އެމެރިކާގެ އަސްކަރިއްޔާއިން އީރާނުގެ ބަނދަރުތަކުން ފުރާ އުޅަނދުފަހަރު ހުއްޓުވައި، އެ ގައުމުގެ ބަނދަރުތައް ބަންދުކުރުމުގެ މަސައްކަތް ހޯމަ ދުވަހު ފަށާފައިވާ ކަމަށް އެ ގައުމުގެ ރައީސް ޑޮނަލްޑް ޓްރަމްޕު އިއުލާނު ކުރައްވައިފި އެވެ.
މި ނިންމުމާ ގުޅިގެން އީރާނުން ވަނީ ގަލްފުގެ އަވަށްޓެރި ގައުމުތަކުގެ ބަނދަރުތަކަށް ހަމަލާދީ ބަދަލުހިފާނެ ކަމުގެ ވަރުގަދަ އިންޒާރެއް ދީފަ އެވެ. މި ނުތަނަވަސްކަން އުފެދިފައިވަނީ ހަނގުރާމަ ހުއްޓާލުމަށް މިދިޔަ ދުވަސްތަކުގައި ކުރެވުނު މަޝްވަރާތައް ނާކާމިޔާބުވުމާ ގުޅިގެންނެވެ.
މި ހަމަނުޖެހުންތަކާއެކު ދުނިޔޭގެ ބާޒާރުގައި ތެލުގެ އަގު އަނެއްކާ ވެސް ވަނީ އުފުލިފަ އެވެ. މިހާރު ފީފާއެއްގެ އަގު ވަނީ ސަތޭކަ ޑޮލަރަށްވުރެ މައްޗަށް އުފުލިފަ އެވެ. ހޮރުމޫޒު ކަނޑުއޮޅި މި ނުތަނަވަސްކަމާއެކު އަވަސް މުސްތަގުބަލެއްގައި ހުޅުވޭނެ ކަމަށް ނުބެލެވެ އެވެ.
މިދިޔަ ހަފުތާގައި ގާއިމުކުރި ދެ ހަފުތާގެ މުއްދަތުގެ ހަމަލާ ބަދަލުކުރުން ހުއްޓާލުމުގެ އެއްބަސްވުން ދެމިއޮންނާނެ ކަމާމެދު ވެސް މިހާރު ވަނީ ސުވާލު އުފެދިފަ އެވެ.
ހަނގުރާމަ ފެށުނީއްސުރެ، އީރާނުން ވަނީ ހޮރްމޫޒް ކަނޑުއޮޅިން ދަތުރުކުރާ ހުރިހާ އުޅަނދުފަހަރަކަށް އެ ސަރަހައްދު ބަންދުކޮށްފަ އެވެ. އީރާނުން ބުނަމުންދަނީ އެ ސަރަހައްދުން ދަތުރުކުރެވޭނީ ހަމައެކަނި އެ ގައުމުގެ ބާރުގެ ދަށުން، ވަކި ފީއެއް ދައްކައިގެން ކަމަށެވެ.
އީރާނުގެ އުޅަނދުތަކާއި އެ ގައުމަށް ފީ ދައްކާ އެއްވެސް އުޅަނދަކަށް ދަތުރު ނުކުރެވޭ ގޮތަށް އެމެރިކާއިން ހުރަސް އަޅާނެ ކަމަށް ޓްރަމްޕު ވަނީ ވިދާޅުވެފަ އެވެ.
އީރާނުގެ ޑިފެންސް މިނިސްޓްރީން ބުނާ ގޮތުގައި ބޭރު ގައުމެއްގެ އަސްކަރިއްޔާއަކުން ކަނޑުއޮޅި ކޮންޓްރޯލް ކުރަން އުޅުމަކީ މަސްލަހަތު ގޯސްވެ، ދުނިޔޭގެ ހަކަތައިގެ ރައްކާތެރިކަން ގެއްލިގެންދާނެ ކަމެއް ކަމަށެވެ.
