ނިމިދިޔަ ލޯކަލް ކައުންސިލް އިންތިހާބުގައި އަމިއްލަ ގޮތުން މާލޭގެ މޭޔަރުގެ މަގާމަށް ވާދަކުރި އިސްމާއިލް ޒަރިޔަންދު، ކުރީގެ ރައީސް ޔާމީން ހިންގަވާ ޕީޕަލްސް ނެޝަނަލް ފްރަންޓް (ޕީއެންއެފް) އަށް މިއަދު ސޮއި ކުރައްވައިފި އެވެ.
މާލޭގެ މޭޔަރަކަށް ޒަރިޔަންދު ވާދަކުރީ ޕީއެންއެފްގެ ތާއީދާއެކުގަ އެވެ. އެގޮތުން ޕީއެންއެފް އިން ވަނީ ޒަރިޔަންދަށް ތާއީދު ހޯދަން ގިނަ މަސައްކަތްތަކެއް ކޮށްފައިކަން ވެސް ފާހަގަކުރެވެ އެވެ.
މޭޔަރު އިންތިހާބުގައި 6,270 ވޯޓާއެކު ޒަރިޔަންދަށް ލިބުނީ ތިންވަނަ އެވެ. މޭޔަރު އިންތިހާބު 13،805 ވޯޓާއެކު އިދިކޮޅު އެމްޑީޕީގެ އާދަމް އާޒިމް ކާމިޔާބުކުރިއިރު، ދެވަނަ 9،273 ވޯޓާއެކު ލިބުނީ ސަރުކާރު ހިންގާ ޕީއެންސީގެ ކެންޑިޑޭޓް މޫސާ އަލީ ޖަލީލަށެވެ.
ކުރީގެ ރައީސް އަބްދުﷲ ޔާމީން ރޭ ވިދާޅުވީ މާލޭ މޭޔަރުގެ ގޮނޑި އެމްޑީޕީއަށް ލިބުނީ އިންތިހާބުގައި ޒަރިޔަންދު ވާދަކޮށް ހޯދި ވޯޓުތަކާއެކުގައި ކަމަށެވެ. ޕީއެންސީގެ ގިނަ ވޯޓު ލިބުނީ ޒަރިޔަންދަށްކަން ވެސް ޔާމީން ފާހަގަކޮށްފައިވެ އެވެ.
ޒަރިޔަންދުއަކީ ދައުލަތުގެ އެކި އިދާރާތަކުގައި 30 އަހަރަށްވުރެ ގިނަ ދުވަހު ހިދުމަތް ކުރައްވާފައިވާ ބޭފުޅެކެވެ. އޭގެތެރެއިން 20 އަހަރަށްވުރެ ގިނަ ދުވަހު އޭނާ ވަނީ އޮޑިޓާ ޖެނެރަލްގެ އޮފީހުގައި ސީނިއާ އޮޑިޓަރެއްގެ ގޮތުގައި މަސައްކަތް ކުރައްވައިފަ އެވެ.
އޭގެއިތުރުން އޭނާ ވަނީ ފިނޭންސް މިނިސްޓްރީގައި ވެސް މުހިންމު މަސައްކަތްތަކެއް ކުރައްވައިފަ އެވެ. އެގޮތުން ދައުލަތުގެ ބަޖެޓު އެކުލަވައިލުމާއި އެ ނޫން ވެސް ބައެއް މުހިންމު ޒިންމާތައް އޭނާ އުފުއްލަވާފައިވެ އެވެ.
ޒަރިޔަންދު އަކީ ރާއްޖޭގެ ގައުމީ ޓީމުގެ ގޯލު ވެސް ބަލަހައްޓާފައިވާ ހުނަރުވެރި ކީޕަރެއް ވެސްމެ އެވެ.
