މިއަދު ބޭއްވި ލޯކަލް ކައުންސިލްގެ އިންތިހާބުގައި ދިވެހިރާއްޖޭގެ ފަސް ސިޓީގެ މޭޔަރުގެ މަގާމު ވެސް އިދިކޮޅު އެމްޑީޕީގެ ކެންޑިޑޭޓުން ހޮވިއްޖެ އެވެ.
ވެރިކަން ހިންގާ މާލެ ސިޓީ އާއި އައްޑޫ ސިޓީ އާއި ކުޅުދުއްފުށި ސިޓީ އަދި ތިނަދޫ ސިޓީގެ މޭޔަރުގެ މަގާމު ވެސް ލިބުނީ އެމްޑީޕީގެ ކެންޑިޑޭޓުންނަށް ކަން މިހާތަނަށް ގުނި ވޯޓުގެ ނަތީޖާއިން ދައްކަ އެވެ.
މާލޭގެ މޭޔަރުގެ މަގާމަށް ހޮވުނީ މިހާރުގެ ވެސް މޭޔަރު އާދަމް އާޒިމް އެވެ. އައްޑޫ ސިޓީގެ މޭޔަރުގެ މަގާމަށް ވެސް ހޮވުނީ މިހާރުގެ މޭޔަރު އަލީ ނިޒާރެވެ. އަދި ކުޅުދުއްފުށީ މޭޔަރުގެ މަގާމު ވެސް މިހާރުގެ މޭޔަރު މުހައްމަދު އާތިފު ދިފާއު ކުރެއްވި އެވެ.
ފުވައްމުލަކު މޭޔަރުގެ މަގާމަށް ވެސް ހޮވުނީ މިހާރުގެ ވެސް މޭޔަރު އިސްމާއިލް ރަފީގެވެ. އަދި ތިނަދޫ މޭޔަރުގެ މަގާމަށް ވެސް ހޮވުނީ މިވަގުތުގެ މޭޔަރު ސައުދު އަލީ އެވެ.
ވަގުތީ ނަތީޖާތައް ދައްކާ ގޮތުގައި ކައުންސިލުގެ ގިނަ ގޮނޑިތައް ވެސް ނެގީ އެމްޑީޕީ އިންނެވެ. އަދި ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލަން ފެނޭތޯ ބަލަން ނެގި ފެންނަ ނުފެންނަ ވޯޓުން ވެސް ސަރުކާރު ދަނީ ބަލިވަމުންނެވެ.
ސަރުކާރުން ބޭނުންވީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލާށެވެ. އިދިކޮޅު އެމްޑީޕީ އިން ވަކާލާތު ކުރީ ދެ އިންތިހާބު ވަކިވަކިން ބާއްވާށެވެ.
