އިދިކޮޅު މޯލްޑިވިއަން ޑިމޮކްރެޓިކް ޕާޓީގެ މަގާމުތަކަށް ތަޖުރިބާ ލިބިފައި ތިބި، ހަރު މީހުން ކުރިމަތިލާން ކުރީގެ ރައީސް މުހައްމަދު ނަޝީދު ހިތްވަރުދެއްވައިފި އެވެ.
ތަޖުރިބާ ލިބިފައި ތިބި މީހުން ޕާޓީގެ މަގާމުތަކަށް ކުރިމަތިލާން ނަޝީދު ހިތްވަރު ދެއްވާފައި މި ވަނީ އެމްޑީޕީގެ ޗެއާޕާސަންގެ މަގާމަށް ވާދަ ކުރަން އެންމެ ރަނގަޅު ބޭފުޅުންނާމެދު މަޝްވަރާ ކުރެވެމުންދާ ދަނޑިވަޅެއްގެ އެވެ.
އެމްޑީޕީގެ ޗެއާޕާސަންގެ މަގާމަކީ ޕާޓީގެ ހިންގުމުގެ އެންމެ އިސް ރޯލު އަދާކުރަންޖެހޭ މަގާމެވެ. އެ މަގާމަށް ކުރިމަތިލައްވާނެ ކަމަށް މިހާތަނަށް އިއުލާނު ކުރައްވާފައި ވަނީ މީކާއީލް އަހުމަދު ނަސީމް، 32، އެކަންޏެވެ.
ޗެއާޕާސަންގެ މައުލޫގައި ވާހަކަ ދެކެވެމުން ދަނިކޮށް އެކްސްގައި ކުރެއްވި ޕޯސްޓެއްގައި ނަޝީދު މިއަދު ވިދާޅުވީ އެމަނިކުފާނު ދެކެވަޑައިގަންނަވާ ގޮތުގައި ތަޖުރިބާ ލިބިފައި ތިބި ހަރު މީހުން އެމްޑީޕީގެ މަގާމުތަކަށް ކުރިމަތިލުމުން ޕާޓީއަށް ފައިދާވާނެ ކަމަށެވެ.
"އެމްޑީޕީގެ ގައުމީ މަޖިލީހަށް ބޭނުންވަނީ ހުރިހާ އުމުރެއްގެ މީހުން. ޒުވާނުންނާއި ތަޖުރިބާ ހުރި، ހަރު މީހުން ވެސް މެ. ޕާޓީގައި ތިއްބެވި ތަޖުރިބާ ހުރި ބޭފުޅުން މަގާމުތަކަށް ޝައުގުވެރިވުމަކީ ޕާޓީއަށް ފައިދާވާނެ ކަމެއްގެ ގޮތުގައި އަޅުގަނޑު ދެކެން،" ނަޝީދު ވިދާޅުވި އެވެ.
ޗެއާޕާސަންގެ މަގާމަށް މީކާއީލް ކުރިމަތިލައްވާނެ ކަމަށް އިއުލާނު ކުރައްވާފައިވާއިރު، އެ މަގާމަށް ކުރީގެ ޗެއާޕާސަން މާރިޔާ އަހުމަދު ދީދީ، 63، އެ މަގާމަށް ގެންނަން ޕާޓީގެ ފެކްޝަނަކުން މަސައްކަތް ކުރަމުންދާ ކަމަށް އެބަ ވާހަކަ ދެކެވެ އެވެ.
އެމްޑީޕީގެ ޗެއާޕާސަންގެ މަގާމުގައި މާރިޔާ ހުންނެވީ 2008 އިން ފެށިގެން 2011 އާ ހަމައަށެވެ. ދިވެހިރާއްޖޭގައި ބޭއްވި ގިނަ ޕާޓީ އެކުލެވޭ ފުރަތަމަ އިންތިހާބު އެމްޑީޕީ އިން ކާމިޔާބު ކުރިއިރު ޗެއާޕާސަންއަކަށް ހުންނެވީ މާރިޔާ އެވެ. އެއީ ނަޝީދަށް ފަހު ޕާޓީގެ ދެ ވަނަ ޗެއާޕާސަން އެވެ.
ނަޝީދާއި މާރިޔާގެ އިތުރުން އެމްޑީޕީގެ ޗެއާޕާސަންގެ މަގާމު ފުރުއްވާފައި ވަނީ މޫސާ މަނިކު (ރީކޯ މޫސަ) އާއި އަލީ ވަހީދު އަދި ހަސަން ލަތީފެވެ.
