ކުރިއަށް އޮތް 20 އަހަރަށް އައްޑޫ ސިޓީގެ ކަރަންޓުގެ މައްސަލަ ހައްލުކުރުމުގެ މަޝްރޫއުގައި މިއަދު ހަވީރު ސޮއިކޮށްފައިވާ ކަމަށް ރައީސް މުހައްމަދު މުއިއްޒު ހާމަކުރައްވައިފި އެވެ.
ކައުންސިލް އިންތިހާބަށް ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އިން ކުރިއަށްގެންދާ "ގްރޭޓާ އައްޑޫ" ކެމްޕޭންގެ ދަށުން މާލޭގައި ބޭއްވި ޖަލްސާގައި ވާހަކަ ދައްކަވަމުން މުއިއްޒު ވަނީ އެ މައްސަލައަށް ދާއިމީ ހައްލު ގެނައުމުގެ އެއްބަސްވުމުގައި މިއަދު ސޮއިކޮށްފައިވާ ކަމަށް ވިދާޅުވެފަ އެވެ.
"26 މެގަވޮޓުގެ ކަރަންޓު ފޯރުކޮށްދޭނެ ނިޒާމު އިރާދުކުރެއްވިއްޔާ މި އެއްބަސްވުމުގެ ދަށުން ގާއިމު ކުރެވިގެންދާނެ. މި އަންނަ އަހަރުގެ ޖުލައި މަހާ ހަމައަށް ދާއިރު މުޅިން އެކުގައި މި މަޝްރޫއު ނިމި ކުރިއަށް އޮތް 20 އަހަރަށް އައްޑޫ ސިޓީގެ ކަރަންޓުގެ މައްސަލަ ހައްލުވެގެންދާނެ،" މުއިއްޒު އިއުލާން ކުރެއްވި އެވެ.
އައްޑޫގެ ކަރަންޓުގެ މައްސަލައަކީ އެމަނިކުފާނު ސަރުކާރާ ހަވާލުވުމުގެ ކުރިން ވެސް ދިމާވެފައި އޮތް މައްސަލައެއް ކަމަށް މުއިއްޒު ވިދާޅުވި އެވެ. އައްޑޫ ސިޓީ ކައުންސިލާއި ރައްޔިތުންގެ މަޖިލީހުގެ މެޖޯރިޓީ ވެސް މިދިޔަ ސަރުކާރަށް އޮތް ކަމަށާއި ނަމަވެސް ފަސް އަހަރު ނިމިގެންދިޔައިރު ވެސް ހައްލު ނުކުރެވޭ ކަމަށް މުއިއްޒު ވިދާޅުވި އެވެ.
އައްޑޫ ސިޓީއަށް ދިމާވެފައިވާ ކަރަންޓުގެ މައްސަލައަށް ދާއިމީ ހައްލެއް ގެނެސްދޭނެ ކަމަށް ސަރުކާރުން ބުނި ނަމަވެސް އެކަން އަދިވެސް ހައްލެއް ނުވެ އެވެ. އެގޮތުން ދޭތެރެދޭތެރެއިން ކަރަންޓު ކެނޑެ އެވެ.
