަ ދުވަހު އަމިއްލައަށް މަރުވުމުގެ ކުރިން ފުލުހުންގެ ވިކްޓިމް ސަޕޯޓު ޔުނިޓާ ދެއްކި ވާހަކަތައް ހޯމް މިނިސްޓަރު އަލީ އިހުސާން މިއަދު ހާމަކުރެއްވުމުން ގިނަ ބައެއްގެ ފާޑުކިޔުން އަމާޒުވެއްޖެ އެވެ.
ހޯމް މިނިސްޓްރީން ބޭއްވި ނޫސްވެރިންގެ ބައްދަލުވުމުގައި އިހުސާން ވިދާޅުވީ ދަނާލުގައި މަރުވި ކުއްޖާ ފުލުހުންގެ ވިކްޓިމް ސަޕޯޓް ޔުނިޓަށް ހަތް ފަހަރު މެސެޖުކޮށްފައިވާ ކަމަށެވެ. އަދި ފުލުހުން ވެސް އެ ދަރިވަރަށް ދެ ފަހަރު މެސެޖު ކުރި ކަމަށް މިނިސްޓަރު ވިދާޅުވި އެވެ.
އެ ދަރިވަރު މަރުވެފައި ހުރި މަންޒަރު ފެނުނީ ފުލުހުން ދަނާލަށް ގޮސް ބެލިބެލުމުން ކަމަށް ވެސް މިނިސްޓަރު ވިދާޅުވި އެވެ. އިހުސާން ވިދާޅުވީ އެ ދަރިވަރަކީ، އަމިއްލައަށް މަރުވުމުގެ ޝުއޫރުތަކެއް މީގެ ކުރިން ވެސް ހިތަށްވެރިވާ ކުއްޖެއް ކަމަށާއި މީގެ ކުރިން ވެސް ފުލުހުން އެ ދަރިވަރަށް އެޓެންޑުކުރި ކަމަށެވެ.
"ކޮޓަރީގެ ބޮކިތައް ނިއްވާފައި ހުރުމުން ފެން ލައިޓު ތްރޫކޮށް ބެލިއިރުގައި މި ހަދިސާ ހިނގާފައިވާ ތަން ފެނުނު. އެ ހިސާބުން ފެން ލައިޓުގެ ޒަރިއްޔާއިން ފުލުހުން ސީނަށް ވަދެފައި ވަނީ،" އިހުސާން ވިދާޅުވި އެވެ.
މިކަމާ ގުޅިގެން ސޯޝަލް މީޑިއާގައި މީހުން ބުނަމުންދަނީ މިނިސްޓަރަކު ގައުމީ ޓީވީގައި ވިކްޓިމް ސަޕޯޓާ ދަރިވަރު ދެއްކި ވާހަކަ ހާމަކުރުމަކީ ވަރަށް ޒިންމާދާރުކަން ކުޑަކޮށް ކުރި ކަމެއް ކަމަށެވެ. އެމީހުން ބުނާ ގޮތުގައި ވިކްޓިމް ސަޕޯޓާ ދެއްކި ވާހަކަ މިނިސްޓަރު ހާމަކުރުމަކީ އެތަނަށް މީހުން ގުޅަން ފަސްޖެހޭނެ ކަމެއް ކަމަށެވެ.
މީގެއިތުރުން މިނިސްޓަރު ވަނީ ދަރިވަރާއި އޭނާގެ ބޭބެއާ ދެމެދު ކުރެވުނު މުއާމަލާތުގެ މައުލޫމާތުވެސް ހާމަކޮށްފަ އެވެ. އެ މައުލޫމާތު ހާމަކުރުމުން ވެސް މީހުން ދަނީ އެކަމާ ގުޅިގެން ވެސް ކަންބޮޑުވުން ފާޅުކުރަމުންނެވެ.
ދަރިވަރު މަރުވި ހާދިސާއާ ގުޅިގެން ގިނަ ބަޔަކަށް އޭގެ އަސަރުކޮށްފައިވާ ދަނޑިވަޅެއްގައި މިފަދަ މައުލޫމާތު ހާމަކުރުމަކީ ވެސް ނުރައްކާތެރި ކަމެއް ގޮތުގައި ގިނަ ބަޔަކު ދަނީ ސިފަކުރަމުންނެވެ.
ހ. ފެންޓެނޯއީ ގޭގެ ނުވަ ވަނަ ފަންގިފިލާގެ ސިޑި ގޮޅީގައި ހުންނަ ފެން ލައިޓުން ހ. މިޓާޒް ގޭގެ ފުރާޅު މައްޗަށް ހައްވާ ޔުމްނު ރަޝީދު ވެއްޓުނު މައްސަލައާ ގުޅިގެން އިޖުތިމާއީ މިންގަނޑާ ހިލާފު މަންޒަރު ފެންނަ ސީސީޓީވީ ފުޓޭޖުތައް މިނިސްޓަރު އިހުސާން ހާމަކުރެއްވުމުން އެކަމާ ގުޅިގެން ވެސް ގިނަ ބައެއްގެ ފާޑުކިޔުން އަމާޒުވި އެވެ.
މަރުވި ކުއްޖާ އާއި ފުލުހުންނާ ދެމެދު ކޮށްފައިވާ މުއާމަލާތް:
އޭޕްރީލް 20، ވަނަ ދުވަހުގެ ރޭ
- 20:40 - ދަރިވަރު: "އައި އެމް ސޯ ކްލޯސް ޓު ގިވް އަޕް"
- 20:49 - ވިކްޓިމް ސަޕޯޓް ޔުނިޓް: "ހައި. ވުޑް ޔޫ ލައިކް ޓު ޝެއާ ވިތު އަސް"
- 20:50 - ދަރިވަރު: "އައި ޖަސްޓް ކާންޓް ކޮންޓްރޯލް މައި ތޯޓްސް"
- 20:53 - ދަރިވަރު: "ޕްލީޒް ޑޯންޓް ކޯލް އެނީވަން"
- 20:53 - ދަރިވަރު: "އައި އެމް އޯކޭ. އައި އެމް ގޮއިން ޓު ބީ އޯކޭ"
- 20:53 - ދަރިވަރު: "އައި ހޭވް ބީން އޯކޭ"
- 20:53 - ދަރިވަރު: "އައި އެމް ގޮއިން ފޯ އަ ވޯކް"
- 24:38 - ދަރިވަރު: "އައި އެމް ގޯން"
- 00:42 - ވިކްޓިމް ސަޕޯޓް ޔުނިޓް: "ވަޓް ޑޫ ޔޫ މީން ބައި ދެޓް. ހައު ކޭން އައި ހެލްޕް ޔޫ. ވުޑް ޔޫ ލައިކް ޓު ގޯ ޓު ހޮސްޕިޓަލް އޯ ޓޯކް ޓު މީ.
- 00:57 - ދަރިވަރުގެ ވައިބާ ނަންބަރު އޮފްލައިން ވި
- 01:02 - ދަރިވަރުގެ ބޭބެއަށް ފުލުހުން ގުޅި. އެހީތެރިކަން ފޯރުކޮށްދިނުމަށް އެދުން. ދަރިވަރުގެ ބޭބެއަށް 00:36 ގައި މެސެޖެއް ކޮށްފައިވާ ކަމަށް އެނގުނު. އެ މެސެޖުގައި ބުނެފައި ވަނީ، "އައި އެމް ނޮޓް ބޮދާޑް"
- 01:03 - ފުލުހުންގެ ވިކްޓިމް ސަޕޯޓް ޔުނިޓުން ފުލުހުންގެ ކޮމާންޑަށް ގުޅައި ދަނާލަށް ފުލުހުން ފޮނުވައިދިނުމަށް އެދުނު
- 01:04 - ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަން ޑިޕާޓްމަންޓުގެ ޑިއުޓީ އިންވެސްޓިގޭޝަން އޮފިސަރަށް އެ މައުލޫމާތު ލިބުނު
- 01:08 - ފުލުހުން ދަނާލަށް ދިޔަ 01:14 - ދަރިވަރުގެ ކޮޓަރިއަކީ ކޮބައިކަން ހޯދުމުގެ މަސައްކަތް ކުރިއަށް ގެންދިޔަ.
- 01:32 - ދަރިވަރުގެ ކޮޓަރިއަކީ ކޮބައިކަން ހޯދުނު. އަދި ކޮޓަރީގެ ފެން ލައިޓުން ބެލި އިރު ހާދިސާ ހިނގާފައި ހުރި މަންޒަރު ފުލުހުންނަށް ފެނުނު.
ދަނާލުގައި ނިޔާވީ އުމުރުން 18 އަހަރުގެ ދަރިވަރެކެވެ. އޭނާ މަރުވުމުގެ ކުރިން ފުލުހުން އެހީތެރިކަމަށް އެދުނުކަމުގެ އަޑު މީގެ ކުރިން ވެސް އޮތީ ފެތުރިފަ އެވެ.
މި މައްސަލަ ފުލުހުން ދަނީ ތަހުގީގު ކުރަމުންނެވެ. އަދި މައްސަލައާ ގުޅިގެން މައުލޫމާތު ފެތުރުމުގެ ކުރިން އެ މައުލޫމާތު ކަށަވަރުކުރުމަށް ފުލުހުން ވަނީ އެދިފަ އެވެ.
