މާލޭ ރޯމަސް މާރުކޭޓުގައި ވިއްކަން ނެރޭ މަސް، ފަޅުތެރޭގެ ނަޖިސް ފެނުން ދޮންނަ މައްސަލައެއް ފެންމަތިވެއްޖެ އެވެ.
މިކަން ހާމަވެފައިވަނީ އަހުމަދު މުނައްވަރު ނަމަކަށް ކިޔާ މީހަކު ފޭސްބުކްގައި އާންމުކުރި ވީޑިއޯއަކުންނެވެ. އެ ވީޑިއޯއިން ފެންނަ ގޮތުގައި، ކަޅުބިލަމަސްތަކެއް ފިނިކުރަން ފޮށިތަކަށް އެޅުމުގެ ކުރިން، ބަނދަރުތެރެއިން ލޮނު ނަގައިގެން އެ މަސްތަކަށް އަޅާތަން ފެނ ެއެވެ.
މާލޭގެ ރޯމަސް މާރުކޭޓުގެ ބަނދަރު ސަރަހައްދަކީ އާންމުކޮށް ވެސް ކުނި ގިނަ އަދި ކިލަނބު ސަރަހައްދެކެވެ. މީގެ އިތުރުން އެ ސަރަހައްދުގައި އުޅޭ ބައެއް މީހުން މޫދަށް ކުޑަކަމުވެސްދެ އެވެ.
"ފަޅުތެރޭގައި ހުރި އޮޑިފަހަރުގައި ދިރިއުޅޭ އެމީހުން ގުއިރެނީ ފަޅަށެވެ. މަހު ލެޔާއި މަސްކަނޑާފައި ބާކީވާ ބަޔާއި ކުނިވާ މަސްފަދަ ތަކެތި އަޅަނީ ފަޅަށެވެ. ފަޅުން ލޮނު ނަގާފައި އެއަޅަނީ މަސް ބާސްކެޓަށެވެ. މާދަމާ އެ މަސްތައް ވިއްކާނީ މަސްމާރުކޭޓުގައެވެ. އާދެ، އެމީހުން ގުއިރީ ތަޣައްޔަރު ވެފައިވާ މޫދުގެ ލޮނުން (ގުއިފެނުން) ދޮވެފައިވާ މަހެވެ،" ވީޑިއޯ ފޭސްބުކްގައި އާންމުކުރި މުނައްވަރު ބުނެފައިވެ އެވެ.
މިގޮތަށް ނަޖިސް ލޮނުން މަސް ސާފުކުރުމަކީ އޭގެ ސަބަބުން ސިއްހީ ބޮޑެތި މައްސަލަތަކެއް ކުރިމަތިވެދާނެ ކަމެކެވެ. ބަނދަރު ފަދަ ތަންތަނަކީ ތެލާއި، ކުނިބުނީގެ އިތުރުން ނަޖިސް އެކުލެވޭނެ ތަންތަނެވެ.
މުނައްވަރު ހިއްސާކުރި ވީޑިއޯއަށް ކޮމެންޓުކުރި މީހަކު ބުނެފައި ވަނީ ފުޑް އެންޑް ޑްރަގް އޮތޯރިޓީ އާއި ހެލްތު ޕްރޮޓެކްޝަން އެޖެންސީ ފަދަ ތަންތަނުގެ އަސްލު މަގުސަދަކީ މިފަދަ ކަންކަން މޮނިޓާކޮށް، އާންމު ސިއްހަތު ރައްކާތެރިކުރުން ކަމަށެވެ.
