ރައްޔިތުންގެ މެދުގައި ގާނޫނުއަސާސީއަށް ސަރުކާރުން ގެނައި ބަދަލަށް ރުހުން އޮތްތޯ ބެލުމަށް ނެގި ވޯޓުގައި ސަރުކާރަށް ބޮޑުތަނުން ނޫނެކޭ ބުނެފައިވާތީ އިތުރު ބަދަލުތަކެއް ގާނޫނުއަސާސީއަށް ގެނައުމުގެ މެންޑޭޓެއް މިހާރު މި ސަރުކާރުގައި ނެތް ކަމަށް އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ކުރީގެ ޗެއާޕާސަން ފައްޔާޒު އިސްމާއީލް ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިންތިހާބާއި ރިޔާސީ އިންތިހާބު އެއް ދުވަހެއްގައި ބޭއްވުމަށާއި ވިހިވަނަ ރައްޔިތުންގެ މަޖިލީހުގެ އުމުރުން ހަ މަސްދުވަސް އުނިކުރުމަށް ފާސްކުރި ބިލު ދިވެހިން ވަނީ އަނބުރާ ފޮނުވާލާފަ އެވެ
މިރޭ ކުރެއްވި ޓްްވީޓެއްގައި ފައްޔާޒު ވަނީ ރެފަރެންޑަމުން ސާބިތުވި ކަމަކީ ދިވެހި ހުރިހާ ރައްޔިތުން ވެސް ގާނޫނުއަސާސީގެ ހިމާޔަތުގައި، ޑިމޮކްރަސީގެ ދިފާއުގައި ތިބޭނެކަން ކަމަށެވެ.
"ފެންނަ ނުފެންނަ ވޯޓުގައި 70 ޕަސެންޓުން މި ސަރުކާރަށް ރައްޔިތުން ނޫނެކޭ ބުނެފި. ގާނޫނުއަސާސީއަށް އިތުރު ބަދަލުތަކެއް ގެނައުމުގެ މެންޑޭޓެއް މި ސަރުކާރުގައި މިހާރު ނެތް. މިހާރު ގެނެސްފައި ހުރި ބަދަލުތައް ވެސް އަނބުރާ ގެންދަން ޖެހޭ،" ފައްޔާޒު ގޮވާލެއްވި އެވެ.
މި ވޯޓުގެ ނަތީޖާ އެގޮތަށް ނުކުތަސް ގާނޫނުއަސާސީ އާއި ދައުލަތް ހިންގުމުގެ އޮނިގަނޑަށް ބޮޑެތި ބަދަލުތަކެއް ގެންނަން ޖެހޭކަން ދިވެހިން ގަބޫލުކުރާ ކަމަށް އޭނާ ވިދާޅުވި އެވެ.
"ޒަމާނުއްސުރެ ދައުލަތް ހިންގުމުގެ ނިޒާމަށް ދިވެހިން ގެންނަން ބޭނުންވެފައި ތިބި ބަދަލުތަކުގެ ކަރުދާހަކާއެކު އަޅުގަނޑުމެން ރައްޔިތުންނާ ހަމައަށް ދާނަން. މަޝްވަރާ އާއި ހިޔާލު ހޯދައިގެން އެ ބަދަލުތައް ގެނެވޭނެ އިންތިޒާމެއް އަޅުގަނޑުމެން ހޯދާނަން،" ފައްޔާޒު ވިދާޅުވި އެވެ.
"އިސްލާހީ މަސައްކަތަކީ އަބަދުވެސް ކުރަން ޖެހޭ މަސައްކަތެއް، އެ މަސައްކަތުގައި މަޑުޖެހުމެއް ނެތް."
ހޮނިހިރު ދުވަހުގެ އިންތިހާބުގައި ރައްޔިތުން އެމްޑީޕީއާ ކައުންސިލްތައް ހަވާލުކުރީ އެމްޑީޕީއާ ދޭތެރޭ ރައްޔިތުންގެ އުންމީދެއް އަދިވެސް އޮތުމުން ކަމަށް ފައްޔާޒު އެކްސްގައި ކުރެއްވި ޕޯސްޓެއްގައި ވިދާޅުވި އެވެ.
"ސަރުކާރާ މެދު ވަރަށް ބޮޑަށް ރައްޔިތުން ތިބީ ނުރުހިފައި. މިއީ ރައްޔިތުންގެ އިތުބާރު ހޯދަން ލިބޭ ފުރުސަތެއް. ރައްޔިތުންގެ އުންމީދުތައް ގުޅިފައި އޮތީ އެމްޑީޕީއާ. މިފަހަރު ރައްޔިތުންދިން އުންމީދުގެ ހުޅުކޮޅު ނިވުނަނުދީ ރޯކުރުމަކީ އަޅުގަނޑުމެންގެ މައްޗަށް އޮތް ޒިންމާއެއް،" ފައްޔާޒު ވިދާޅުވި އެވެ.
