އެމެރިކާގެ ސިފައިން އީރާނުގެ އުޅަނދަކަށް ބަޑިޖަހައި، އެ އުޅަނދު ހުއްޓުވުމާ ގުޅިގެން ބަދަލުހިފުމުގެ ގޮތުން އީރާނުގެ އަސްކަރިއްޔާއިން އާދީއްތަ ދުވަހު އެމެރިކާގެ ބައެއް އުޅަނދުތަކަށް ޑްރޯން ހަމަލާތަކެއް ދީފި ކަމަށް އެ ގައުމުގެ މީޑިއާތަކުން ރިޕޯޓްކޮށްފި އެވެ.
އީރާނުގެ ތަސްނީމް ނޫސް އެޖެންސީން ރިޕޯޓްކޮށްފައިވާ ގޮތުގައި، އޮމާން ކަނޑުން ދަތުރުކުރި "ޓޫސްކާ" ނަމަކަށް ކިޔާ ކޮންޓޭނަރު އުފުލާ އުޅަނދަށް އެމެރިކާ ސިފައިން އެރި ފަހުން، އީރާނުން ވަނީ އެމެރިކާގެ އުޅަނދުތަކަށް އަމާޒުކޮށް ޑްރޯން ހަމަލާތަކެއް ފޮނުވާލާފަ އެވެ. ނަމަވެސް އެ ހަމަލާތައް އަމާޒުކުރީ އަސްކަރީ އުޅަނދުތަކަކަށް ކަމެއް ނުވަތަ ވިޔަފާރި އުޅަނދުތަކަކަށް ކަމެއް އެ އެޖެންސީން ހާމަކޮށްފައެއް ނުވެ އެވެ.
އެމެރިކާގެ ސިފައިން އީރާނުގެ އުޅަނދު ހިފެހެއްޓިކަން އެ ގައުމުން ކުރިން ކަށަވަރުކޮށްދީފައިވާއިރު، މި އަމަލުގެ ބަދަލު "މާލަސްތަކެއް ނުވެ" ހިފާނެ ކަމުގެ އިންޒާރު ވެސް ވަނީ ދީފައެވެ. އީރާނުން ބުނާ ގޮތުގައި މިއީ ޕާކިސްތާނުން މެދުވެރިއެއްގެ ދައުރު އަދާކޮށްގެން އޭޕްރިލް 7 ވަނަ ދުވަހު އިއުލާންކުރި ދެ ހަފުތާއަށް ހަމަލާބަދަލުކުރުން ހުއްޓާލުމުގެ އެއްބަސްވުމާ އެމެރިކާއިން ހިލާފުވުމެވެ. އެ އެއްބަސްވުމަށް މިހާތަނަށް ދެ ފަރާތުން ވެސް ދިޔައީ ބޮޑުތަނުން އަމަލުކުރަމުންނެވެ.
އީރާނުގެ ފާރްސް ނޫހުން ރިޕޯޓްކުރި ގޮތުގައި، އެ ގައުމުގެ "ޚާތަމް އަލް-އަންބިޔާ" މަރުކަޒީ ހެޑްކުއާޓާާސްއިން ބުނެފައިވަނީ އެމެރިކާ ސިފައިން އެ އުޅަނދަށް އަމާޒުކޮށް ހަމަލާދީ، އޭގެ ނެވިގޭޝަން ސިސްޓަމް ހަލާކުކޮށްލުމަށް ފަހު އުޅަނދަށް އަރާފައިވަނީ ހަމަލާބަދަލުކުރުން ހުއްޓާލުމުގެ އެއްބަސްވުމާ ހިލާފަށް ކަމަށެވެ.
އުޅަނދުތައް ދަތުރުކުރާ މަގު ދައްކައިދޭ ޑޭޓާތަކުން އެނގޭ ގޮތުގައި، "ޓޫސްކާ" އުޅަނދު މެލޭޝިއާގެ ޕޯޓް ކްލޭންގުން ފުރާފައިވަނީ އޭޕްރިލް 12 ވަނަ ދުވަހު އެވެ.
އީރާނުގެ އަސްކަރީ ތަރުޖަމާނު އިބްރާހިމް ޒުލްފަގާރީ ވިދާޅުވި ގޮތުގައި އެމެރިކާ ސިފައިން އެ އުޅަނދަށް އެރުމުގެ ކުރިން ވަނީ އުޅަނދަށް އަމާޒުކޮށް ބަޑިޖަހާފަ އެވެ.
މި ހާދިސާގެ މައުލޫމާތު އެންމެ ފުރަތަމަ އާދީއްތަ ދުވަހު ހާމަކުރެއްވީ އެމެރިކާގެ ރައީސް ޑޮނަލްޑް ޓްރަމްޕެވެ. އޭގެ ފަހުން އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ވަނީ އެކަން ކަށަވަރުކޮށްދީފަ އެވެ. ސެންޓްކޮމްއިން ބުނި ގޮތުގައި އެމެރިކާގެ މަނަވަރު "ޔޫއެސްއެސް ސްޕްރޫއަންސް" އިން އީރާނުގެ ދިދަ ޖަހާފައިވާ އެ މުދާ އުފުލާ އުޅަނދު ހިފެހެއްޓީ، އޮމާން ކަނޑުގައި އެމެރިކާގެ ކަނޑުގެ ސިފައިން އަޅާފައިވާ ބްލޮކޭޑާ ހިލާފުވާން މަސައްކަތް ކުރުމުންނެވެ.
ސެންޓްކޮމްއިން ބުނި ގޮތުގައި އެމެރިކާގެ މެރިން ސިފައިންގެ ބެލުމުގެ ދަށުގައި މިހާރު އޮތް އެ އުޅަނދު ދަތުރުކުރަމުން ދިޔައީ އީރާނުގެ ބަންދަރު އައްބާސް ބަނދަރަށެވެ.
މީގެ އިތުރުން، އެމެރިކާގެ މަނަވަރަކުން ބަޑިޖެހުމުގެ ކުރިން އެ އުޅަނދަށް އިންޒާރުދޭ މަންޒަރު ފެންނަ ވީޑިއޯއެއް ވެސް ސެންޓްކޮމްއިން ވަނީ ސޯޝަލް މީޑިއާ ޕްލެޓްފޯމް "އެކްސް" ގައި އާންމުކޮށްފަ އެވެ.
ޒުލްފަގާރީ ވިދާޅުވީ "އިސްތިއުމާރީ އެމެރިކާއިން ހަމަލާބަދަލުކުރުން ހުއްޓާލުމުގެ އެއްބަސްވުމާ ހިލާފުވެ، ކަނޑުފޭރުމުގެ އަމަލެއް ހިންގައި، އީރާނުގެ އުޅަނދުގެ ނެވިގޭޝަން ސިސްޓަމް ހަލާކުކޮށްލުމަށް ފަހު އެ އުޅަނދަށް ހަމަލާދީފައިވާ" ކަމަށެވެ.
އޭނާ އިތުރަށް ވިދާޅުވީ އެމެރިކާ ސިފައިން އެ އުޅަނދަށް އަރާފައިވަނީ "ޓެރަރިސްޓް މެރިން ސިފައިންގެ ބަޔަކު" އެ އުޅަނދަށް ބޭލުމަށްފަހު ކަމަށެވެ.
"އެމެރިކާގެ އަސްކަރިއްޔާއިން ހިންގި ހަތިޔާރު އެޅި ކަނޑުފޭރުމުގެ މި އަމަލަށް އީރާނުގެ އަސްކަރީ ބާރުތަކުން ވަރަށް އަވަހަށް ރައްދުދީ ބަދަލުހިފާނެ ކަމުގެ އިންޒާރު އަހަރެމެން ދެން،" ޒުލްފަގާރީ ވިދާޅުވިއެވެ.
