ސަރުކާރުން ޓެކްސީ ފްލީޓެއް ފެށުމުން ކުދި ވިޔަފާރިތަކަށް ގެއްލުންވާނެ: ޓަވިޔަނި

ސަރުކާރުން ޓެކްސީ ފްލީޓެއް ފެށުމުން ކުދި ވިޔަފާރިތަކަށް ގެއްލުންވާނެ: ޓަވިޔަނި

ސަރުކާރުން ޓެކްސީ ފްލީޓެއް ފެށުމުން ޓެކްސީ ދުއްވާ މީހުންނާއި، ޓެކްސީ ސެންޓަރުތަކާއި، ކުއްޔަށް ކާރު ދޫކުރާ މީހުންގެ ދިރިއުޅުމަށް ނޭދެވޭ އަސަރުކޮށް، ކުދި ވިޔަފާރިތަކަށް ގެއްލުންވެ ދާއިރާގެ ހަމަހަމަ ވާދަވެރިކަން ނެތިގެންދާނެ ކަމަށް އަވަސް އެޕް ހިންގަމުންދާ ޓަވިޔަނިން ބުނެފި އެވެ.

ޓަވިޔަނިން ނެރުނު ނޫސް ބަޔާނެއްގައި ބުނީ ސަރުކާރުން ޓެކްސީ ފްލީޓެއް ފެށުމުން ދާއިރާގައި ރަޖިސްޓްރީވެ އާމްދަނީ ލިބެމުން ގެންދާ 10،000 އަށްވުރެ ގިނަ މީހުންނަށް ނޭދެވޭ އަސަރުކޮށް އެ މީހުންގެ ހައްގުތަކަށް ގެއްލުން ލިބޭނެ ކަމަށެވެ.

"ޓެކްސީ ޑްރައިވަރުންނާއި މި ދާއިރާގެ އެންމެހާ ފަރާތްތަކުގެ ކަންބޮޑުވުންތައް އެއްފަރާތްކޮށް، ޓެކްސީ ފްލީޓެއް ފަށަން ސަރުކާރުން ނިންމި ނިންމުމަކީ މި ދާއިރާގައި މިނިވަންކަމާ އެކު މަސައްކަތް ކުރާ އެންމެހާ ފަރާތްތަކާއި އާއިލާގެ ހައްގަށް ސަރުކާރުން ވިސްނާލުމެއް ނެތި ކޮށްފައިވާ ކަމެއްކަން މި ކުންފުނިން ދެކެން،" އެ ކުންފުނިން ބުންޏެވެ.

ސަރުކާރުން ޓެކްސީ ފްލީޓެއްގައި ގާއިމުކުރަނީ އެކަމަށް އެކަށީގެންވާ މަޝްވަރާތަކާއި ދިރާސާތަކާ ނުލައި އެފަދަ ކަމެއް ކުރަން ނޫޅޭ ކަމަށް ކުރިން ބުނި ބުނުމާ މުޅިން ހިލާފަށް ކަމަށް ވެސް ޓަވިޔަނިން ފާހަގަކުރި އެވެ.

"މިފަދަ ބޮޑު ނިންމުމެއް ނިންމިއިރު ޓެކްސީ ދާއިރާގައި މަސައްކަތް ކުރަމުން އަންނަ ބޭފުޅުން، މިސާލަކަށް ޓެކްސީ ސެންޓަރުތަކުގެ ވެރިންނާ ވެސް މަޝްވަރާ ނުކުރުމަކީ ހިތާމަކުރާ ކަމެއްކަން ދަންނަވަން. މިނިސްޓްރީއަށް ހުށަހެޅި އާރްޓީއައިއަށް ޖަވާބު ދެމުން ވެސް މިފަދަ ފްލީޓެއް ހެދުމަށް އެއްވެސް ތައްޔާރީތަކެއް އެއްވެސް މަޝްވަރާއެއް ކޮށްފައި ނުވާ ކަމަށް ބުނެ ޖަވާބު ދީފައިވާކަން ފާހަގަކުރަން،" އެ ކުންފުނިން ބުންޏެވެ.

ޓަވިޔަނިން ބުނީ ޓެކްސީ ހިދުމަތް ދިނުމުގައި އަމަލު ކުރަން ޖެހޭ އުސޫލުތަކާއި، ރަނގަޅު ކުރަން ޖެހޭ ކަންކަމާއި، އިސްލާހު ކުރަން ޖެހޭ ދާއިރާތައް ޓްރާންސްޕޯޓް މިނިސްޓްރީން މިހާތަނަށް ސާފުކޮށް އަންގާފައި ނުވާ ކަމަށެވެ. އެގޮތުން ޑްރައިވަރުންގެ ފަރާތުން ފެންނަ ނޭދެވޭ އަމަލުތައް ހުއްޓުވުމަށް އެކަށީގެންވާ ފިޔަވަޅު އަޅާފައި ނުވާކަން ވެސް އެ ކުންފުނިން ފާހަގަކުރި އެވެ.

މައްސަލައާ ގުޅިގެން ހުރި ކަންބޮޑުވުންތައް ޓްރާންސްޕޯޓް މިނިސްޓްރީއާ ހިއްސާ ކުރި ނަމަވެސް، އެ މިނިސްޓްރީން ޒިންމާދާރު ގޮތެއްގައި އެއްބާރުލުން ދީފައި ނުވާތީ އެކަމާ ޓަވިޔަނިން ހިތާމަ ފާޅުކޮށްފައިވެ އެވެ.

ޓެކްސީ ޑްރައިވަރުންގެ ހައްގުތައް ރައްކާތެރި ކުރުމަށް ގާނޫނީ އިމުގެ ތެރެއިން އަޅަން ޖެހޭ ހުރިހާ ފިޔަވަޅެއް އެ ކުންފުނިން އަޅާނެކަމުގެ ޔަގީންކަން ވެސް ޓަވިޔަނިން ވަނީ ދީފަ އެވެ.

އަވަސް އެޕުން މެދުނުކެނޑި 15 އަހަރު ހިދުމަތް ދެމުން އަންނައިރު، އެ ކުންފުނީގެ ދަށުން 1،500 އެއްހާ ޑްރައިވަރުން ދަފްތަރު ކުރެވި އަންނަނީ ދަތުރު ކުރަމުންނެވެ.

ފަހުގެ ޚަބަރު

ތިމަރަފުށްޓާއި ފޮނަދޫގައި ސިޓީ ހޮޓާ އަޅަން ހުޅުވާލައިފި

ތ. ތިމަރަފުށްޓާއި ލ. ފޮނަދޫގައި ފަތުރުވެރިކަން ފުޅާކުރުމަށްޓަކައި، އެ ދެ ރަށުގައި ސިޓީ ހޮޓާ އަޅައި ހިންގާނެ ފަރާތްތައް ހޯދުމަށް ޓޫރިޒަމް މިނިސްޓްރީން ބީލަމަށް ހުޅުވާލައިފި. މިއީ ރާއްޖޭގެ އެކި ސަރަހައްދުތަކަށް ފަތުރުވެރިކަން ފުޅާކުރުމަށް ސަރުކާރުން ގެންގުޅޭ ސިޔާސަތުގެ ދަށުން ކުރިއަށްގެންދާ މަސައްކަތެއް.

ސިމްޑީގެ ވިޔަފާރި ހާދާލަށް ފުޅާކުރަނީ

ސިމްޑީ ގްރޫޕްގެ ވިޔަފާރި ހދ. އަތޮޅުގައި ފުޅާކުރުމަށްޓަކައި ކުޅުދުއްފުށީގެ "މިތުރު" ކުންފުންޏާއެކު ސަބް-ޑިސްޓްރިބިއުޝަން އެއްބަސްވުމެއްގައި މިއަދު ވަނީ ސޮއިކޮށްފައެވެ. މި ޕާޓްނަޝިޕްގެ ސަބަބުން ސިމްޑީން އެތެރެކުރާ ބައިނަލްއަގުވާމީ މަގުބޫލު ބްރޭންޑްތަކުގެ މުދާ އެ އަތޮޅުގެ ރީޓެއިލް ފިހާރަތަކަށާއި އާންމުންނަށް ފަސޭހަކަމާއެކު ލިބޭނެ އިންތިޒާމު ހަމަޖެހިގެންދާނެއެވެ.

ވިލާ ކޮލެޖާއި މާރޕް ގުޅިގެން މެންޓަރޝިޕް ޕްރޮގްރާމެއް

ވިލާ ކޮލެޖާއި މާރޕް ގުޅިގެން ވަޒީފާ އަދާކުރާ ފަރާތްތަކަށް ޚާއްޞަ މެންޓަރޝިޕް ޕްރޮގްރާމެއް ފަށާފައިވަނީ ދިވެހި ލީޑަރުން ބިނާކޮށް ސީނިއަރ މެނޭޖްމަންޓް މަޤާމުތަކަށް މީހުން ތައްޔާރުކުރުމަށެވެ. މި ޕްރޮގްރާމުގެ ދަށުން ތަޖުރިބާކާރުންގެ އެހީތެރިކަމާއެކު ގްރެޖުއޭޓުންނަށް ޢަމަލީ ހުނަރުތައް ދަސްކޮށްދީ، މަތީ ތަޢުލީމާއި އިންޑަސްޓްރީއާ ދެމެދު އޮތް ގުޅުން ވަރުގަދަކުރުމަށް ވަނީ އަމާޒު ހިފާފައެވެ.

ޓްރީ ޓޮޕް ހިތާނީ ކޭމްޕުގެ ރަޖިސްޓްރޭޝަން ހުޅުވާލައިފި

ޓްރީ ޓޮޕް ހޮސްޕިޓަލުގެ މިއަހަރުގެ ފުރަތަމަ ހިތާނީ ކޭމްޕުގައި ބައިވެރިވުމަށް ރަޖިސްޓަރީވުމުގެ ފުރުސަތު ޑިސެމްބަރު 17 ގެ ނިޔަލަށް ވަނީ ހުޅުވާލާފައެވެ. ތަޖުރިބާކާރު ޑޮކްޓަރުންގެ ޓީމަކުން ކުރިއަށްގެންދާ މި ކޭމްޕުގެ ހިތާނުކުރުމުގެ އޮޕަރޭޝަންތައް ކުރިއަށްދާނީ ޑިސެމްބަރު 12 އިން ޖެނުއަރީ 11 ގެ ނިޔަލަށެވެ. މި ޕެކޭޖުގެ ދަށުން ކޮންސަލްޓޭޝަނާއި، ލެބޯޓަރީ ޓެސްޓުތަކުގެ އިތުރުން އޮޕަރޭޝަނަށްފަހު ބޭނުންވާ ފަރުވާގެ ހިދުމަތްތައް ލިބިގެންދާނެއެވެ.

ޓޯޓަލް ފިޒިއޯއިން އެލައިޑްގެ ހިދުމަތް ގަބޫލުކުރަން ފަށައިފި

ފިޒިއޮތެރަޕީގެ ޚިދުމަތްދޭ "ޓޯޓަލް ފިޒިއޯ" ކްލިނިކުން ބަލިމީހުންނަށް ލުއިފަސޭހަކޮށްދިނުމުގެ ގޮތުން އެލައިޑް އިންޝުއަރެންސް ގަބޫލުކުރަން ފަށައިފިއެވެ. ޒަމާނީ ވަސީލަތްތަކާއެކު ފަރުވާދޭ މި ކްލިނިކުން މިހާރުވެސް ޕޮލިސް، އެމްއެންޑީއެފް އަދި ސޮލަރެލް އިންޝުއަރެންސްގެ ޚިދުމަތް ލިބޭއިރު، އިތުރު އިންޝުއަރެންސްތައް މެދުވެރިކޮށް ޚިދުމަތް ލިބޭނެ އިންތިޒާމު ހަމަޖެއްސުމަށް ދަނީ މަސައްކަތް ކުރަމުންނެވެ.

ލަކްސް ގްލޯގެ ދެވަނަ ފިހާރަ މަޖީދީމަގުގައި ހުޅުވައިފި

މަޝްހޫރު ކޮސްމެޓިކްސް ބްރޭންޑް "ލަކްސް ގްލޯ" ގެ ދެވަނަ ފިހާރަ މާލޭގެ މަޖީދީމަގުގައި ހުޅުވައިފިއެވެ. މި ފިހާރައިން ބައިނަލްއަގުވާމީ ބްރޭންޑްތަކުގެ ސްކިންކެއާ އަދި މޭކަޕް ސާމާނު ޓެސްޓުކޮށްލުމާއި، ފަންނީ ލަފާ ހޯދައިގެން ވަގުތުން ގަނެވޭނެ އިންތިޒާމު ވަނީ ހަމަޖެހިފައެވެ. ފިހާރަތަކުގެ އިތުރުން އެ ބްރޭންޑުގެ ވެބްސައިޓް މެދުވެރިކޮށް އޮންލައިންކޮށް އޯޑަރުކުރުމުގެ ފުރުސަތުވެސް ކަސްޓަމަރުންނަށް ވަނީ ހުޅުވާލެވިފައެވެ.

ކްލީވިއާ ރެސިޑެންސް: ޒަމާނީ ބޯހިޔާވަހިކަން އާ މަޝްރޫއެއް

ޕޭން ރިއަލް އެސްޓޭޓުން އަލަށް ތައާރަފްކުރި "ކްލީވިއާ ރެސިޑެންސް" މަޝްރޫއަކީ މެދުފަންތީގެ އާމްދަނީ ލިބޭ ފަރާތްތަކަށް އަމާޒުކޮށްގެން ހިންގާ އަތްފޯރާ އަގުތަކެއްގެ ބޯހިޔާވަހިކަމުގެ މަޝްރޫއެކެވެ. މި މަޝްރޫއުގެ ދަށުން ޒަމާނީ ފެންވަރުގެ އެއް ކޮޓަރި އަދި ދެ ކޮޓަރީގެ އެޕާޓްމަންޓްތައް ލިބޭއިރު، ފައިސާ ދެއްކުމުގައި ލުއި ގޮތްތަކެއް ވަނީ ހަމަޖައްސާފައެވެ.

Newsletter

Get the latest news delivered straight to your inbox