2019 ވަނަ އަހަރުން ފެށިގެން ޓެކްސީގެ ހިދުމަތް ދެމުން އަންނަ ދިވެހި ރާއްޖޭގެ އެއްވަނަ ޓެކްސީ އެޕްލިކޭޝަން އަވަސް ރައިޑްގެ ހިދުމަތް އެންމެ ޒަމާނީ ޓެކްނޮލޮޖީ ބޭނުން ކޮށްގެން ފަރުމާ ކުރެވިފައިވާ އެ ކުންފުނީގެ ސުޕަ އެޕް "އަވަސްއެޕް" އަށް ބަަދަލު ކޮށްފި އެވެ.
އަވަސް އެޕުން ބުނީ އެ އެޕްލިކޭޝަން މެދުވެރިކޮށް ކުރެވޭ ދަތުރުތަކަކީ ކަސްޓަމަރުންނަށް އަމާން އަދި ރައްކާތެރި ދަތުރުތަކަކަށް ހެދުމަށް ގިނަ ކަންތައްތަކެއް ހިމެނިފައިވާ ކަމަށެވެ. ގޮތުން ދަތުރު ކުރެވޭ ތަނާއި، ދަތުރު ކުރެވޭ ޑްރައިވަރުގެ މައުލޫމާތާއި ދަތުރުގެ ދިގުމިނާއި ނިންމޭނެ ވަގުތު ކުރިން އަންދާޒާ ކުރެވޭ ކަމަށްވެސް ބުންޏެވެ.
ޒަމާނަށް އައި ބަދަލު ތަކާއި އެކު ކަސްޓަމަރުންގެ މައުލޫމާތު ރައްކާތެރިކަމާއި އެކު ބެލެހެއްޓުމަކީ އަވަސްއެޕުން އިސްކަންދޭ ކަމެއް ކަމަށާއި ކަސްޓަމަރުންގެ ފޯނުނަންބަރާއި ކަސްޓަމަރުންގެ އެހެނިހެން މައުލޫމާތު ދަތުރު ނިމުމަށްފަހު ނުފެންނަގޮތަށް ރައްކާ ކުރެވޭ ކަމަށް އެ ކުންފުނިން ބުންޏެވެ.
އަވަސް އެޕްގެ އެމްޑީ މުހައްމަދު ޔާނިއު ރަމީޒް ވިދާޅުވީ އަވަސް ރައިޑް އެޕްލިކޭޝަން އަވަސް އެޕަށް ބަދަލުކުރަން ޖެހުނީ އަވަސް ރައިޑް އެޕްލިކޭޝަނަކީ ކުންފުނީގެ އަމިއްލަ ޓެކްނޮލޮޖީއަކަށް ނުވާތީ ބަދަލުތަކެއް ގެންނަން ހުރަސްތަކެއް ދިމާވެފައިވާތީ ކަމަށެވެ.
"އަޅުގަނޑުމެން ފެށިއިރު ބޭރުގެ އެޕެއް ބޭނުންކުރީ، އެ ދުވަސްވަރު ގިނަ ބަޔަކު ގަބޫލުކުރަން ދެކޮޅުހެދި މި ހިޔާލަކީ ކާމިޔާބު ކުރެވިދާނެ ކަމެއްކަން ސާބިތުކޮށްދިނުމަށް. އެކަން ކާމިޔާބުވި، ނަމަވެސް އެއީ އަޅުގަނޑުމެންގެ އަމިއްލަ ޓެކްނޮލޮޖީއަކަށް ނުވާތީ، އެޕަށް ބަދަލުތައް ގެނައުމުގައި ދަތިތަކެއް ހުރި،" އޭނާ ވިދާޅުވި އެވެ.
އަވަސް އެޕްގެ ހިދުމަތް ފުޅާކޮށް ގްރޭޓާ މާލޭގެ ޓެކްސީ ހިދުމަތުގެ 80 ޕަސެންޓް ކަވަރު ކުރާ ޓެކްސީ އެޕްލިކޭޝަން ދިވެހި އަމިއްލަ އެޕްލިކޭޝަނަކަށް ބަދަލު ކުރުމުގެ މަސައްކަތް ކުރާތާ ދެ އަހަރު ހޭދަވިކަން ފާހަގަކުރައްވާ އޭނާ ވިދާޅުވީ މި މި އެޕްލިކޭޝަނުން ޓެކްސީގެ އިތުރުން ޕިކަޕް އަދި ސައިކަލްވެސް ބުކް ކުރެވެ އެވެ.
"އިންޝޫރަންސް ވެސް ނަގަން ފަސޭހަވާނެ. ކަސްޓަމަރުނގެ ރައްކާތެރިކަމަށްޓަކައި ޕިންކޯޑު ޖެހުމާއި ދަތުރު އެހެން މީހަކާއި ޝެއާ ކުރުން ފީޗާސް ހުނާނެ. މިސާލަކަށް ކުއްޖަކު އެކަނި ޓެކްސީ އަށްލާފަ ބެލެނިވެރިޔާއަށް ދަތުރު ކުރަމުންދާ ގޮތް ބެލޭނެ. ފައިސާ ދައްކަން ވެސް ފަސޭހަވާނެ، ކޭޝްލެސް އޮޕްޝަން ހުންނާނެ،" އޭނާ ވިދާޅުވި އެވެ.
100 ޕަސަންޓު ޒުވާނުންގެ އުފެއްދުމެއް ކަމަށްވާ އަވަސް އެޕުން ޓެކްސީ ހިދުމަތުގެ އިތުރުން އިންޝުއަރަންސްގެ ހިދުމަތް މިހާރު ފަސޭހަ ކަމާއެކު ލިބެން ހުންނައިރު، ޕާރުސަލް ޑެލިވަރީ ހިދުމަތާއި ކާއެއްޗިހި ޑެލިވަރީ ކުރުމުގެ ހިދުމަތް ފެއްޓުމަށް މިހާރު ވަނީ ތައްޔާރުވެފަ އެވެ.
އަވަސްއެޕަކީ މިހާރު މާލެ ސަރަހައްދުގެ އެންމެ ގިނަ ޑްރައިވަރުންނާއި އެންމެ ގިނަ ކަސްޓަމަރުން ބޭނުން ކުރާ އެޕްލިކޭޝަނެވެ.
