އިރާނުން ހޮރްމޫޒް ކަނޑުއޮޅި ވިޔަފާރި އުޅަނދުފަހަރަށް އަލުން ބަންދުކޮށްފި ކަމަށާއި، އެ ސަރަހައްދާ ކައިރިވާ ކޮންމެ އުޅަނދަކަށް ހަމަލާދޭނެ ކަމަށް އެ ގައުމުން ބުނެފި އެވެ.
އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން ބުނި ގޮތުގައި މި ނިންމުން ނިންމީ އެމެރިކާއިން އިރާނާ ދެކޮޅަށް ކުރިއަށްގެންދާ ކަނޑުގެ ބްލޮކޭޑް ނުވަތަ ބަންދުކުރުންތަކާ ގުޅިގެންނެވެ. މި ފިޔަވަޅު އަޅާފައި މިވަނީ ދުނިޔޭގެ ވިޔަފާރީގައި މުހިންމު ދައުރެއް އަދާކުރާ މި ކަނޑުއޮޅި ވަގުތީ ގޮތުން ހުޅުވާލިކަން އިރާނުގެ ފޮރިން މިނިސްޓަރު އިއުލާން ކުރެއްވިތާ އެއް ދުވަސް ފަހުންނެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، އިރާނުން މި ކަނޑުއޮޅި ބަންދުކޮށްގެން އެމެރިކާއަށް "ބިރުދައްކައިގެން" ކަންކަން ހާސިލު ނުކުރެވޭނެ ކަމަށެވެ.
އައި.އާރް.ޖީ.ސީގެ ނޭވީން ހޮނިހިރު ދުވަހު ނެރުނު ބަޔާނެއްގައި އިންޒާރު ދީފައިވަނީ، ޕާޝިއަން ގަލްފް ނުވަތަ އޮމާން ކަނޑުގައި ބަނދަރުކޮށްފައިވާ އެއްވެސް އުޅަނދެއް އެ ތަނުން ދަތުރުކޮށްގެން ނުވާނެ ކަމަށެވެ.
އެ އިދާރާއިން ބުނި ގޮތުގައި ހުކުރު ދުވަހުގެ ރެއިން ފެށިގެން އެމީހުންގެ ބެލުމުގެ ދަށުން ބައެއް އުޅަނދުތައް ކަނޑުއޮޅި ހުރަސްކޮށްފައިވީ ނަމަވެސް، އެމެރިކާއިން އިރާނުގެ ބަނދަރުތައް ބަންދުކޮށްފައި އޮތް އޮތުން ނިމުމަކަށް ގެންނަންދެން ކަނޑުއޮޅި އަލުން ބަންދުވާނެ އެވެ.
"ހޮރްމޫޒް ކަނޑުއޮޅިއާ ކައިރިވުމަކީ ދުޝްމަނުންނަށް އެއްބާރުލުން ދިނުން ކަމުގައި ބެލެވޭނެ. އަދި އެފަދަ އުޅަނދުތަކަށް ހަމަލާދެވޭނެ،" އައި.އާރް.ޖީ.ސީގެ ބަޔާނުގައިވެ އެވެ.
ދެ ގައުމުގެ ދެމެދުގައި ސުލްހައިގެ އެއްބަސްވުމަކަށް އާދެވެންދެން އިރާނުގެ ބަނދަރުތައް ބަންދުކޮށްފައި ބޭއްވުން ކުރިއަށްދާނެ ކަމަށް ޓްރަމްޕް ހުކުރު ދުވަހު ވަނީ ވިދާޅުވެފަ އެވެ. މިހާރު ހަނގުރާމަ ހުއްޓާލުމުގެ އެއްބަސްވުން އޭޕްރިލް މަހުގެ 22 ވަނަ ދުވަހަށް ހަމަވާނެ އެވެ.
އެމެރިކާއިން ބުނި ގޮތުގައި އޭޕްރިލް 13 ވަނަ ދުވަހު ބްލޮކޭޑް ތަންފީޒުކުރަން ފެށި ފަހުން، އިރާނުގެ ބަނދަރުތަކަށް ވަންނަން އުޅުނު 23 އުޅަނދެއް ވަނީ ފަސްއަނބުރާ ފޮނުވާލާފަ އެވެ.
އިރާނުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސް.އެން.އެސް.ސީ) އިން ބުނީ މިއީ ހަނގުރާމަ ހުއްޓާލުމުގެ އެއްބަސްވުމާ ޚިލާފު އަމަލެއް ކަމަށާއި، އެމެރިކާގެ ބްލޮކޭޑް ދެމިއޮތްހާ ހިނދަކު ކަނޑުއޮޅި ހުޅުވުން ހުއްޓުވާނެ ކަމަށެވެ.
ހަނގުރާމަ ނިމުމަކަށް ގެނައުމަށް ކުރެވޭ މަޝްވަރާތަކާ ގުޅޭގޮތުން އެސް.އެން.އެސް.ސީ އިން ބުނީ، އެމެރިކާއިން އާ ހުށަހެޅުންތަކެއް ހުށަހަޅާފައިވާ ކަމަށާއި، އެ ހުށަހެޅުންތައް މިހާރު ދިރާސާކުރަމުންދާ ކަމަށެވެ. ނަމަވެސް އަދި އެއަށް ރަސްމީ ޖަވާބެއް ދީފައެއް ނުވެ އެވެ. މި މަހުގެ ކުރީކޮޅު ބޭއްވި ސުލްހައިގެ ވާހަކަތައް ނިމުނީ އެއްވެސް އެއްބަސްވުމަކަށް ނާދެވި އެވެ.
އިރާނާއެކު ކުރިއަށްދާ މަޝްވަރާތަކާ ގުޅޭ ގޮތުން ހޮނިހިރު ދުވަހު ވާހަކަދައްކަވަމުން ޓްރަމްޕް ވިދާޅުވީ، ވަރަށް ރަނގަޅު ވާހަކަތަކެއް ދެކެވެމުންދާ ކަމަށާއި، ކަންކަން ދަނީ ވަރަށް އުންމީދީ ގޮތަކަށް ކަމަށެވެ.
